౬. కదమ్బపుప్ఫియత్థేరఅపదానవణ్ణనా

హిమవన్తస్సావిదూరేతిఆదికం ఆయస్మతో కదమ్బపుప్ఫియత్థేరస్స అపదానం. అయమ్పి పురిమజినవరేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సమ్మాసమ్బుద్ధసుఞ్ఞే లోకే ఏకస్మిం కులే నిబ్బత్తో వుద్ధిమన్వాయ ఘరావాసం వసన్తో తత్థ ఆదీనవం దిస్వా ఘరావాసం పహాయ తాపసపబ్బజ్జం పబ్బజిత్వా హిమవన్తసమీపే కుక్కుటే నామ పబ్బతే అస్సమం కత్వా విహాసి. సో తత్థ సత్త పచ్చేకబుద్ధే దిస్వా పసన్నమానసో పుప్ఫితం కదమ్బపుప్ఫం ఓచినిత్వా తే పచ్చేకబుద్ధే పూజేసి. తేపి ‘‘ఇచ్ఛితం పత్థిత’’న్తిఆదినా అనుమోదనం అకంసు.

౩౦. సో తేన పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే సావత్థియం కులగేహే నిబ్బత్తో వుద్ధిమన్వాయ సత్థు ధమ్మదేసనం సుత్వా పటిలద్ధసద్ధో పబ్బజిత్వా నచిరస్సేవ అరహా హుత్వా పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో హిమవన్తస్సావిదూరేతిఆదిమాహ. తం వుత్తత్థమేవ. కుక్కుటో నామ పబ్బతోతి తస్స ఉభోసు పస్సేసు కుక్కుటచూళాకారేన పబ్బతకూటానం విజ్జమానత్తా కుక్కుటోతి సఙ్ఖం గతో. పకారేన తిరో హుత్వా పతిట్ఠహతీతి పబ్బతో. తమ్హి పబ్బతపాదమ్హీతి తస్మిం పబ్బతసమీపే. సత్త బుద్ధా వసన్తీతి సత్త పచ్చేకబుద్ధా తస్మిం కుక్కుటపబ్బతపాదే పణ్ణసాలాయం వసన్తీతి అత్థో.

౩౧. దీపరాజంవ ఉగ్గతన్తి దీపానం రాజా దీపరాజా, సబ్బేసం దీపానం జలమానానం తారకానం రాజా చన్దోతి అత్థో. అథ వా సబ్బేసు జమ్బుదీపపుబ్బవిదేహఅపరగోయానఉత్తరకురుసఙ్ఖాతేసు చతూసు దీపేసు ద్విసహస్సపరిత్తదీపేసు చ రాజా ఆలోకఫరణతో చన్దో దీపరాజాతి వుచ్చతి, తం నభే ఉగ్గతం చన్దం ఇవ పుప్ఫితం ఫుల్లితం కదమ్బరుక్ఖం దిస్వా తతో పుప్ఫం ఓచినిత్వా ఉభోహి హత్థేహి పగ్గయ్హ పకారేన గహేత్వా సత్త పచ్చేకబుద్ధే సమోకిరిం సుట్ఠు ఓకిరిం, ఆదరేన పూజేసిన్తి అత్థో. సేసం ఉత్తానత్థమేవాతి.

కదమ్బపుప్ఫియత్థేరఅపదానవణ్ణనా సమత్తా.