౫. ఉమాపుప్ఫియత్థేరఅపదానవణ్ణనా

నిబ్బుతే లోకమహితేతిఆదికం ఆయస్మతో ఉమాపుప్ఫియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో సిద్ధత్థస్స భగవతో కాలే కులగేహే నిబ్బత్తో వుద్ధిప్పత్తో ఘరావాసం సణ్ఠపేత్వా వసన్తో నిబ్బుతస్స భగవతో చేతియమహే వత్తమానే ఇన్దనీలమణివణ్ణం ఉమాపుప్ఫం గహేత్వా పూజేసి. సో తేన పుఞ్ఞేన సుగతీసుయేవ సంసరన్తో దిబ్బమానుససమ్పత్తియో అనుభవిత్వా ఉప్పన్నుప్పన్నభవే బహులం నీలవణ్ణో జాతిసమ్పన్నో విభవసమ్పన్నో అహోసి. సో ఇమస్మిం బుద్ధుప్పాదే విభవసమ్పన్నే ఏకస్మిం కులగేహే నిబ్బత్తో విఞ్ఞుతం పత్వా సద్ధాజాతో పబ్బజితో నచిరస్సేవ అరహత్తం పాపుణి.

౨౧. సో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో నిబ్బుతే లోకమహితేతిఆది వుత్తం. తత్థ లోకమహితేతి లోకేహి మహితో పూజితోతి లోకమహితో, తస్మిం లోకమహితే సిద్ధత్థమ్హి భగవతి పరినిబ్బుతేతి సమ్బన్ధో. ఆహుతీనంపటిగ్గహేతి ఆహుతినో వుచ్చన్తి పూజాసక్కారా, తేసం ఆహుతీనం పటిగ్గహేతుం అరహతీతి ఆహుతీనంపటిగ్గహో, అలుత్తకితన్తసమాసో, తస్మిం ఆహుతీనంపటిగ్గహే భగవతి పరినిబ్బుతేతి అత్థో.

౨౨. ఉమాపుప్ఫన్తి ఉద్ధముద్ధం నీలపభం ముఞ్చమానం పుప్ఫతి వికసతీతి ఉమాపుప్ఫం, తం ఉమాపుప్ఫం గహేత్వా చేతియే పూజం అకాసిన్తి అత్థో. సేసం ఉత్తానత్థమేవాతి.

ఉమాపుప్ఫియత్థేరఅపదానవణ్ణనా సమత్తా.