౧౩. సేరేయ్యవగ్గో

౧. సేరేయ్యకత్థేరఅపదానవణ్ణనా

అజ్ఝాయకో మన్తధరోతిఆదికం ఆయస్మతో సేరేయ్యకత్థేరస్స అపదానం. అయమ్పి పురిమజినవరేసు కతాధికారో తతో పరేసు అత్తభావసహస్సేసు వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే బ్రాహ్మణకులే నిబ్బత్తో విఞ్ఞుతం పత్వా తిణ్ణం వేదానం పారం గన్త్వా ఇతిహాసాదిసకలబ్రాహ్మణధమ్మేసు కోటిప్పత్తో ఏకస్మిం దివసే అబ్భోకాసే సపరివారో ఠితో భగవన్తం దిస్వా పసన్నమానసో సేరేయ్యపుప్ఫం గహేత్వా ఆకాసే ఖిపన్తో పూజేసి. తాని పుప్ఫాని ఆకాసే వితానం హుత్వా సత్తాహం ఠత్వా పచ్ఛా అన్తరధాయింసు. సో తం అచ్ఛరియం దిస్వా అతీవ పసన్నమానసో తేనేవ పీతిసోమనస్సేన కాలం కత్వా తుసితాదీసు నిబ్బత్తో తత్థ దిబ్బసుఖమనుభవిత్వా తతో మనుస్ససుఖమనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో విఞ్ఞుతం పాపుణిత్వా పుబ్బవాసనాబలేన సత్థరి పసన్నో పబ్బజిత్వా నచిరస్సేవ అరహా అహోసి.

౧. సో అపరభాగే పురాకతకుసలం సరిత్వా సోమనస్సజాతో పుబ్బచరితాపదానం పకాసేన్తో అజ్ఝాయకో మన్తధరోతిఆదిమాహ. తం హేట్ఠా వుత్తత్థమేవ.

౩. సేరేయ్యకం గహేత్వానాతి సిరిసే భవం జాతిపుప్ఫం సేరేయ్యం, సేరేయ్యమేవ సేరేయ్యకం, తం సేరేయ్యకం గహేత్వానాతి సమ్బన్ధో. భగవతి పసన్నో జాతిసుమనమకుళచమ్పకాదీని పుప్ఫాని పతిట్ఠపేత్వా పూజేతుం కాలం నత్థితాయ తత్థ సమ్పత్తం తం సేరేయ్యకం పుప్ఫం గహేత్వా పూజేసిన్తి అత్థో. సేసం సబ్బత్థ ఉత్తానమేవాతి.

సేరేయ్యకత్థేరఅపదానవణ్ణనా సమత్తా.

౨. పుప్ఫథూపియత్థేరఅపదానవణ్ణనా

హిమవన్తస్సావిదూరేతిఆదికం ఆయస్మతో పుప్ఫథూపియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిబుద్ధస్స భగవతో కాలే బ్రాహ్మణకులే నిబ్బత్తో విఞ్ఞుతం పత్వా సకసిప్పే నిప్ఫత్తిం పత్తో తత్థ సారం అపస్సన్తో గేహం పహాయ హిమవన్తం పవిసిత్వా అత్తనా సహగతేహి పఞ్చసిస్ససహస్సేహి సద్ధిం పఞ్చాభిఞ్ఞా అట్ఠ సమాపత్తియో నిబ్బత్తేత్వా కుక్కురనామపబ్బతసమీపే పణ్ణసాలం కారేత్వా పటివసతి. తదా బుద్ధుప్పాదభావం సుత్వా సిస్సేహి సహ బుద్ధస్స సన్తికం గన్తుకామో కేనచి బ్యాధినా పీళితో పణ్ణసాలం పవిసిత్వా సిస్ససన్తికా బుద్ధస్సానుభావం లక్ఖణఞ్చ సుత్వా పసన్నమానసో హిమవన్తతో చమ్పకాసోకతిలకకేటకాద్యనేకే పుప్ఫే ఆహరాపేత్వా థూపం కత్వా బుద్ధం వియ పూజేత్వా కాలం కత్వా బ్రహ్మలోకూపగో అహోసి. అథ తే సిస్సా తస్స ఆళహనం కత్వా బుద్ధసన్తికం గన్త్వా తం పవత్తిం ఆరోచేసుం. అథ భగవా బుద్ధచక్ఖునా ఓలోకేత్వా అనాగతంసఞాణేన పాకటీకరణమకాసి. సో అపరభాగే ఇమస్మిం బుద్ధుప్పాదే సావత్థియం కులగేహే నిబ్బత్తో విఞ్ఞుతం పత్తో పుబ్బవాసనాబలేన సత్థరి పసన్నో పబ్బజిత్వా నచిరస్సేవ అరహా అహోసి.

౧౦. అథ సో అత్తనో పుబ్బకుసలం సరిత్వా సోమనస్సజాతో పుబ్బచరితాపదానం పకాసేన్తో హిమవన్తస్సావిదూరేతిఆదిమాహ. తం హేట్ఠా వుత్తత్థమేవ. కుక్కురో నామ పబ్బతోతి పబ్బతస్స సిఖరం కుక్కురాకారేన సునఖాకారేన సణ్ఠితత్తా ‘‘కుక్కురపబ్బతో’’తి సఙ్ఖ్యం గతో, తస్స సమీపే పణ్ణసాలం కత్వా పఞ్చతాపససహస్సేహి సహ వసమానోతి అత్థో. నయానుసారేన సేసం సబ్బం ఉత్తానత్థమేవాతి.

పుప్ఫథూపియత్థేరఅపదానవణ్ణనా సమత్తా.

౩. పాయసదాయకత్థేరఅపదానవణ్ణనా

సువణ్ణవణ్ణో సమ్బుద్ధోతిఆదికం ఆయస్మతో పాయసదాయకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే ఏకస్మిం విభవసమ్పన్నే కులగేహే నిబ్బత్తో విఞ్ఞుతం పత్వా ఘరావాసం వసన్తో హత్థిఅస్సధనధఞ్ఞసత్తరతనాదివిభవసమ్పన్నో సద్ధాసమ్పన్నో కమ్మఫలం సద్దహిత్వా సహస్సమత్తా సువణ్ణపాతియో కారేత్వా తస్మిం ఖీరపాయససహస్సస్స పూరేత్వా తా సబ్బా గాహాపేత్వా సిమ్బలివనం అగమాసి. తస్మిం సమయే విపస్సీ భగవా ఛబ్బణ్ణరంసియో విస్సజ్జేత్వా ఆకాసే చఙ్కమం మాపేత్వా చఙ్కమతి. సో పన సేట్ఠి తం అచ్ఛరియం దిస్వా అతీవ పసన్నో పాతియో ఠపేత్వా వన్దిత్వా ఆరోచేసి పటిగ్గహణాయ. అథ భగవా అనుకమ్పం ఉపాదాయ పటిగ్గహేసి, పటిగ్గహేత్వా చ పన తస్స సోమనుస్సుప్పాదనత్థం సహస్సమత్తేహి భిక్ఖుసఙ్ఘేహి సద్ధిం పరిభుఞ్జి, తదవసేసం అనేకసహస్సభిక్ఖూ పరిభుఞ్జింసు. సో తేన పుఞ్ఞేన సుగతీసుయేవ సంసరన్తో ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో సద్ధాజాతో పబ్బజిత్వా నచిరస్సేవ అరహా అహోసి.

౨౬. సో అపరభాగే అత్తనో కుసలం పచ్చవేక్ఖమానో తం సరిత్వా సోమనస్సజాతో పుబ్బచరితాపదానం పకాసేన్తో సువణ్ణవణ్ణో సమ్బుద్ధోతిఆదిమాహ. తం హేట్ఠా వుత్తమేవ.

౨౮. చఙ్కమం సుసమారూళ్హోతి చదినన్తో పదవిక్ఖేపం కరోన్తో కమతి గచ్ఛతీతి చఙ్కమం, చఙ్కమస్స పదవిక్ఖేపస్స ఆధారభూతపథవిపదేసో చఙ్కమం నామాతి అత్థో, ఏతం చఙ్కమంసు విసేసేన ఆరూళ్హోతి సమ్బన్ధో. అమ్బరే అనిలాయనేతి వరీయతి ఛాదియతి అనేనాతి వరం, న బరన్తి అమ్బరం, సేతవత్థసదిసం ఆకాసన్తి అత్థో. నత్థి నిలీయనం గోపనం ఏత్థాతి అనిలం, ఆ సమన్తతో యన్తి గచ్ఛన్తి అనేన ఇద్ధిమన్తోతి ఆయనం, అనిలఞ్చ తం ఆయనఞ్చేతి అనిలాయనం, తస్మిం అమ్బరే అనిలాయనే చఙ్కమం మాపయిన్తి అత్థో. సేసం సబ్బత్థ ఉత్తానమేవాతి.

పాయసదాయకత్థేరఅపదానవణ్ణనా సమత్తా.

౪. గన్ధోదకియత్థేరఅపదానవణ్ణనా

నిసజ్జ పాసాదవరేతిఆదికం ఆయస్మతో గన్ధోదకియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే నిబ్బానూపనిస్సయాని పుఞ్ఞాని ఉపచినన్తో విపస్సీభగవతో కాలే సేట్ఠికులే నిబ్బత్తో విఞ్ఞుతం పత్వా మహద్ధనో మహాభోగో దిబ్బసుఖమనుభవన్తో వియ మనుస్ససుఖమనుభవన్తో ఏకస్మిం దివసే పాసాదవరే నిసిన్నో హోతి. తదా భగవా సువణ్ణమహామేరు వియ వీథియా విచరతి, తం విచరమానం భగవన్తం దిస్వా పసన్నమానసో గన్త్వా వన్దిత్వా సుగన్ధోదకేన భగవన్తం ఓసిఞ్చమానో పూజేసి. సో తేన పుఞ్ఞేన దేవమనుస్సేసు సంసరన్తో ఇమస్మిం బుద్ధుప్పాదే ఏకస్మిం కులగేహే నిబ్బత్తో విఞ్ఞుతం పత్తో ఘరావాసేన అనల్లీనో సత్థు సన్తికే పబ్బజిత్వా కమ్మట్ఠానం గహేత్వా విపస్సనం వడ్ఢేత్వా నచిరస్సేవ అరహా అహోసి.

౩౫. సో అపరభాగే అత్తనో పుబ్బకుసలం సరిత్వా సోమనస్సజాతో పుబ్బచరితాపదానం పకాసేన్తో నిసజ్జ పాసాదవరేతిఆదిమాహ. తత్థ పాసాదోతి పసాదం సోమనస్సం జనేతి ఉప్పాదేతీతి పాసాదో, మాలాకమ్మచిత్తకమ్మసువణ్ణకమ్మాద్యనేకవిచిత్తం దిస్వా తత్థ పవిట్ఠానం జనానం పసాదం జనయతీతి అత్థో. పాసాదో చ సో పత్థేతబ్బట్ఠేన వరో చాతి పాసాదవరో, తస్మిం పాసాదవరే నిసజ్జ నిసీదిత్వా విపస్సిం జినవరం అద్దసన్తి సమ్బన్ధో. సేసం సబ్బత్థ ఉత్తానమేవాతి.

గన్ధోదకియత్థేరఅపదానవణ్ణనా సమత్తా.

౫. సమ్ముఖాథవికత్థేరఅపదానవణ్ణనా

జాయమానే విపస్సిమ్హీతిఆదికం ఆయస్మతో సమ్ముఖాథవికత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే బ్రాహ్మణకులే నిబ్బత్తో సత్తవస్సికకాలేయేవ సకసిప్పే నిప్ఫత్తిం పత్తో ఘరావాసం సణ్ఠపేత్వా వసన్తో విపస్సిమ్హి బోధిసత్తే ఉప్పన్నే సబ్బబుద్ధానం లక్ఖణాని వేదత్తయే దిస్సమానాని తాని రాజప్పముఖస్స జనకాయస్స విపస్సీబోధిసత్తస్స లక్ఖణఞ్చ బుద్ధభావఞ్చ బ్యాకరిత్వా జనానం మానసం నిబ్బాపేసి, అనేకాని చ థుతివచనాని నివేదేసి. సో తేన కుసలకమ్మేన ఛ కామావచరసమ్పత్తియో అనుభవిత్వా మనుస్సేసు చ చక్కవత్తిసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో సద్ధాజాతో పబ్బజిత్వా నచిరస్సేవ అరహా అహోసి. కతకుసలనామేన సమ్ముఖాథవికత్థేరోతి పాకటో.

౪౧. సో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో జాయమానే విపస్సిమ్హీతిఆదిమాహ. విపస్సిమ్హి సమ్మాసమ్బుద్ధే జాయమానే ఉప్పజ్జమానే మాతుకుచ్ఛితో నిక్ఖన్తే అహం పాతుభూతం నిమిత్తం కారణం బుద్ధభావస్స హేతుం బ్యాకరిం కథేసిం, అనేకాని అచ్ఛరియాని పాకటాని అకాసిన్తి అత్థో. సేసం వుత్తనయానుసారేన సువిఞ్ఞేయ్యమేవాతి.

సమ్ముఖాథవికత్థేరఅపదానవణ్ణనా సమత్తా.

౬. కుసుమాసనియత్థేరఅపదానవణ్ణనా

నగరే ధఞ్ఞవతియాతిఆదికం ఆయస్మతో కుసుమాసనియత్థేరస్స అపదానం. అయమ్పి పురిమజినవరేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే బ్రాహ్మణకులే నిబ్బత్తో విఞ్ఞుతం పత్తో మహద్ధనో మహాభోగో తిణ్ణం వేదానం పారం గతో బ్రాహ్మణసిప్పేసు కోటిప్పత్తో సకపరసమయకుసలో మాతాపితరో పూజేతుకామో పఞ్చ ఉప్పలకలాపే అత్తనో సమీపే ఠపేత్వా నిసిన్నో భిక్ఖుసఙ్ఘపరివుతం విపస్సిం భగవన్తం ఆగచ్ఛన్తం దిస్వా నీలపీతాదిఘనబుద్ధరస్మియో చ దిస్వా పసన్నమానసో ఆసనం పఞ్ఞాపేత్వా తత్థ తాని పుప్ఫాని సన్థరిత్వా భగవన్తం తత్థ నిసీదాపేత్వా సకఘరే మాతు అత్థాయ పటియత్తాని సబ్బాని ఖాదనీయభోజనీయాని గహేత్వా సపరివారం భగవన్తం సహత్థేన సన్తప్పేన్తో భోజేసి. భోజనావసానే ఏకం ఉప్పలహత్థం అదాసి. తేన సోమనస్సజాతో పత్థనం అకాసి. భగవాపి అనుమోదనం కత్వా పకామి. సో తేన పుఞ్ఞేన దేవమనుస్సేసు ద్వే సమ్పత్తియో అనుభవిత్వా ఇమస్మిం బుద్ధుప్పాదే సావత్థియం విభవసమ్పన్నే ఏకస్మిం కులే నిబ్బత్తో విఞ్ఞుతం పత్తో భోగయసేహి వడ్ఢితో కామేసు ఆదీనవం దిస్వా ఘరావాసం పహాయ పబ్బజితో నచిరస్సేవ అరహా అహోసి.

౬౫. సో అపరభాగే పుబ్బే కతకుసలం పుబ్బేనివాసఞాణేన సరిత్వా సోమనస్సప్పత్తో పుబ్బచరితాపదానం పకాసేన్తో నగరే ధఞ్ఞవతియాతిఆదిమాహ. ధఞ్ఞానం పుఞ్ఞవన్తానం ఖత్తియబ్రాహ్మణగహపతిమహాసాలానం అనేకేసం కులానం ఆకరత్తా ధఞ్ఞవతీ, అథ వా ముత్తామణిఆదిసత్తరతనానం సత్తవిధధఞ్ఞానం ఉపభోగపరిభోగానం ఆకరత్తా ధఞ్ఞవతీ, అథ వా ధఞ్ఞానం బుద్ధపచ్చేకబుద్ధఖీణాసవానం వసనట్ఠానం ఆరామవిహారాదీనం ఆకరత్తా ధఞ్ఞవతీ, తస్సా ధఞ్ఞవతియా. నగరన్తి పత్థేన్తి ఏత్థ ఉపభోగపరిభోగత్థికా జనాతి నగరం, న గచ్ఛతీతి వా నగం, రాజయువరాజమహామత్తాదీనం వసనట్ఠానం. నగం రాతి ఆదదాతి గణ్హాతీతి నగరం, రాజాదీనం వసనట్ఠానసమూహభూతం పాకారపరిఖాదీహి పరిక్ఖిత్తం పరిచ్ఛిన్నట్ఠానం నగరం నామాతి అత్థో. నగరే యదా అహం విపస్సిస్స భగవతో సన్తికే బ్యాకరణం అలభిం, తదా తస్మిం ధఞ్ఞవతియా నగరే బ్రాహ్మణో అహోసిన్తి సమ్బన్ధో. సేసం సబ్బత్థ ఉత్తానమేవాతి.

కుసుమాసనియత్థేరఅపదానవణ్ణనా సమత్తా.

౭. ఫలదాయకత్థేరఅపదానవణ్ణనా

అజ్ఝాయకో మన్తధరోతిఆదికం ఆయస్మతో ఫలదాయకత్థేరస్స అపదానం. అయమ్పి పురిమబుద్ధేసు కతాధికారో అనేకేసు భవేసు వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే బ్రాహ్మణకులే నిబ్బత్తో విఞ్ఞుతం పత్వా వేదత్తయాదిసకసిప్పేసు పారప్పత్తో అనేకేసం బ్రాహ్మణసహస్సానిం పామోక్ఖో ఆచరియో సకసిప్పానం పరియోసానం అదిస్వా తత్థ చ సారం అపస్సన్తో ఘరావాసం పహాయ ఇసిపబ్బజ్జం పబ్బజిత్వా హిమవన్తస్స అవిదూరే అస్సమం కారేత్వా సహ సిస్సేహి వాసం కప్పేసి, తస్మిం సమయే పదుముత్తరో భగవా భిక్ఖాయ చరమానో తస్సానుకమ్పాయ తం పదేసం సమ్పాపుణి. తాపసో భగవన్తం దిస్వా పసన్నమానసో అత్తనో అత్థాయ పుటకే నిక్ఖిపిత్వా రుక్ఖగ్గే లగ్గితాని మధురాని పదుమఫలాని మధునా సహ అదాసి. భగవా తస్స సోమనస్సుప్పాదనత్థం పస్సన్తస్సేవ పరిభుఞ్జిత్వా ఆకాసే ఠితో ఫలదానానిసంసం కథేత్వా పక్కామి.

౭౫. సో తేన పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే విభవసమ్పన్నే ఏకస్మిం కులగేహే నిబ్బత్తో సత్తవస్సికోయేవ అరహత్తం పత్వా పుబ్బే కతకుసలకమ్మం సరిత్వా సోమనస్సజాతో పుబ్బచరితాపదానం పకాసేన్తో అజ్ఝాయకో మన్తధరోతిఆదిమాహ. తత్థ అజ్ఝేతి చిన్తేతీతి అజ్ఝాయి, అజ్ఝాయియేవ అజ్ఝాయకో. ఏత్థ హి అకారో ‘‘పటిసేధే వుద్ధితబ్భావే…పే… అకారో విరహప్పకే’’తి ఏవం వుత్తేసు దససు అత్థేసు తబ్భావే వత్తతి. సిస్సానం సవనధారణాదివసేన హితం అజ్ఝేతి చిన్తేతి సజ్ఝాయం కరోతీతి అజ్ఝాయకో, చిన్తకోతి అత్థో. ఆచరియస్స సన్తికే ఉగ్గహితం సబ్బం మన్తం మనేన ధారేతి పవత్తేతీతి మన్తధరో. తిణ్ణం వేదాన పారగూతి వేదం వుచ్చతి ఞాణం, వేదేన వేదితబ్బా బుజ్ఝితబ్బాతి వేదా, ఇరువేదయజువేదసామవేదసఙ్ఖాతా తయో గన్థా, తేసం వేదానం పారం పరియోసానం కోటిం గతో పత్తోతి పారగూ. సేసం పాకటమేవాతి

ఫలదాయకత్థేరఅపదానవణ్ణనా సమత్తా.

౮. ఞాణసఞ్ఞికత్థేరఅపదానవణ్ణనా

పబ్బతే హిమవన్తమ్హీతిఆదికం ఆయస్మతో ఞాణసఞ్ఞికత్థేరస్స అపదానం. అయమ్పి పురిమబుద్ధేసు కతాధికారో తస్మిం తస్మిం ఉప్పన్నుప్పన్నే భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే కులగేహే నిబ్బత్తో వుద్ధిప్పత్తో ఘరావాసం పహాయ తాపసపబ్బజ్జం పబ్బజిత్వా హిమవన్తస్స అవిదూరే పబ్బతన్తరే పణ్ణసాలం కారేత్వా పఞ్చాభిఞ్ఞాఅట్ఠసమాపత్తియో నిబ్బత్తేత్వా వసన్తో ఏకదివసం పరిసుద్ధం పణ్డరం పులినతలం దిస్వా ‘‘ఈదిసా పరిసుద్ధా బుద్ధా, ఈదిసంవ పరిసుద్ధం బుద్ధఞాణ’’న్తి బుద్ధఞ్చ తస్స ఞాణఞ్చ అనుస్సరి థోమేసి చ.

౮౪. సో తేన పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో విఞ్ఞుతం పత్వా సాసనే పబ్బజిత్వా నచిరస్సేవ అరహత్తం పత్తో పుబ్బే కతపుఞ్ఞం అనుస్సరిత్వా సోమనస్సజాతో పుబ్బచరితాపదానం పకాసేన్తో ‘‘పబ్బతే హిమవన్తమ్హీ’’తిఆదిమాహ. పులినం సోభనం దిస్వాతి పరిపుణ్ణకతం వియ పులాకారేన పరిసోధితాకారేన పవత్తం ఠితన్తి పులినం, సోభనం వాలుకం దిస్వా సేట్ఠం బుద్ధం అనుస్సరిన్తి అత్థో. సేసం సువిఞ్ఞేయ్యమేవాతి.

ఞాణసఞ్ఞికత్థేరఅపదానవణ్ణనా సమత్తా.

౯. గణ్ఠిపుప్ఫియత్థేరఅపదానవణ్ణనా

సువణ్ణవణ్ణో సమ్బుద్ధోతిఆదికం ఆయస్మతో గణ్ఠిపుప్ఫియత్థేరస్స అపదానం. అయమ్పి పురిమబుద్ధేసు కతాధికారో అనేకాసు జాతీసు కతపుఞ్ఞసఞ్చయో విపస్సిస్స భగవతో కాలే ఏకస్మిం కులగేహే నిబ్బత్తో ఉపభోగపరిభోగేహి అనూనో ఏకదివసం విపస్సిం భగవన్తం సగణం దిస్వా పసన్నమానసో లాజాపఞ్చమేహి పుప్ఫేహి పూజేసి. సో తేనేవ చిత్తప్పసాదేన యావతాయుకం ఠత్వా తతో దేవలోకే నిబ్బత్తో దిబ్బసమ్పత్తిం అనుభవిత్వా అపరభాగే మనుస్సేసు మనుస్ససమ్పత్తిం అనుభవిత్వా ఇమస్మిం బుద్ధుప్పాదే ఏకస్మిం కులగేహే నిబ్బత్తో సద్ధాజాతో పబ్బజిత్వా నచిరస్సేవ అరహత్తం పాపుణి.

౯౧. సో ఏకదివసం పుబ్బే కతపుఞ్ఞం సరిత్వా సోమనస్సజాతో ‘‘ఇమినా కుసలేనాహం నిబ్బానం పత్తో’’తి పుబ్బచరితాపదానం పకాసేన్తో సువణ్ణవణ్ణో సమ్బుద్ధోతిఆదిమాహ. తం సబ్బం హేట్ఠా వుత్తనయత్తా ఉత్తానత్థమేవాతి.

గణ్ఠిపుప్ఫియత్థేరఅపదానవణ్ణనా సమత్తా.

౧౦. పదుమపూజకత్థేరఅపదానవణ్ణనా

హిమవన్తస్సావిదూరేతిఆదికం ఆయస్మతో పదుమపూజకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే బ్రాహ్మణకులే నిబ్బత్తో విఞ్ఞుతం పత్వా సకసిప్పే నిప్ఫత్తిం పత్వా తత్థ సారం అపస్సన్తో బుద్ధుప్పత్తితో పురేతరం ఉప్పన్నత్తా ఓవాదానుసాసనం అలభిత్వా ఘరావాసం పహాయ ఇసిపబ్బజ్జం పబ్బజిత్వా హిమవన్తస్స అవిదూరే గోతమకం నామ పబ్బతం నిస్సాయ అస్సమం కారేత్వా పఞ్చాభిఞ్ఞా అట్ఠ సమాపత్తియో నిబ్బత్తేత్వా ఝానసుఖేనేవ విహాసి. తదా పదుముత్తరో భగవా బుద్ధో హుత్వా సత్తే సంసారతో ఉద్ధరన్తో తస్సానుకమ్పాయ హిమవన్తం అగమాసి. తాపసో భగవన్తం దిస్వా పసన్నమానసో సకసిస్సే సమానేత్వా తేహి పదుమపుప్ఫాని ఆహరాపేత్వా పూజేసి. సో తేన పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే సావత్థియం కులగేహే నిబ్బత్తో సద్ధో పసన్నో పబ్బజిత్వా నచిరస్సేవ అరహా అహోసి.

౯౭. సో అత్తనో పుఞ్ఞకమ్మం సరిత్వా సోమనస్సజాతో పుబ్బచరితాపదానం పకాసేన్తో హిమవన్తస్సావిదూరేతిఆదిమాహ. గోతమో నామ పబ్బతోతి అనేకేసం యక్ఖదేవతానం ఆవాసభావేన అధిట్ఠానవసేన గోతమస్స భవనత్తా గోతమోతి పాకటో అహోసి. పవత్తతి తిట్ఠతీతి పబ్బతో. నాగరుక్ఖేహి సఞ్ఛన్నోతి రుహతి తిట్ఠతీతి రుక్ఖో. అథ వా పథవిం ఖనన్తో ఉద్ధం రుహతీతి రుక్ఖో, నానా అనేకప్పకారా చమ్పకకప్పూరనాగఅగరుచన్దనాదయో రుక్ఖాతి నానారుక్ఖా, తేహి నానారుక్ఖేహి సఞ్ఛన్నో పరికిణ్ణో గోతమో పబ్బతోతి సమ్బన్ధో. మహాభూతగణాలయోతి భవన్తి జాయన్తి ఉప్పజ్జన్తి వడ్ఢన్తి చాతి భూతా, మహన్తా చ తే భూతా చాతి మహాభూతా, మహాభూతానం గణో సమూహోతి మహాభూతగణో, మహాభూతగణస్స ఆలయో పతిట్ఠాతి మహాభూతగణాలయో.

౯౮. వేమజ్ఝమ్హి చ తస్సాసీతి తస్స గోతమస్స పబ్బతస్స వేమజ్ఝే అబ్భన్తరే అస్సమో అభినిమ్మితో నిప్ఫాదితో కతోతి అత్థో. సేసం ఉత్తానమేవాతి.

పదుమపూజకత్థేరఅపదానవణ్ణనా సమత్తా.

తేరసమవగ్గవణ్ణనా సమత్తా.