౧. సీహాసనదాయకత్థేరఅపదానవణ్ణనా

నిబ్బుతే లోకనాథమ్హీతిఆదికం ఆయస్మతో సీహాసనదాయకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే పుఞ్ఞాని ఉపచినన్తో సిద్ధత్థస్స భగవతో కాలే విభవసమ్పన్నే సద్ధాసమ్పన్నే ఏకస్మిం కులే నిబ్బత్తో, ధరమానే భగవతి దేవలోకే వసిత్వా నిబ్బుతే భగవతి ఉప్పన్నత్తా విఞ్ఞుతం పత్తో భగవతో సారీరికచేతియం దిస్వా ‘‘అహో మే అలాభా, భగవతో ధరమానే కాలే అసమ్పత్తో’’తి చిన్తేత్వా చేతియే చిత్తం పసాదేత్వా సోమనస్సజాతో సబ్బరతనమయం దేవతానిమ్మితసదిసం ధమ్మాసనే సీహాసనం కారేత్వా జీవమానకబుద్ధస్స వియ పూజేసి. తస్సుపరి గేహమ్పి దిబ్బవిమానమివ కారేసి, పాదట్ఠపనపాదపీఠమ్పి కారేసి. ఏవం యావజీవం దీపధూపపుప్ఫగన్ధాదీహి అనేకవిధం పూజం కత్వా తతో చుతో దేవలోకే నిబ్బత్తో ఛ కామసగ్గే అపరాపరం దిబ్బసమ్పత్తిం అనుభవిత్వా మనుస్సేసు చక్కవత్తిసమ్పత్తిం అనేకక్ఖత్తుం అనుభవిత్వా సఙ్ఖ్యాతిక్కన్తం పదేసరజ్జసమ్పత్తిఞ్చ అనుభవిత్వా కస్సపస్స భగవతో సాసనే పబ్బజిత్వా సమణధమ్మం కత్వా ఏత్థన్తరే దేవమనుస్సేసు సంసరన్తో ఇమస్మిం బుద్ధుప్పాదే ఏకస్మిం విభవసమ్పన్నే కులే నిబ్బత్తిత్వా విఞ్ఞుతం పత్తో సత్థు ధమ్మదేసనం సుత్వా పటిలద్ధసద్ధో పబ్బజిత్వా లద్ధూపసమ్పదో కమ్మట్ఠానం గహేత్వా ఘటేన్తో వాయమన్తో నచిరస్సేవ అరహత్తం పాపుణి.

౧. ఏవం పత్తఅరహత్తఫలో అత్తనో పుబ్బకమ్మం సరిత్వా సోమనస్సం ఉప్పాదేత్వా పుబ్బచరితాపదానం పకాసేన్తో నిబ్బుతే లోకనాథమ్హీతిఆదిమాహ. తత్థ లోకస్స నాథో పధానోతి లోకనాథో, లోకత్తయసామీతి అత్థో. లోకనాథే సిద్ధత్థమ్హి నిబ్బుతేతి సమ్బన్ధో. విత్థారితే పావచనేతి పావచనే పిటకత్తయే విత్థారితే పత్థటే పాకటేతి అత్థో. బాహుజఞ్ఞమ్హి సాసనేతి సిక్ఖత్తయసఙ్గహితే బుద్ధసాసనే అనేకసతసహస్సకోటిఖీణాసవసఙ్ఖాతేహి బహుజనేహి ఞాతే అధిగతేతి అత్థో.

౨-౩. పసన్నచిత్తో సుమనోతి తదా అహం బుద్ధస్స ధరమానకాలే అసమ్పత్తో నిబ్బుతే తస్మిం దేవలోకా చవిత్వా మనుస్సలోకం ఉపపన్నో తస్స భగవతో సారీరికధాతుచేతియం దిస్వా పసన్నచిత్తో సద్ధాసమ్పయుత్తమనో సున్దరమనో ‘‘అహో మమాగమనం స్వాగమన’’న్తి సఞ్జాతపసాదబహుమానో ‘‘మయా నిబ్బానాధిగమాయ ఏకం పుఞ్ఞం కాతుం వట్టతీ’’తి చిన్తేత్వా భగవతో చేతియసమీపే భగవన్తం ఉద్దిస్స హిరఞ్ఞసువణ్ణరతనాదీహి అలఙ్కరిత్వావ సీహాసనం అకాసి. తత్ర నిసిన్నస్స పాదట్ఠపనత్థాయ పాదపీఠఞ్చ కారేసి. సీహాసనస్స అతేమనత్థాయ తస్సుపరి ఘరఞ్చ కారేసి. తేన వుత్తం – ‘‘సీహాసనమకాసహం…పే… ఘరం తత్థ అకాసహ’’న్తి. తేన చిత్తప్పసాదేనాతి ధరమానస్స వియ భగవతో సీహాసనం మయా కతం, తేన చిత్తప్పసాదేన. తుసితం ఉపపజ్జహన్తి తుసితభవనే ఉపపజ్జిన్తి అత్థో.

౪. ఆయామేన చతుబ్బీసాతి తత్రుపపన్నస్స దేవభూతస్స సతో మయ్హం సుకతం పుఞ్ఞేన నిబ్బత్తితం పాతుభూతం ఆయామేన ఉచ్చతో చతుబ్బీసయోజనం విత్థారేన తిరియతో చతుద్దసయోజనం తావదేవ నిబ్బత్తిక్ఖణేయేవ ఆసి అహోసీతి అత్థో. సేసం సువిఞ్ఞేయ్యమేవ.

౯. చతున్నవుతే ఇతో కప్పేతి ఇతో కప్పతో చతునవుతే కప్పే యం కమ్మం అకరిం అకాసిం, తదా తతో పట్ఠాయ పుఞ్ఞబలేన కఞ్చి దుగ్గతిం నాభిజానామి, న అనుభూతపుబ్బా కాచి దుగ్గతీతి అత్థో.

౧౦. తేసత్తతిమ్హితో కప్పేతి ఇతో కప్పతో తేసత్తతికప్పే. ఇన్దనామా తయో జనాతి ఇన్దనామకా తయో చక్కవత్తిరాజానో ఏకస్మిం కప్పే తీసు జాతీసు ఇన్దో నామ చక్కవత్తీ రాజా అహోసిన్తి అత్థో. ద్వేసత్తతిమ్హితో కప్పేతి ఇతో ద్వేసత్తతికప్పే. సుమననామకా తయో జనా తిక్ఖత్తుం చక్కవత్తిరాజానో అహేసుం.

౧౧. సమసత్తతితో కప్పేతి ఇతో కప్పతో అనూనాధికే సత్తతిమే కప్పే వరుణనామకా వరుణో చక్కవత్తీతి ఏవంనామకా తయో చక్కవత్తిరాజానో చక్కరతనసమ్పన్నా చతుదీపమ్హి ఇస్సరా అహేసున్తి అత్థో. సేసం సువిఞ్ఞేయ్యమేవాతి.

సీహాసనదాయకత్థేరఅపదానవణ్ణనా సమత్తా.