౮. నాగసమాలవగ్గో

౧. నాగసమాలత్థేరఅపదానవణ్ణనా

ఆపాటలిం అహం పుప్ఫన్తిఆదికం ఆయస్మతో నాగసమాలత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సిఖిస్స భగవతో కాలే ఏకస్మిం కులగేహే నిబ్బత్తో విఞ్ఞుతం పత్తో ఘరావాసం సణ్ఠపేత్వా తథారూపసజ్జనసంసగ్గస్స అలాభేన సత్థరి ధరమానకాలే దస్సనసవనపూజాకమ్మమకరిత్వా పరినిబ్బుతకాలే తస్స భగవతో సారీరికధాతుం నిదహిత్వా కతచేతియమ్హి చిత్తం పసాదేత్వా పాటలిపుప్ఫం పూజేత్వా సోమనస్సం ఉప్పాదేత్వా యావతాయుకం ఠత్వా తేనేవ సోమనస్సేన తతో కాలం కతో తుసితాదీసు ఛసు దేవలోకేసు సుఖమనుభవిత్వా అపరభాగే మనుస్సేసు మనుస్ససమ్పత్తిం అనుభవిత్వా ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో నాగరుక్ఖపల్లవకోమళసదిససరీరత్తా నాగసమాలోతి మాతాపితూహి కతనామధేయ్యో భగవతి పసన్నో పబ్బజిత్వా నచిరస్సేవ అరహా అహోసి.

౧. సో పచ్ఛా అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో ఆపాటలిం అహం పుప్ఫన్తిఆదిమాహ. తత్థ ఆపాటలిన్తి ఆ సమన్తతో, ఆదరేన వా పాటలిపుప్ఫం గహేత్వా అహం థూపమ్హి అభిరోపేసిం పూజేసిన్తి అత్థో. ఉజ్ఝితం సుమహాపథేతి సబ్బనగరవాసీనం వన్దనపూజనత్థాయ మహాపథే నగరమజ్ఝే వీథియం ఉజ్ఝితం ఉట్ఠాపితం, ఇట్ఠకకమ్మసుధాకమ్మాదీహి నిప్ఫాదితన్తి అత్థో. సేసం హేట్ఠా వుత్తనయత్తా ఉత్తానత్థత్తా చ సువిఞ్ఞేయ్యమేవాతి.

నాగసమాలత్థేరఅపదానవణ్ణనా సమత్తా.

౨. పదసఞ్ఞకత్థేరఅపదానవణ్ణనా

అక్కన్తఞ్చ పదం దిస్వాతిఆదికం ఆయస్మతో పదసఞ్ఞకత్థేరస్స అపదానం. అయమ్పి పురిమబుద్ధేసు కతాధికారో ఉప్పన్నుప్పన్నభవే వివట్టూపనిస్సయాని పుఞ్ఞాని ఉపచినన్తో తిస్సస్స భగవతో కాలే ఏకస్మిం సద్ధాసమ్పన్నే ఉపాసకగేహే నిబ్బత్తో విఞ్ఞుతం పత్తో రతనత్తయే పసన్నో భగవతా తస్స అనుకమ్పాయ దస్సితం పదచేతియం దిస్వా పసన్నో లోమహట్ఠజాతో వన్దనపూజనాదిబహుమానమకాసి. సో తేనేవ సుఖేత్తే సుకతేన పుఞ్ఞేన తతో చుతో సగ్గే నిబ్బత్తో తత్థ దిబ్బసుఖమనుభవిత్వా అపరభాగే మనుస్సేసు జాతో మనుస్ససమ్పత్తిం సబ్బమనుభవిత్వా ఇమస్మిం బుద్ధుప్పాదే విభవసమ్పన్నకులే నిబ్బత్తో వుద్ధిమన్వాయ సద్ధాజాతో పబ్బజిత్వా నచిరస్సేవ అరహా అహోసి, పురాకతపుఞ్ఞనామేన పదసఞ్ఞకత్థేరోతి పాకటో.

౫. సో ఏకదివసం అత్తనో పుబ్బకమ్మం సరిత్వా పుబ్బచరితాపదానం పకాసేన్తో అక్కన్తఞ్చ పదం దిస్వాతిఆదిమాహ. తత్థ అక్కన్తన్తి అక్కమితం దస్సితం. సబ్బబుద్ధానం సబ్బదా చతురఙ్గులోపరియేవ గమనం, అయం పన తస్స సద్ధాసమ్పన్నతం ఞత్వా ‘‘ఏసో ఇమం పస్సతూ’’తి పదచేతియం దస్సేసి, తస్మా సో తస్మిం పసీదిత్వా వన్దనపూజనాదిసక్కారమకాసీతి అత్థో. సేసం సబ్బత్థ ఉత్తానత్థమేవాతి.

పదసఞ్ఞకత్థేరఅపదానవణ్ణనా సమత్తా.

౩. బుద్ధసఞ్ఞకత్థేరఅపదానవణ్ణనా

దుమగ్గే పంసుకూలికన్తిఆదికం ఆయస్మతో బుద్ధసఞ్ఞకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో తిస్సస్స భగవతో కాలే ఏకస్మిం కులగేహే నిబ్బత్తో వుద్ధిప్పత్తో సద్ధాజాతో దుమగ్గే లగ్గితం భగవతో పంసుకూలచీవరం దిస్వా పసన్నమానసో ‘‘అరహద్ధజ’’న్తి చిన్తేత్వా వన్దనపూజనాదిసక్కారమకాసి. సో తేన పుఞ్ఞకమ్మేన దేవమనుస్ససమ్పత్తిమనుభవిత్వా ఇమస్మిం బుద్ధుప్పాదే విభవసమ్పన్నే ఏకస్మిం కులగేహే నిబ్బత్తో సద్ధాజాతో పబ్బజిత్వా నచిరస్సేవ అరహా అహోసి.

౯. సో పత్తఅరహత్తాధిగమో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో దుమగ్గే పంసుకూలికన్తిఆదిమాహ. తత్థ ధునాతి కమ్పతీతి దుమో. దుహతి పూరేతి ఆకాసతలన్తి వా దుమో, దుమస్స అగ్గో కోటీతి దుమగ్గో, తస్మిం దుమగ్గే. పంసుమివ పటిక్కూలభావం అమనుఞ్ఞభావం ఉలతి గచ్ఛతీతి పంసుకూలం, పంసుకూలమేవ పంసుకూలికం, సత్థునో పంసుకూలం దుమగ్గే లగ్గితం దిస్వా అహం అఞ్జలిం పగ్గహేత్వా తం పంసుకూలం అవన్దిం పణామమకాసిన్తి అత్థో. తన్తి నిపాతమత్తం. సేసం సబ్బత్థ ఉత్తానత్థమేవాతి.

బుద్ధసఞ్ఞకత్థేరఅపదానవణ్ణనా సమత్తా.

౪. భిసాలువదాయకత్థేరఅపదానవణ్ణనా

కాననం వనమోగ్గయ్హాతిఆదికం ఆయస్మతో భిసాలువదాయకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే హిమవన్తస్స సమీపే అరఞ్ఞావాసే వసన్తో వనమూలఫలాహారో వివేకవసేనాగతం విపస్సిం భగవన్తం దిస్వా పసన్నమానసో పఞ్చభిసాలువే అదాసి. భగవా తస్స చిత్తం పసాదేతుం పస్సన్తస్సేవ పరిభుఞ్జి. సో తేన చిత్తప్పసాదేన కాలం కత్వా తుసితాదీసు సమ్పత్తిమనుభవిత్వా పచ్ఛా మనుస్ససమ్పత్తిఞ్చ అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో విభవసమ్పత్తిం పత్తో తం పహాయ సాసనే పబ్బజితో నచిరస్సేవ అరహత్తం పాపుణి.

౧౩. సో తతో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో కాననం వనమోగ్గయ్హాతిఆదిమాహ. తం హేట్ఠా వుత్తత్థమేవ. వసామి విపినే అహన్తి వివేకవాసో అహం వసామీతి సమ్బన్ధో. సేసం ఉత్తానత్థమేవాతి.

భిసాలువదాయకత్థేరఅపదానవణ్ణనా సమత్తా.

ఛట్ఠభాణవారవణ్ణనా నిట్ఠితా.

౫. ఏకసఞ్ఞకత్థేరఅపదానవణ్ణనా

ఖణ్డో నామాసి నామేనాతిఆదికం ఆయస్మతో ఏకసఞ్ఞకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే కులగేహే నిబ్బత్తో విఞ్ఞుతం పత్తో రతనత్తయే పసన్నమానసో తస్స సత్థునో ఖణ్డం నామ అగ్గసావకం భిక్ఖాయ చరమానం దిస్వా సద్దహిత్వా పిణ్డపాతమదాసి. సో తేన పుఞ్ఞకమ్మేన దేవమనుస్ససమ్పత్తియో అనుభవిత్వా ఇమస్మిం బుద్ధుప్పాదే సావత్థియం ఏకస్మిం కులగేహే నిబ్బత్తో విఞ్ఞుతం పత్తో సత్థు ధమ్మదేసనం సుత్వా పటిలద్ధసద్ధో పబ్బజిత్వా నచిరస్సేవ అరహా అహోసి. సో ఏకదివసం పిణ్డపాతస్స సఞ్ఞం మనసికరిత్వా పటిలద్ధవిసేసత్తా ఏకసఞ్ఞకత్థేరోతి పాకటో.

౧౮. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో ఖణ్డో నామాసి నామేనాతిఆదిమాహ. తత్థ తస్స అగ్గసావకత్థేరస్స కిలేసానం ఖణ్డితత్తా ఖణ్డోతి నామం. సేసం సబ్బత్థ ఉత్తానమేవాతి.

ఏకసఞ్ఞకత్థేరఅపదానవణ్ణనా సమత్తా.

౬. తిణసన్థరదాయకత్థేరఅపదానవణ్ణనా

హిమవన్తస్సావిదూరేతిఆదికం ఆయస్మతో తిణసన్థరదాయకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో తిస్సస్స భగవతో కాలే ఏకస్మిం కులగేహే నిబ్బత్తో బుద్ధుప్పాదతో పగేవ ఉప్పన్నత్తా ఘరావాసం పహాయ తాపసపబ్బజ్జం పబ్బజిత్వా హిమవన్తస్స అవిదూరే ఏకం సరం నిస్సాయ పటివసతి. తస్మిం సమయే తిస్సో భగవా తస్సానుకమ్పాయ ఆకాసేన అగమాసి. అథ ఖో సో తాపసో ఆకాసతో ఓరుయ్హ ఠితం తం భగవన్తం దిస్వా పసన్నమానసో తిణం లాయిత్వా తిణసన్థరం కత్వా నిసీదాపేత్వా బహుమానాదరేన పఞ్చపతిట్ఠితేన వన్దిత్వా పటికుటికో హుత్వా పక్కామి. సో యావతాయుకం ఠత్వా తతో చవిత్వా దేవమనుస్సేసు సంసరన్తో అనేకవిధసమ్పత్తిం అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో వుద్ధిప్పత్తో సత్థరి పసీదిత్వా పబ్బజితో నచిరస్సేవ అరహా అహోసి.

౨౨. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో హిమవన్తస్సావిదూరేతిఆదిమాహ. తం హేట్ఠా వుత్తత్థమేవ. మహాజాతస్సరోతి ఏత్థ పన సరన్తి ఏత్థ పానీయత్థికా ద్విపదచతుప్పదాదయో సత్తాతి సరం, అథ వా సరన్తి ఏత్థ నదీకన్దరాదయోతి సరం, మహన్తో చ సో సయమేవ జాతత్తా సరో చేతి మహాజాతస్సరో. అనోతత్తఛద్దన్తదహాదయో వియ అపాకటనామత్తా ‘‘మహాజాతస్సరో’’తి వుత్తోతి దట్ఠబ్బో. సతపత్తేహి సఞ్ఛన్నోతి ఏకేకస్మిం పుప్ఫే సతసతపత్తానం వసేన సతపత్తో, సతపత్తసేతపదుమేహి సఞ్ఛన్నో గహనీభూతోతి అత్థో. నానాసకుణమాలయోతి అనేకే హంసకుక్కుటకుక్కుహదేణ్డిభాదయో ఏకతో కుణన్తి సద్దం కరోన్తీతి సకుణాతి లద్ధనామానం పక్ఖీనం ఆలయో ఆధారభూతోతి అత్థో. సేసం సబ్బత్థ ఉత్తానత్థమేవాతి.

తిణసన్థరదాయకత్థేరఅపదానవణ్ణనా సమత్తా.

౭. సూచిదాయకత్థేరఅపదానవణ్ణనా

తింసకప్పసహస్సమ్హీతిఆదికం ఆయస్మతో సూచిదాయకత్థేరస్స అపదానం. అయమ్పి పురిమజినవరేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సుమేధస్స భగవతో కాలే ఏకస్మిం కులగేహే నిబ్బత్తో వుద్ధిమన్వాయ భగవతో చీవరకమ్మం కాతుం పఞ్చ సూచియో అదాసి. సో తేన పుఞ్ఞేన దేవమనుస్సేసు పుఞ్ఞమనుభవిత్వా విచరన్తో ఉప్పన్నుప్పన్నభవే తిక్ఖపఞ్ఞో హుత్వా పాకటో ఇమస్మిం బుద్ధుప్పాదే ఏకస్మిం కులగేహే నిబ్బత్తో వుద్ధిమన్వాయ సత్థరి పసీదిత్వా పబ్బజన్తో తిక్ఖపఞ్ఞతాయ ఖురగ్గేయేవ అరహత్తం పాపుణి.

౩౦. సో అపరభాగే పుఞ్ఞం పచ్చవేక్ఖన్తో తం దిస్వా సోమనస్సజాతో పుబ్బచరితాపదానం పకాసేన్తో తింసకప్పసహస్సమ్హీతిఆదిమాహ. అన్తరన్తరం పనేత్థ సువిఞ్ఞేయ్యమేవ.

౩౧. పఞ్చసూచీ మయా దిన్నాతి ఏత్థ సూచతి ఛిద్దం కరోతి విజ్ఝతీతి సూచి, పఞ్చమత్తా సూచీ పఞ్చసూచీ మయా దిన్నాతి అత్థో. సేసం సువిఞ్ఞేయ్యమేవాతి.

సూచిదాయకత్థేరఅపదానవణ్ణనా సమత్తా.

౮. పాటలిపుప్ఫియత్థేరఅపదానవణ్ణనా

సువణ్ణవణ్ణం సమ్బుద్ధన్తిఆదికం ఆయస్మతో పాటలిపుప్ఫియత్థేరస్స అపదానం. అయమ్పి పురిమజినవరేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో తిస్సస్స భగవతో కాలే ఏకస్మిం కులగేహే సేట్ఠిపుత్తో హుత్వా నిబ్బత్తో వుద్ధిప్పత్తో కుసలాకుసలఞ్ఞూ సత్థరి పసీదిత్వా పాటలిపుప్ఫం గహేత్వా సత్థు పూజేసి. సో తేన పుఞ్ఞేన బహుధా సుఖసమ్పత్తియో అనుభవన్తో దేవమనుస్సేసు సంసరన్తో ఇమస్మిం బుద్ధుప్పాదే కులగేహే నిబ్బత్తో వుద్ధిమన్వాయ సత్థరి పసన్నో పబ్బజిత్వా నచిరస్సేవ అరహా అహోసి.

౩౬. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో సువణ్ణవణ్ణం సమ్బుద్ధన్తిఆదిమాహ. తత్థ అన్తరాపణేతి ఆ సమన్తతో హిరఞ్ఞసువణ్ణాదికం భణ్డం పణేన్తి విక్కిణన్తి పత్థరన్తి ఏత్థాతి ఆపణం, ఆపణస్స అన్తరం వీథీతి అన్తరాపణం, తస్మిం అన్తరాపణే. సువణ్ణవణ్ణం కఞ్చనగ్ఘియసంకాసం ద్వత్తింసవరలక్ఖణం సమ్బుద్ధం దిస్వా పాటలిపుప్ఫం పూజేసిన్తి అత్థో. సేసం సబ్బత్థ ఉత్తానత్థమేవాతి.

పాటలిపుప్ఫియత్థేరఅపదానవణ్ణనా సమత్తా.

౯. ఠితఞ్జలియత్థేరఅపదానవణ్ణనా

మిగలుద్దో పురే ఆసిన్తిఆదికం ఆయస్మతో ఠితఞ్జలియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థుప్పన్నభవే వివట్టూపనిస్సయాని పుఞ్ఞాని ఉపచినన్తో తిస్సస్స భగవతో కాలే పురాకతేన ఏకేన కమ్మచ్ఛిద్దేన నేసాదయోనియం నిబ్బత్తిత్వా విఞ్ఞుతం పత్తో మిగసూకరాదయో మారేత్వా నేసాదకమ్మేన అరఞ్ఞే వాసం కప్పేసి. తస్మిం సమయే తిస్సో భగవా తస్సానుకమ్పాయ హిమవన్తం అగమాసి. సో తం ద్వత్తింసవరలక్ఖణేహి అసీతానుబ్యఞ్జనబ్యామప్పభాహి చ జలమానం భగవన్తం దిస్వా సోమనస్సజాతో పణామం కత్వా గన్త్వా పణ్ణసన్థరే నిసీది. తస్మిం ఖణే దేవో గజ్జన్తో అసని పతి, తతో మరణసమయే బుద్ధమనుస్సరిత్వా పునఞ్జలిమకాసి. సో తేన పుఞ్ఞేన సుఖేత్తే కతకుసలత్తా అకుసలవిపాకం పటిబాహిత్వా సగ్గే నిబ్బత్తో కామావచరసమ్పత్తియో అనుభవిత్వా మనుస్సేసు మనుస్ససమ్పత్తియో చ అనుభవిత్వా అపరభాగే ఇమస్మిం బుద్ధుప్పాదే ఏకస్మిం కులగేహే నిబ్బత్తో వుద్ధిమన్వాయ పురాకతవాసనాయ సత్థరి పసీదిత్వా పబ్బజితో నచిరస్సేవ అరహా అహోసి.

౪౨. సో తతో పరం అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో మిగలుద్దో పురే ఆసిన్తిఆదిమాహ. తత్థ మిగలుద్దోతి మిగానం మారణం ఉపగచ్ఛతీతి మిగలుద్దో. మిగన్తి సీఘం వాతవేగేన గచ్ఛన్తి ధావన్తీతి మిగా, తేసం మిగానం మారణే లుద్దో దారుణో లోభీతి మిగలుద్దో. సో అహం పురే భగవతో దస్సనసమయే మిగలుద్దో ఆసిం అహోసిన్తి అత్థో. అరఞ్ఞే కాననేతి అరతి గచ్ఛతి మిగసమూహో ఏత్థాతి అరఞ్ఞం, అథ వా ఆ సమన్తతో రజ్జన్తి తత్థ వివేకాభిరతా బుద్ధపచ్చేకబుద్ధాదయో మహాసారప్పత్తా సప్పురిసాతి అరఞ్ఞం. కా కుచ్ఛితాకారేన వా భయానకాకారేన వా నదన్తి సద్దం కరోన్తి, ఆనన్తి విన్దన్తీతి వా కాననం, తస్మిం అరఞ్ఞే కాననే మిగలుద్దో పురే ఆసిన్తి సమ్బన్ధో. తత్థ అద్దసం సమ్బుద్ధన్తి తత్థ తస్మిం అరఞ్ఞే ఉపగతం సమ్బుద్ధం అద్దసం అద్దక్ఖిన్తి అత్థో. దస్సనం పురే అహోసి అవిదూరే, తస్మా మనోద్వారానుసారేన చక్ఖువిఞ్ఞాణం పురేచారికం కాయవిఞ్ఞాణసమఙ్గిం పాపేతి అప్పేతీతి అత్థో.

౪౪. తతో మే అసనీపాతోతి ఆ సమన్తతో సనన్తో గజ్జన్తో పతతీతి అసని, అసనియా పాతో పతనం అసనీపాతో, దేవదణ్డోతి అత్థో. సేసం సబ్బత్థ ఉత్తానత్థమేవాతి.

ఠితఞ్జలియత్థేరఅపదానవణ్ణనా సమత్తా.

౧౦. తిపదుమియత్థేరఅపదానవణ్ణనా

పదుముత్తరో నామ జినోతిఆదికం ఆయస్మతో తిపదుమియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే హంసవతియం మాలాకారకులగేహే నిబ్బత్తో వుద్ధిప్పత్తో మాలాకారకమ్మం కత్వా వసన్తో ఏకదివసం అనేకవిధాని జలజథలజపుప్ఫాని గహేత్వా రఞ్ఞో సన్తికం గన్తుకామో ఏవం చిన్తేసి – ‘‘రాజా ఇమాని తావ పుప్ఫాని దిస్వా పసన్నో సహస్సం వా ధనం గామాదికం వా దదేయ్య, లోకనాథం పన పూజేత్వా నిబ్బానామతధనం లభామి, కిం మే ఏతేసు సున్దర’’న్తి తేన ‘‘భగవన్తం పూజేత్వా సగ్గమోక్ఖసమ్పత్తియో నిప్ఫాదేతుం వట్టతీ’’తి చిన్తేత్వా వణ్ణవన్తం అతీవ రత్తపుప్ఫత్తయం గహేత్వా పూజేసి. తాని గన్త్వా ఆకాసం ఛాదేత్వా పత్థరిత్వా అట్ఠంసు. నగరవాసినో అచ్ఛరియబ్భుతచిత్తజాతా చేలుక్ఖేపసహస్సాని పవత్తయింసు. తం దిస్వా భగవా అనుమోదనం అకాసి. సో తేన పుఞ్ఞేన దేవమనుస్సేసు సమ్పత్తియో అనుభవిత్వా ఇమస్మిం బుద్ధుప్పాదే గహపతికులే నిబ్బత్తో వుద్ధిమన్వాయ సత్థరి పసీదిత్వా ధమ్మం సుత్వా పటిలద్ధసద్ధో పబ్బజిత్వా నచిరస్సేవ అరహా అహోసి.

౪౮. సో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పదుముత్తరో నామ జినోతిఆదిమాహ. తస్సత్థో హేట్ఠా వుత్తోవ. సబ్బధమ్మాన పారగూతి సబ్బేసం నవలోకుత్తరధమ్మానం పారం నిబ్బానం గతో పచ్చక్ఖం కతోతి అత్థో. దన్తో దన్తపరివుతోతి సయం కాయవాచాదీహి దన్తో ఏతదగ్గే ఠపితేహి సావకేహి పరివుతోతి అత్థో. సేసం సబ్బత్థ సమ్బన్ధవసేన ఉత్తానత్థమేవాతి.

తిపదుమియత్థేరఅపదానవణ్ణనా సమత్తా.

అట్ఠమవగ్గవణ్ణనా సమత్తా.