౫. మోఘరాజత్థేరఅపదానవణ్ణనా

అత్థదస్సీ తు భగవాతిఆదికం ఆయస్మతో మోఘరాజత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే కులగేహే నిబ్బత్తిత్వా విఞ్ఞుతం పత్తో ఏకదివసం సత్థు సన్తికే ధమ్మం సుణన్తో సత్థారం ఏకం భిక్ఖుం లూఖచీవరధరానం అగ్గట్ఠానే ఠపేన్తం దిస్వా తం ఠానన్తరం ఆకఙ్ఖన్తో పణిధానం కత్వా తత్థ తత్థ భవే పుఞ్ఞాని కరోన్తో అత్థదస్సిస్స భగవతో కాలే పున బ్రాహ్మణకులే నిబ్బత్తిత్వా బ్రాహ్మణానం విజ్జాసిప్పేసు నిప్ఫత్తిం గతో ఏకదివసం అత్థదస్సిం భగవన్తం భిక్ఖుసఙ్ఘపరివుతం రథియం గచ్ఛన్తం దిస్వా పసన్నమానసో పఞ్చపతిట్ఠితేన వన్దిత్వా సిరసి అఞ్జలిం కత్వా ‘‘యావతా రూపినో సత్థా’’తిఆదీహి ఛహి గాథాహి అభిత్థవిత్వా భాజనం పూరేత్వా మధుం ఉపనేసి. సత్థా తం పటిగ్గహేత్వా అనుమోదనం అకాసి. సో తేన పుఞ్ఞకమ్మేన దేవమనుస్సేసు సంసరన్తో కస్సపభగవతో కాలే కట్ఠవాహనస్స నామ రఞ్ఞో అమచ్చో హుత్వా నిబ్బత్తో తేన సత్థు ఆనయనత్థాయ పేసితో సత్థు సన్తికం గన్త్వా ధమ్మం సుత్వా పటిలద్ధసద్ధో పబ్బజిత్వా వీసతివస్ససహస్సాని సమణధమ్మం కత్వా తతో చుతో ఏకం బుద్ధన్తరం సుగతీసుయేవ పరివత్తేన్తో ఇమస్మిం బుద్ధుప్పాదే బ్రాహ్మణకులే నిబ్బత్తిత్వా మోఘరాజాతి లద్ధనామో బావరీయబ్రాహ్మణస్స సన్తికే ఉగ్గహితసిప్పో సంవేగజాతో తాపసపబ్బజ్జం పబ్బజిత్వా తాపససహస్సపరివారో అజితాదీహి సద్ధిం సత్థు సన్తికం పేసితో తేసం పన్నరసమో హుత్వా పఞ్హం పుచ్ఛిత్వా విస్సజ్జనపరియోసానే అరహత్తం పాపుణి. అరహత్తం పన పత్వా సత్థలూఖం సుత్తలూఖం రజనలూఖన్తి విసేసేన తివిధేనపి లూఖేన సమన్నాగతం పంసుకూలం ధారేసి. తేన నం సత్థా లూఖచీవరధరానం అగ్గట్ఠానే ఠపేసి.

౬౪. ఏవం సో పణిధానానురూపేన అరహత్తఫలం పత్వా అత్తనో పుబ్బసమ్భారం దిస్వా పుబ్బకమ్మాపదానం పకాసేన్తో అత్థదస్సీ తు భగవాతిఆదిమాహ. తం సబ్బం ఉత్తానత్థమేవ.

౭౩. పుటకం పూరయిత్వానాతి పుటకం వుచ్చతి వారకం, ఘటం వా. అనేళకం నిద్దోసం మక్ఖికణ్డవిరహితం ఖుద్దమధునా ఘటం పూరేత్వా తం ఉభోహి హత్థేహి పగ్గయ్హ పకారేన ఆదరేన గహేత్వా మహేసినో భగవతో ఉపనేసిన్తి సమ్బన్ధో. సేసం సువిఞ్ఞేయ్యమేవాతి.

మోఘరాజత్థేరఅపదానవణ్ణనా సమత్తా.