౧౨. ధమ్మకథికవగ్గో

౧-౨. అవిజ్జాసుత్తాదివణ్ణనా

౧౧౩-౧౧౪. ధమ్మకథికవగ్గస్స పఠమే ఏత్తావతా చ అవిజ్జాగతో హోతీతి యావతా ఇమాయ చతూసు సచ్చేసు అఞ్ఞాణభూతాయ అవిజ్జాయ సమన్నాగతో, ఏత్తావతా అవిజ్జాగతో హోతీతి అత్థో. దుతియేపి ఏసేవ నయో. పఠమదుతియాని.

౩. ధమ్మకథికసుత్తవణ్ణనా

౧౧౫. తతియే పఠమేన ధమ్మకథికో, దుతియేన సేఖభూమి, తతియేన అసేఖభూమీతి ఏవం ధమ్మకథికం పుచ్ఛితేన విసేసేత్వా ద్వే భూమియో కథితా. తతియం.

౪. దుతియధమ్మకథికసుత్తవణ్ణనా

౧౧౬. చతుత్థే తిస్సన్నమ్పి పుచ్ఛానం తీణి విస్సజ్జనాని కథితాని. చతుత్థం.

౫-౯. బన్ధనసుత్తాదివణ్ణనా

౧౧౭-౧౨౧. పఞ్చమే అతీరదస్సీతి తీరం వుచ్చతి వట్టం, తం న పస్సతి. అపారదస్సీతి పారం వుచ్చతి నిబ్బానం, తం న పస్సతి. బద్ధోతి కిలేసబన్ధనేన బద్ధో హుత్వా జీయతి చ మీయతి చ అస్మా లోకా పరం లోకం గచ్ఛతీతి. ఇమస్మిం సుత్తే వట్టదుక్ఖం కథితన్తి. ఛట్ఠాదీని ఉత్తానత్థానేవ. పఞ్చమాదీని.

౧౦. సీలవన్తసుత్తవణ్ణనా

౧౨౨. దసమే అనిచ్చతోతిఆదీసు హుత్వా అభావాకారేన అనిచ్చతో, పటిపీళనాకారేన దుక్ఖతో, ఆబాధట్ఠేన రోగతో, అన్తోదోసట్ఠేన గణ్డతో, తేసం తేసం గణ్డానం పచ్చయభావేన వా ఖణనట్ఠేన వా సల్లతో దుక్ఖట్ఠేన అఘతో, విసభాగమహాభూతసముట్ఠానఆబాధపచ్చయట్ఠేన ఆబాధతో, అసకట్ఠేన పరతో, పలుజ్జనట్ఠేన పలోకతో, సత్తసుఞ్ఞతట్ఠేన సుఞ్ఞతో, అత్తాభావేన అనత్తతో. ఏవమేత్థ ‘‘అనిచ్చతో పలోకతో’’తి ద్వీహి పదేహి అనిచ్చమనసికారో, ‘‘సుఞ్ఞతో అనత్తతో’’తి ద్వీహి అనత్తమనసికారో, సేసేహి దుక్ఖమనసికారో వుత్తోతి వేదితబ్బో. సేసమేత్థ ఉత్తానమేవ. దసమం.

౧౧. సుతవన్తసుత్తవణ్ణనా

౧౨౩. తథా ఏకాదసమే. దసమస్మిఞ్హి ‘‘సీలవతా’’తి చతుపారిసుద్ధిసీలం వుత్తం, ఇధ సుతవతాతి కమ్మట్ఠానసుతం ఇదమేవ నానాకరణం. ఏకాదసమం.

౧౨-౧౩. కప్పసుత్తాదివణ్ణనా

౧౨౪-౧౨౫. ద్వాదసమతేరసమాని రాహులోవాదసదిసానేవాతి. ద్వాదసమతేరసమాని.

ధమ్మకథికవగ్గో ద్వాదసమో.