౮. నగరవిన్దేయ్యసుత్తవణ్ణనా

౪౩౫. ఏవం మే సుతన్తి నగరవిన్దేయ్యసుత్తం. తత్థ సమవిసమం చరన్తీతి కాలేన సమం చరన్తి, కాలేన విసమం. సమచరియమ్పి హేతన్తి సమచరియమ్పి హి ఏతం.

౪౩౭. కే ఆకారాతి కాని కారణాని? కే అన్వయాతి కా అనుబుద్ధియో? నత్థి ఖో పన తత్థాతి కస్మా ఆహ, నను అరఞ్ఞే హరితతిణచమ్పకవనాదివసేన అతిమనుఞ్ఞా రూపాదయో పఞ్చ కామగుణా అత్థీతి? నో నత్థి. న పనేతం వనసణ్డేన కథితం, ఇత్థిరూపాదీని పన సన్ధాయేతం కథితం. తాని హి పురిసస్స చిత్తం పరియాదాయ తిట్ఠన్తి. యథాహ – ‘‘నాహం, భిక్ఖవే, అఞ్ఞం ఏకరూపమ్పి సమనుపస్సామి, యం ఏవం పురిసస్స చిత్తం పరియాదాయ తిట్ఠతి, యథయిదం, భిక్ఖవే, ఇత్థిరూపం. ఇత్థిరూపం, భిక్ఖవే, పురిసస్స చిత్తం పరియాదాయ తిట్ఠతీ’’తి (అ. ని. ౧.౧) విత్థారేతబ్బం. సేసం సబ్బత్థ ఉత్తానమేవాతి.

పపఞ్చసూదనియా మజ్ఝిమనికాయట్ఠకథాయ

నగరవిన్దేయ్యసుత్తవణ్ణనా నిట్ఠితా.