౨. రాధసంయుత్తం

౧. పఠమవగ్గో

౧. మారసుత్తవణ్ణనా

౧౬౦. రాధసంయుత్తస్స పఠమే మారో వా అస్సాతి మరణం వా భవేయ్య. మారేతా వాతి మారేతబ్బో వా. యో వా పన మీయతీతి యో వా పన మరతి. నిబ్బిదత్థన్తి నిబ్బిదాఞాణత్థం. నిబ్బానత్థాతి ఫలవిముత్తి నామేసా అనుపాదానిబ్బానత్థాతి అత్థో. అచ్చయాసీతి అతిక్కన్తోసి. నిబ్బానోగధన్తి నిబ్బానే పతిట్ఠితం. ఇదం మగ్గబ్రహ్మచరియం నామ నిబ్బానబ్భన్తరే వుస్సతి, న నిబ్బానం అతిక్కమిత్వాతి అత్థో. నిబ్బానపరియోసానన్తి నిబ్బానం అస్స పరియోసానం, నిప్ఫత్తి నిట్ఠాతి అత్థో. పఠమం.

౨-౧౦. సత్తసుత్తాదివణ్ణనా

౧౬౧-౧౬౯. దుతియే సత్తో సత్తోతి లగ్గపుచ్ఛా. తత్ర సత్తో తత్ర విసత్తోతి తత్ర లగ్గో తత్ర విలగ్గో. పంస్వాగారకేహీతి పంసుఘరకేహి. కేళాయన్తీతి కీళన్తి. ధనాయన్తీతి ధనం వియ మఞ్ఞన్తి. మమాయన్తీతి ‘‘మమ ఇదం, మమ ఇద’’న్తి మమత్తం కరోన్తి, అఞ్ఞస్స ఫుసితుమ్పి న దేన్తి. వికీళనియం కరోన్తీతి ‘‘నిట్ఠితా కీళా’’తి తే భిన్దమానా కీళావిగమం కరోన్తి. తతియే భవనేత్తీతి భవరజ్జు. చతుత్థం ఉత్తానమేవ. పఞ్చమాదీసు చతూసు చత్తారి సచ్చాని కథితాని, ద్వీసు కిలేసప్పహానన్తి. దుతియాదీని.

పఠమో వగ్గో.

౨. దుతియవగ్గో

౧-౧౨. మారసుత్తాదివణ్ణనా

౧౭౦-౧౮౧. దుతియవగ్గస్స పఠమే మారో, మారోతి మరణం పుచ్ఛతి. యస్మా పన రూపాదివినిముత్తం మరణం నామ నత్థి, తేనస్స భగవా రూపం ఖో, రాధ, మారోతిఆదిమాహ. దుతియే మారధమ్మోతి మరణధమ్మో. ఏతేనుపాయేన సబ్బత్థ అత్థో వేదితబ్బోతి.

దుతియో వగ్గో.

౩-౪. ఆయాచనవగ్గాది

౧-౧౧. మారాదిసుత్తఏకాదసకవణ్ణనా

౧౮౨-౨౦౫. తతో పరం ఉత్తానత్థమేవ. అయఞ్హి రాధత్థేరో పటిభానియత్థేరో నామ. తథాగతస్స ఇమం థేరం దిస్వా సుఖుమం కారణం ఉపట్ఠాతి. తేనస్స భగవా నానానయేహి ధమ్మం దేసేతి. ఏవం ఇమస్మిం రాధసంయుత్తే ఆదితో ద్వే వగ్గా పుచ్ఛావసేన దేసితా, తతియో ఆయాచనేన, చతుత్థో ఉపనిసిన్నకకథావసేన. సకలమ్పి పనేతం రాధసంయుత్తం థేరస్స విముత్తిపరిపాచనీయధమ్మవసేనేవ గహితన్తి వేదితబ్బం.

రాధసంయుత్తవణ్ణనా నిట్ఠితా.