౯. కాయగతాసతిసుత్తవణ్ణనా

౧౫౩-౪. ఏవం మే సుతన్తి కాయగతాసతిసుత్తం. తత్థ గేహసితాతి పఞ్చకామగుణనిస్సితా. సరసఙ్కప్పాతి ధావనసఙ్కప్పా. సరన్తీతి హి సరా, ధావన్తీతి అత్థో. అజ్ఝత్తమేవాతి గోచరజ్ఝత్తస్మింయేవ. కాయగతాసతిన్తి కాయపరిగ్గాహికమ్పి కాయారమ్మణమ్పి సతిం. కాయపరిగ్గాహికన్తి వుత్తే సమథో కథితో హోతి, కాయారమ్మణన్తి వుత్తే విపస్సనా. ఉభయేన సమథవిపస్సనా కథితా హోన్తి.

పున చపరం…పే… ఏవమ్పి, భిక్ఖవే, భిక్ఖు కాయగతాసతిం భావేతీతి సతిపట్ఠానే చుద్దసవిధేన కాయానుపస్సనా కథితా.

౧౫౬. అన్తోగధావాస్సాతి తస్స భిక్ఖునో భావనాయ అబ్భన్తరగతావ హోన్తి. విజ్జాభాగియాతి ఏత్థ సమ్పయోగవసేన విజ్జం భజన్తీతి విజ్జాభాగియా. విజ్జాభాగే విజ్జాకోట్ఠాసే వత్తన్తీతిపి విజ్జాభాగియా. తత్థ విపస్సనాఞాణం, మనోమయిద్ధి, ఛ అభిఞ్ఞాతి అట్ఠ విజ్జా. పురిమేన అత్థేన తాహి సమ్పయుత్తధమ్మాపి విజ్జాభాగియా. పచ్ఛిమేన అత్థేన తాసు యా కాచి ఏకా విజ్జా విజ్జా, సేసా విజ్జాభాగియాతి ఏవం విజ్జాపి విజ్జాయ సమ్పయుత్తా ధమ్మాపి విజ్జాభాగియాతేవ వేదితబ్బా. చేతసా ఫుటోతి ఏత్థ దువిధం ఫరణం ఆపోఫరణఞ్చ, దిబ్బచక్ఖుఫరణఞ్చ, తత్థ ఆపోకసిణం సమాపజ్జిత్వా ఆపేన ఫరణం ఆపోఫరణం నామ. ఏవం ఫుటేపి మహాసముద్దే సబ్బా సముద్దఙ్గమా కున్నదియో అన్తోగధావ హోన్తి, ఆలోకం పన వడ్ఢేత్వా దిబ్బచక్ఖునా సకలసముద్దస్స దస్సనం దిబ్బచక్ఖుఫరణం నామ. ఏవం ఫరణేపి మహాసముద్దే సబ్బా సముద్దఙ్గమా కున్నదియో అన్తోగధావ హోన్తి.

ఓతారన్తి వివరం ఛిద్దం. ఆరమ్మణన్తి కిలేసుప్పత్తిపచ్చయం. లభేథ ఓతారన్తి లభేయ్య పవేసనం, వినివిజ్ఝిత్వా యావ పరియోసానా గచ్ఛేయ్యాతి అత్థో. నిక్ఖేపనన్తి నిక్ఖిపనట్ఠానం.

౧౫౭. ఏవం అభావితకాయగతాసతిం పుగ్గలం అల్లమత్తికపుఞ్జాదీహి ఉపమేత్వా ఇదాని భావితకాయగతాసతిం సారఫలకాదీహి ఉపమేతుం సేయ్యథాపీతిఆదిమాహ. తత్థ అగ్గళఫలకన్తి కవాటం.

౧౫౮. కాకపేయ్యోతి ముఖవట్టియం నిసీదిత్వా కాకేన గీవం అనామేత్వావ పాతబ్బో. అభిఞ్ఞాసచ్ఛికరణీయస్సాతి అభిఞ్ఞాయ సచ్ఛికాతబ్బస్స. సక్ఖిభబ్బతం పాపుణాతీతి పచ్చక్ఖభావం పాపుణాతి. సతి సతి ఆయతనేతి సతిసతి కారణే. కిం పనేత్థ కారణన్తి? అభిఞ్ఞావ కారణం. ఆళిబన్ధాతి మరియాదబద్ధా.

యానీకతాయాతి యుత్తయానం వియ కతాయ. వత్థుకతాయాతి పతిట్ఠాకతాయ. అనుట్ఠితాయాతి అనుప్పవత్తితాయ. పరిచితాయాతి పరిచయకతాయ. సుసమారద్ధాయాతి సుట్ఠు సమారద్ధాయ సుసమ్పగ్గహితాయ. సేసం సబ్బత్థ ఉత్తానమేవాతి.

పపఞ్చసూదనియా మజ్ఝిమనికాయట్ఠకథాయ

కాయగతాసతిసుత్తవణ్ణనా నిట్ఠితా.