౧౭. పారాయనత్థుతిగాథానిద్దేసవణ్ణనా

౯౩. ఇతో పరం సఙ్గీతికారా దేసనం థోమేన్తా ‘‘ఇదమవోచ భగవా’’తిఆదిమాహంసు. తత్థ ఇదమవోచాతి ఇదం పారాయనం అవోచ. పరిచారకసోళసానన్తి బావరిస్స పరిచారకేన పిఙ్గియేన సహ సోళసానం, బుద్ధస్స వా భగవతో పరిచారకానం సోళసానన్తి పరిచారకసోళసానం. తే ఏవ చ బ్రాహ్మణా తత్థ సోళససు దిసాసు పురతో చ పచ్ఛతో చ వామపస్సతో చ దక్ఖిణపస్సతో చ ఛ ఛ యోజనా నిసిన్నా ఉజుకేన ద్వాదసయోజనికా అహోసి. అజ్ఝిట్ఠోతి యాచితో.

౯౪-౯౭. అత్థమఞ్ఞాయాతి పాళిఅత్థమఞ్ఞాయ. ధమ్మమఞ్ఞాయాతి పాళిమఞ్ఞాయ. పారాయనన్తి ఏవం ఇమస్స ధమ్మపరియాయస్స అధివచనం ఆరోపేత్వా తేసం బ్రాహ్మణానం నామాని కిత్తయన్తో ‘‘అజితో…పే… బుద్ధసేట్ఠముపాగము’’న్తి ఆహంసు. తత్థ సమ్పన్నచరణన్తి నిబ్బానపదట్ఠానభూతేన పాతిమోక్ఖసీలాదినా సమ్పన్నం. ఇసిన్తి మహేసిం.

నిద్దేసే ఉపాగమింసూతి సమీపం గమింసు. ఉపసఙ్కమింసూతి అవిదూరట్ఠానం గమింసు. పయిరుపాసింసూతి సమీపే నిసీదింసు. పరిపుచ్ఛింసూతి పరిపుచ్ఛం ఆహరింసు. పరిగణ్హింసూతి తులయింసు. ‘‘చోదయింసూ’’తి కేచి.

సీలాచారనిబ్బత్తీతి ఉత్తమసీలాచారనిబ్బత్తి, మగ్గేన నిప్ఫన్నసీలన్తి అత్థో.

గమ్భీరేతి ఉత్తానభావపటిక్ఖేపవచనం. దుద్దసేతి గమ్భీరత్తా దుద్దసే, దుక్ఖేన దట్ఠబ్బే, న సక్కా సుఖేన దట్ఠుం. దుద్దసత్తావ దురనుబోధే, దుక్ఖేన అవబుజ్ఝితబ్బే, న సక్కా సుఖేన అవబుజ్ఝితుం. సన్తేతి నిబ్బుతే. పణీతేతి అతప్పకే. ఇదం ద్వయం లోకుత్తరమేవ సన్ధాయ వుత్తం. అతక్కావచరేతి తక్కేన న అవచరితబ్బే న ఓగాహితబ్బే ఞాణేనేవ అవచరితబ్బే. నిపుణేతి సణ్హే. పణ్డితవేదనీయేతి సమ్మా పటిపన్నేహి పణ్డితేహి వేదితబ్బే.

౯౮. తోసేసీతి తుట్ఠిం ఆపాదేసి. వితోసేసీతి వివిధా తేసం సోమనస్సం ఉప్పాదేసి. పసాదేసీతి తేసం చిత్తప్పసాదం అకాసి. ఆరాధేసీతి ఆరాధయి సిద్ధిం పాపేసి. అత్తమనే అకాసీతి సోమనస్సవసేన సకమనే అకాసి.

౯౯. తతో పరం బ్రహ్మచరియమచరింసూతి మగ్గబ్రహ్మచరియం అచరింసు.

౧౦౧. తస్మా పారాయనన్తి తస్స పారభూతస్స నిబ్బానస్స ఆయతనన్తి వుత్తం హోతి.

సద్ధమ్మప్పజ్జోతికాయ చూళనిద్దేస-అట్ఠకథాయ

పారాయనత్థుతిగాథానిద్దేసవణ్ణనా నిట్ఠితా.