౨. దుబ్బణ్ణియసుత్తవణ్ణనా

౨౬౮. దుతియే దుబ్బణ్ణోతి ఝామఖాణువణ్ణో. ఓకోటిమకోతి లకుణ్డకో మహోదరో. ఆసనేతి పణ్డుకమ్బలసిలాయం. కోధభక్ఖోతి సక్కేన గహితనామమేవేతం. సో పన ఏకో రూపావచరబ్రహ్మా, ‘‘సక్కో కిర ఖన్తిబలేన సమన్నాగతో’’తి సుత్వా వీమంసనత్థం ఆగతో. అవరుద్ధకయక్ఖా పన ఏవరూపం సంవిహితారక్ఖం ఠానం పవిసితుం న సక్కోన్తి. ఉపసఙ్కమీతి దేవానం సుత్వా ‘‘న సక్కా ఏస ఫరుసేన చాలేతుం, నీచవుత్తినా పన ఖన్తియం ఠితేన సక్కా పలాపేతు’’న్తి తథా పలాపేతుకామో ఉపసఙ్కమి. అన్తరధాయీతి ఖన్తియం ఠత్వా బలవచిత్తీకారం పచ్చుపట్ఠపేత్వా నీచవుత్తియా దస్సియమానాయ సక్కాసనే ఠాతుం అసక్కోన్తో అన్తరధాయి. న సూపహతచిత్తోమ్హీతి ఏత్థ సూతి నిపాతమత్తం, ఉపహతచిత్తోమ్హీతి ఆహ. నావత్తేన సువానయోతి న కోధావత్తేన సుఆనయో, కోధవసే వత్తేతుం న సుకరోమ్హీతి వదతి. న వో చిరాహన్తి వోతి నిపాతమత్తం, అహం చిరం న కుజ్ఝామీతి వదతి. దుతియం.