౯. ధమ్మచక్కికత్థేరఅపదానవణ్ణనా

సిద్ధత్థస్స భగవతోతిఆదికం ఆయస్మతో ధమ్మచక్కికత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సిద్ధత్థస్స భగవతో కాలే ఏకస్మిం కులగేహే నిబ్బత్తో వుద్ధిప్పత్తో పుత్తదారేహి వడ్ఢితో విభవసమ్పన్నో మహాభోగో, సో రతనత్తయే పసన్నో సద్ధాజాతో ధమ్మసభాయం ధమ్మాసనస్స పిట్ఠితో రతనమయం ధమ్మచక్కం కారేత్వా పూజేసి. సో తేన పుఞ్ఞకమ్మేన దేవమనుస్సేసు నిబ్బత్తట్ఠానేసు సక్కసమ్పత్తిం చక్కవత్తిసమ్పత్తిఞ్చ అనుభవిత్వా కమేన ఇమస్మిం బుద్ధుప్పాదే ఏకస్మిం కులగేహే ఉప్పన్నో విభవసమ్పన్నో సఞ్జాతసద్ధో పబ్బజిత్వా విపస్సనం వడ్ఢేత్వా నచిరస్సేవ అరహత్తం పత్వా పుబ్బే కతకుసలనామసదిసనామేన ధమ్మచక్కికత్థేరోతి పాకటో జాతో అహోసి.

౧౦౨. సో పుఞ్ఞసమ్భారానురూపేన పత్తఅరహత్తఫలో అత్తనో పుబ్బకమ్మం సరిత్వా జాతసోమనస్సో పుబ్బచరితాపదానం పకాసేన్తో సిద్ధత్థస్స భగవతోతిఆదిమాహ. సీహాసనస్స సమ్ముఖాతి సీహస్స భగవతో నిసిన్నస్స సమ్ముఖా బుద్ధాసనస్స అభిముఖట్ఠానేతి అత్థో, ధమ్మచక్కం మే ఠపితన్తి మయా ధమ్మచక్కాకారేన ఉభతో సీహరూపం దస్సేత్వా మజ్ఝే ఆదాససదిసం కారేత్వా కతం ధమ్మచక్కం ఠపితం పూజితం. కిం భూతం? విఞ్ఞూహి మేధావీహి ‘‘అతీవ సున్దర’’న్తి వణ్ణితం థోమితం సుకతం ధమ్మచక్కన్తి సమ్బన్ధో.

౧౦౩. చారువణ్ణోవ సోభామీతి సువణ్ణవణ్ణో ఇవ సోభామి విరోచామీతి అత్థో. ‘‘చతువణ్ణేహి సోభామీ’’తిపి పాఠో, తస్స ఖత్తియబ్రాహ్మణవేస్ససుద్దజాతిసఙ్ఖాతేహి చతూహి వణ్ణేహి సోభామి విరోచామీతి అత్థో. సయోగ్గబలవాహనోతి సువణ్ణసివికాదీహి యోగ్గేహి చ సేనాపతిమహామత్తాదీహి సేవకేహి బలేహి చ హత్థిఅస్సరథసఙ్ఖాతేహి వాహనేహి చ సహితోతి అత్థో. బహుజ్జనా బహవో మనుస్సా అనుయన్తా మమానువత్తన్తా నిచ్చం నిచ్చకాలం పరివారేన్తీతి సమ్బన్ధో. సేసం సువిఞ్ఞేయ్యమేవాతి.

ధమ్మచక్కికత్థేరఅపదానవణ్ణనా సమత్తా.