౭. ఏకదీపియత్థేరఅపదానవణ్ణనా

పదుముత్తరస్స మునినోతిఆదికం ఆయస్మతో ఏకదీపియత్థేరస్స అపదానం. అయమ్పాయస్మా పురిమజినసేట్ఠేసు కతకుసలసమ్భారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే గహపతికులే నిబ్బత్తో వుద్ధిప్పత్తో సద్ధో పసన్నో భగవతో సలలమహాబోధిమ్హి ఏకపదీపం పూజేసి, థావరం కత్వా నిచ్చమేకపదీపపూజనత్థాయ తేలవట్టం పట్ఠపేసి. సో తేన పుఞ్ఞేన దేవమనుస్సేసు సంసరన్తో సబ్బత్థ జలమానో పసన్నచక్ఖుకో ఉభయసుఖమనుభవిత్వా ఇమస్మిం బుద్ధుప్పాదే సావత్థియం విభవసమ్పన్నే ఏకస్మిం కులే నిబ్బత్తో విఞ్ఞుతం పత్తో రతనత్తయే పసన్నో పబ్బజిత్వా నచిరస్సేవ అరహత్తం పత్తో దీపపూజాయ లద్ధవిసేసాధిగమత్తా ఏకదీపియత్థేరోతి పాకటో.

౩౦. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పదుముత్తరస్స మునినోతిఆదిమాహ. తం సబ్బం ఉత్తానత్థమేవాతి.

ఏకదీపియత్థేరఅపదానవణ్ణనా సమత్తా.