౮. నాగపుప్ఫియత్థేరఅపదానవణ్ణనా

సువచ్ఛో నామ నామేనాతిఆదికం ఆయస్మతో నాగపుప్ఫియత్థేరస్స అపదానం. అయమ్పి థేరో పురిమజిననిసభేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరభగవతో కాలే బ్రాహ్మణకులే నిబ్బత్తో వుద్ధిప్పత్తో వేదత్తయాదీసు సకసిప్పేసు నిప్ఫత్తిం పత్వా తత్థ సారం అదిస్వా హిమవన్తం పవిసిత్వా తాపసపబ్బజ్జం పబ్బజిత్వా ఝానసమాపత్తిసుఖేన వీతినామేసి. తస్మిం సమయే పదుముత్తరో భగవా తస్సానుకమ్పాయ తత్థ అగమాసి. సో తాపసో తం భగవన్తం దిస్వా లక్ఖణసత్థేసు ఛేకత్తా భగవతో లక్ఖణరూపసమ్పత్తియా పసన్నో వన్దిత్వా అఞ్జలిం పగ్గయ్హ అట్ఠాసి. ఆకాసతో అనోతిణ్ణత్తా పూజాసక్కారే అకతేయేవ ఆకాసేనేవ పక్కామి. అథ సో తాపసో ససిస్సో నాగపుప్ఫం ఓచినిత్వా తేన పుప్ఫేన భగవతో గతదిసాభాగమగ్గం పూజేసి.

౩౯. సో తేన పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవన్తో సబ్బత్థ పూజితో ఇమస్మిం బుద్ధుప్పాదే సావత్థియం కులగేహే నిబ్బత్తో వుద్ధిమన్వాయ సద్ధాసమ్పన్నో పబ్బజిత్వా వత్తపటిపత్తియా సాసనం సోభయమానో నచిరస్సేవ అరహా హుత్వా ‘‘కేన ను ఖో కుసలకమ్మేన మయా అయం లోకుత్తరసమ్పత్తి లద్ధా’’తి అతీతకమ్మం సరన్తో పుబ్బకమ్మం పచ్చక్ఖతో ఞత్వా సఞ్జాతసోమనస్సో పుబ్బచరితాపదానం పకాసేన్తో సువచ్ఛో నామ నామేనాతిఆదిమాహ. తత్థ వచ్ఛగోత్తే జాతత్తా వచ్ఛో, సున్దరో చ సో వచ్ఛో చేతి సువచ్ఛో. నామేన సువచ్ఛో నామ బ్రాహ్మణో మన్తపారగూ వేదత్తయాదిసకలమన్తసత్థే కోటిప్పత్తోతి అత్థో. సేసం హేట్ఠా వుత్తనయత్తా ఉత్తానత్థమేవాతి.

నాగపుప్ఫియత్థేరఅపదానవణ్ణనా సమత్తా.