౧౨. మహాపరివారవగ్గో
౧. మహాపరివారకత్థేరఅపదానవణ్ణనా
విపస్సీ నామ భగవాతిఆదికం ఆయస్మతో మహాపరివారకత్థేరస్స అపదానం. అయమ్పి పురిమజినవరేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో ఉప్పన్నసమయే యక్ఖయోనియం నిబ్బత్తో అనేకయక్ఖసతసహస్సపరివారో ఏకస్మిం ఖుద్దకదీపే దిబ్బసుఖమనుభవన్తో విహరతి. తస్మిఞ్చ దీపే చేతియాభిసోభితో విహారో అత్థి, తత్థ భగవా అగమాసి. అథ సో యక్ఖసేనాధిపతి తం భగవన్తం తత్థ గతభావం దిస్వా దిబ్బవత్థాని గహేత్వా గన్త్వా భగవన్తం వన్దిత్వా దిబ్బవత్థేహి పూజేసి, సపరివారో సరణమగమాసి. సో తేన పుఞ్ఞకమ్మేన తతో చుతో దేవలోకే నిబ్బత్తిత్వా తత్థ ఛ కామావచరసుఖమనుభవిత్వా తతో చుతో మనుస్సేసు అగ్గచక్కవత్తిఆదిసుఖమనుభవిత్వా అపరభాగే ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో సత్థరి పసీదిత్వా పబ్బజితో నచిరస్సేవ అరహా అహోసి.
౧-౨. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో విపస్సీ నామ భగవాతిఆదిమాహ. తత్థ విసేసం పరమత్థం నిబ్బానం పస్సతీతి విపస్సీ, వివిధే సతిపట్ఠానాదయో సత్తతింసబోధిపక్ఖియధమ్మే పస్సతీతి వా విపస్సీ, వివిధే అనేకప్పకారే బోధనేయ్యసత్తే విసుం విసుం పస్సతీతి వా విపస్సీ, సో విపస్సీ భగవా దీపచేతియం దీపే పూజనీయట్ఠానం విహారమగమాసీతి అత్థో. సేసం సబ్బత్థ ఉత్తానమేవాతి.
మహాపరివారకత్థేరఅపదానవణ్ణనా సమత్తా.
౨. సుమఙ్గలత్థేరఅపదానవణ్ణనా
అత్థదస్సీ జినవరోతిఆదికం ఆయస్మతో సుమఙ్గలత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో అత్థదస్సిస్స భగవతో కాలే ఏకస్మిం తళాకసమీపే రుక్ఖదేవతా హుత్వా నిబ్బత్తి. తస్మిం సమయే భగవా విహారతో నిక్ఖమిత్వా నహాయితుకామో తస్స తళాకస్స తీరం గన్త్వా తత్థ న్హత్వా ఏకచీవరో జలమానో బ్రహ్మా వియ సూరియో వియ సువణ్ణబిమ్బం వియ అట్ఠాసి. అథ సో దేవపుత్తో సోమనస్సజాతో పఞ్జలికో థోమనమకాసి, అత్తనో దిబ్బగీతతూరియేహి ఉపహారఞ్చ అకాసి. సో తేన పుఞ్ఞకమ్మేన దేవమనుస్సేసు సమ్పత్తియో అనుభవిత్వా అపరభాగే ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో సత్థరి పసీదిత్వా పబ్బజిత్వా నచిరస్సేవ అరహా అహోసి.
౧౧. సో పచ్ఛా పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో అత్థదస్సీ జినవరోతిఆదిమాహ. తత్థ పరమత్థం నిబ్బానం దక్ఖతి పస్సతీతి అత్థదస్సీ, అథ వా సబ్బసత్తానం చతురారియసచ్చసఙ్ఖాతం అత్థపయోజనం దస్సనసీలోతి అత్థదస్సీ, కిలేసే అజిని జినాతి జినిస్సతీతి జినో. వరితబ్బో పత్థేతబ్బో సబ్బసత్తేహీతి వరో, అత్థదస్సీ జినో చ సో వరో చాతి అత్థదస్సీ జినవరో. లోకజేట్ఠోతి లుజ్జతి పలుజ్జతీతి లోకో, లోకీయతి పస్సీయతి బుద్ధాదీహి పారప్పత్తోతి వా లోకో, లోకో చ లోకో చ లోకో చాతి లోకో. ఏకసేససమాసవసేన ‘‘లోకా’’తి వత్తబ్బే ‘‘లోకో’’తి వుత్తో. లోకస్స జేట్ఠో లోకజేట్ఠో, సో లోకజేట్ఠో నరాసభోతి అత్థో. సేసం సబ్బత్థ ఉత్తానమేవాతి.
సుమఙ్గలత్థేరఅపదానవణ్ణనా సమత్తా.
౩. సరణగమనియత్థేరఅపదానవణ్ణనా
ఉభిన్నం దేవరాజూనన్త్యాదికం ఆయస్మతో సరణగమనియత్థేరస్స అపదానం. అయమ్పి పురిమబుద్ధేసు కతాధికారో ఉప్పన్నుప్పన్నభవే వివట్టూపనిస్సయాని పుఞ్ఞాని ఉపచినన్తో పదుముత్తరే భగవతి ఉప్పన్నే అయం హిమవన్తే దేవరాజా హుత్వా నిబ్బత్తి, తస్మిం అపరేన యక్ఖదేవరఞ్ఞా సద్ధిం సఙ్గామత్థాయ ఉపట్ఠితే ద్వే అనేకయక్ఖసహస్సపరివారా ఫలకావుధాదిహత్థా సఙ్గామత్థాయ సముపబ్యూళ్హా అహేసుం. తదా పదుముత్తరో భగవా తేసు సత్తేసు కారుఞ్ఞం ఉప్పాదేత్వా ఆకాసేన తత్థ గన్త్వా సపరివారానం ద్విన్నం దేవరాజూనం ధమ్మం దేసేసి. తదా తే సబ్బే ఫలకావుధాని ఛడ్డేత్వా భగవన్తం గారవబహుమానేన వన్దిత్వా సరణమగమంసు. తేసం అయం పఠమం సరణమగమాసి. సో తేన పుఞ్ఞేన దేవమనుస్సేసు సంసరన్తో ఉభయసమ్పత్తియో అనుభవిత్వా ఇమస్మిం బుద్ధుప్పాదే కులగేహే నిబ్బత్తో వుద్ధిమన్వాయ సత్థరి పసన్నో పబ్బజిత్వా నచిరస్సేవ అరహా అహోసి.
౨౦. సో అపరభాగే పుబ్బకుసలం సరిత్వా సోమనస్సజాతో పుబ్బచరితాపదానం పకాసేన్తో ఉభిన్నం దేవరాజూనన్తిఆదిమాహ. తత్థ సుచిలోమఖరలోమఆళవకకుమ్భీరకువేరాదయో వియ నామగోత్తేన అపాకటా ద్వే యక్ఖరాజానో అఞ్ఞాపదేసేన దస్సేన్తో ‘‘ఉభిన్నం దేవరాజూన’’న్తిఆదిమాహ. సఙ్గామో సముపట్ఠితోతి సం సుట్ఠు గామో కలహత్థాయ ఉపగమనన్తి సఙ్గామో, సో సఙ్గామో సం సుట్ఠు ఉపట్ఠితో, ఏకట్ఠానే ఉపగన్త్వా ఠితోతి అత్థో. అహోసి సముపబ్యూళ్హోతి సం సుట్ఠు ఉపసమీపే రాసిభూతోతి అత్థో.
౨౧. సంవేజేసి మహాజనన్తి తేసం రాసిభూతానం యక్ఖానం ఆకాసే నిసిన్నో భగవా చతుసచ్చధమ్మదేసనాయ సం సుట్ఠు వేజేసి, ఆదీనవదస్సనేన గణ్హాపేసి విఞ్ఞాపేసి బోధేసీతి అత్థో. సేసం సబ్బత్థ ఉత్తానమేవాతి.
సరణగమనియత్థేరఅపదానవణ్ణనా సమత్తా.
౪. ఏకాసనియత్థేరఅపదానవణ్ణనా
వరుణో నామ నామేనాతిఆదికం ఆయస్మతో ఏకాసనియత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో అత్థదస్సిస్స భగవతో కాలే వరుణో నామ దేవరాజా హుత్వా నిబ్బత్తి. సో భగవన్తం దిస్వా పసన్నమానసో గన్ధమాలాదీహి గీతవాదితేహి చ ఉపట్ఠయమానో సపరివారో పూజేసి. తతో అపరభాగే భగవతి పరినిబ్బుతే తస్స మహాబోధిరుక్ఖం బుద్ధదస్సనం వియ సబ్బతూరియతాళావచరేహి సపరివారో ఉపహారమకాసి. సో తేన పుఞ్ఞేన తతో కాలఙ్కత్వా నిమ్మానరతిదేవలోకే ఉప్పజ్జి. ఏవం దేవసమ్పత్తిమనుభవిత్వా మనుస్సేసు చ మనుస్సభూతో చక్కవత్తిసమ్పత్తిం అనుభవిత్వా ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్వా సత్థు సాసనే పబ్బజిత్వా నచిరస్సేవ అరహా అహోసి.
౩౧. సో పచ్ఛా సకకమ్మం సరిత్వా తం తథతో ఞత్వా సోమనస్సజాతో పుబ్బచరితాపదానం పకాసేన్తో వరుణో నామ నామేనాతిఆదిమాహ. తత్థ యదా అహం సమ్బోధనత్థాయ బుద్ధం బోధిఞ్చ పూజేసిం, తదా వరుణో నామ దేవరాజా అహోసిన్తి సమ్బన్ధో.
౩౪. ధరణీరుహపాదపన్తి ఏత్థ రుక్ఖలతాపబ్బతసత్థరతనాదయో ధారేతీతి ధరణీ, తస్మిం రుహతి పతిట్ఠహతీతి ధరణీరుహో. పాదేన పివతీతి పాదపో, సిఞ్చితసిఞ్చితోదకం పాదేన మూలేన పివతి రుక్ఖక్ఖన్ధసాఖావిటపేహి ఆపోరసం పత్థరియతీతి అత్థో, తం ధరణీరుహపాదపం బోధిరుక్ఖన్తి సమ్బన్ధో.
౩౫. సకకమ్మాభిరద్ధోతి అత్తనో కుసలకమ్మేన అభిరద్ధో పసన్నో ఉత్తమే బోధిమ్హి పసన్నోతి సమ్బన్ధో. సేసం సబ్బత్థ ఉత్తానమేవాతి.
ఏకాసనియత్థేరఅపదానవణ్ణనా సమత్తా.
౫. సువణ్ణపుప్ఫియత్థేరఅపదానవణ్ణనా
విపస్సీ నామ భగవాతిఆదికం ఆయస్మతో సువణ్ణపుప్ఫియత్థేరస్స అపదానం. అయమ్పి పురిమజినవరేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే ఏకస్మిం ఠానే భూమట్ఠకదేవపుత్తో హుత్వా నిబ్బత్తో తస్స భగవతో ధమ్మం సుత్వా పసన్నమానసో చతూహి సువణ్ణపుప్ఫేహి పూజేసి. తాని పుప్ఫాని ఆకాసే సువణ్ణవితానం హుత్వా ఛాదేసుం, సువణ్ణపభా చ బుద్ధస్స సరీరపభా చ ఏకతో హుత్వా మహాఓభాసో అహోసి. సో అతిరేకతరం పసన్నో సకభవనం గతోపి సరతియేవ. సో తేన పుఞ్ఞకమ్మేన తుసితభవనాదిసుగతీసుయేవ సంసరన్తో దిబ్బసమ్పత్తిం అనుభవిత్వా ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో సత్థు ధమ్మదేసనం సుత్వా సాసనే ఉరం దత్వా పబ్బజితో నచిరస్సేవ అరహా అహోసి.
౪౦. సో అపరభాగే పుబ్బకమ్మం సరిత్వా సోమనస్సజాతో అత్తనో పుబ్బచరితాపదానం పకాసేన్తో విపస్సీ నామ భగవాతిఆదిమాహ. తం హేట్ఠా వుత్తత్థమేవ.
౪౪. పామోజ్జం జనయిత్వానాతి బలవపీతిం ఉప్పాదేత్వా ‘‘పామోజ్జం ఆమోదనా పమోదనా హాసో పహాసో విత్తి ఓదగ్యం అత్తమనతా చిత్తస్సా’’తిఆదీసు (ధ. స. ౯, ౮౬; మహాని. ౧) వియ అత్తమనతా సకభావం ఉప్పాదేత్వాతి అత్థో. సేసం సబ్బత్థ ఉత్తానమేవాతి.
సువణ్ణపుప్ఫియత్థేరఅపదానవణ్ణనా సమత్తా.
౬. చితకపూజకత్థేరఅపదానవణ్ణనా
వసామి రాజాయతనేతిఆదికం ఆయస్మతో చితకపూజకత్థేరస్స అపదానం. అయమ్పి పురిమబుద్ధేసు కతాధికారో తతో పరం ఉప్పన్నుప్పన్నభవే వివట్టూపనిస్సయాని పుఞ్ఞాని ఉపచినన్తో సిఖిస్స భగవతో కాలే రాజాయతనరుక్ఖదేవతా హుత్వా నిబ్బత్తో అన్తరన్తరా దేవతాహి సద్ధిం ధమ్మం సుత్వా పసన్నో భగవతి పరినిబ్బుతే సపరివారో గన్ధదీపధూపపుప్ఫభేరిఆదీని గాహాపేత్వా భగవతో ఆళహనట్ఠానం గన్త్వా దీపాదీని పూజేత్వా అనేకేహి తూరియేహి అనేకేహి వాదితేహి తం పూజేసి. తతో పట్ఠాయ సకభవనం ఉపవిట్ఠోపి భగవన్తమేవ సరిత్వా సమ్ముఖా వియ వన్దతి. సో తేనేవ పుఞ్ఞేన తేన చిత్తప్పసాదేన రాజాయతనతో కాలం కతో తుసితాదీసు నిబ్బత్తో దిబ్బసమ్పత్తిం అనుభవిత్వా తతో మనుస్సేసు మనుస్ససమ్పత్తిం అనుభవిత్వా ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో భగవతి ఉప్పన్నచిత్తప్పసాదో భగవతో సాసనే పబ్బజిత్వా నచిరస్సేవ అరహా అహోసి.
౪౯. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో వసామి రాజాయతనేతిఆదిమాహ. రాజాయతనేతి దేవరాజూనం ఆయతనం రాజాయతనం, తస్స రుక్ఖస్స నామధేయ్యో వా. పరినిబ్బుతే భగవతీతి పరిసమన్తతో కిఞ్చి అనవసేసేత్వా ఖన్ధపరినిబ్బానకాలే పరినిబ్బానసమయే పరినిబ్బానప్పత్తస్స సిఖినో లోకబన్ధునోతి సమ్బన్ధో.
౫౦. చితకం అగమాసహన్తి చన్దనాగరుదేవదారుకప్పూరతక్కోలాదిసుగన్ధదారూహి చితం రాసిగతన్తి చితం, చితమేవ చితకం, బుద్ధగారవేన చితకం పూజనత్థాయ చితకస్స సమీపం అహం అగమాసిన్తి అత్థో. తత్థ గన్త్వా కతకిచ్చం దస్సేన్తో తూరియం తత్థ వాదేత్వాతిఆదిమాహ. తం సబ్బం సువిఞ్ఞేయ్యమేవాతి.
చితకపూజకత్థేరఅపదానవణ్ణనా సమత్తా.
౭. బుద్ధసఞ్ఞకత్థేరఅపదానవణ్ణనా
యదా విపస్సీ లోకగ్గోతిఆదికం ఆయస్మతో బుద్ధసఞ్ఞకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే ఏకస్మిం భూమట్ఠకవిమానే దేవపుత్తో హుత్వా నిబ్బత్తి. తదా విపస్సీ భగవా ఆయుసఙ్ఖారం వోస్సజ్జి. అథ సకలదససహస్సిలోకధాతు ససాగరపబ్బతా పకమ్పిత్థ. తదా తస్స దేవపుత్తస్స భవనమ్పి కమ్పిత్థ. తస్మిం ఖణే సో దేవపుత్తో సంసయజాతో – ‘‘కిం ను ఖో పథవీకమ్పాయ నిబ్బత్తీ’’తి చిన్తేత్వా బుద్ధస్స ఆయుసఙ్ఖారవోస్సజ్జభావం ఞత్వా మహాసోకం దోమనస్సం ఉప్పాదేసి. తదా వేస్సవణో మహారాజా ఆగన్త్వా ‘‘మా చిన్తయిత్థా’’తి అస్సాసేసి. సో దేవపుత్తో తతో చుతో తేన పుఞ్ఞేన దేవమనుస్సేసు సంసరన్తో ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో ఘరావాసం పహాయ పబ్బజిత్వా నచిరస్సేవ అరహా అహోసి.
౫౭. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో యదా విపస్సీ లోకగ్గోతిఆదిమాహ. ఆయుసఙ్ఖారమోస్సజ్జీతి ఆ సమన్తతో యునోతి పాలేతి సత్తేతి ఆయు, ఆయుస్స సఙ్ఖారో రాసిభావో ఆయుసఙ్ఖారో, తం ఆయుసఙ్ఖారం ఓస్సజ్జి పరిచ్చజి జహాసీతి అత్థో. తస్మిం ఆయుసఙ్ఖారవోస్సజ్జనే. జలమేఖలాసాగరోదకమేఖలాసహితా సకలదససహస్సచక్కవాళపథవీ కమ్పిత్థాతి సమ్బన్ధో.
౫౮. ఓతతం విత్థతం మయ్హన్తి మయ్హం భవనం ఓతతం విత్థతం చిత్తం విచిత్తం సుచి సుపరిసుద్ధం చిత్తం అనేకేహి సత్తహి రతనేహి విచిత్తం సోభమానం పకమ్పిత్థ పకారేన కమ్పిత్థాతి అత్థో. సేసం సబ్బత్థ ఉత్తానమేవాతి.
బుద్ధసఞ్ఞకత్థేరఅపదానవణ్ణనా సమత్తా.
౮. మగ్గసఞ్ఞకత్థేరఅపదానవణ్ణనా
పదుముత్తరబుద్ధస్సాతిఆదికం ఆయస్మతో మగ్గసఞ్ఞకత్థేరస్స అపదానం. అయమ్పి పురిమబుద్ధేసు కతాధికారో తతో ఓరం తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే హిమవన్తే దేవపుత్తో హుత్వా నిబ్బత్తో అరఞ్ఞం గన్త్వా మగ్గమూళ్హానం మగ్గం గవేసన్తానం తస్స సావకానం భోజేత్వా మగ్గం ఆచిక్ఖి. సో తేన పుఞ్ఞేన దేవమనుస్ససమ్పత్తిమనుభవిత్వా ఉప్పన్నుప్పన్నభవే సబ్బత్థ అమూళ్హో సఞ్ఞవా అహోసి. అథ ఇమస్మిం బుద్ధుప్పాదే కులగేహే నిబ్బత్తో విఞ్ఞుతం పత్తో ఘరావాసే అనల్లీనో పబ్బజిత్వా నచిరస్సేవ అరహా అహోసి.
౬౬. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో పదుముత్తరబుద్ధస్సాతిఆదిమాహ. సావకా వనచారినోతి భగవతో వుత్తవచనం సమ్మా ఆదరేన సుణన్తీతి సావకా, అథ వా భగవతో దేసనానుసారేన ఞాణం పేసేత్వా సద్ధమ్మం సుణన్తీతి సావకా. వనచారినో వనే విచరణకా సావకా విప్పనట్ఠా మగ్గమూళ్హా మహాఅరఞ్ఞే అన్ధావ చక్ఖువిరహితావ అనుసుయ్యరే విచరన్తీతి సమ్బన్ధో. సేసం సబ్బత్థ ఉత్తానమేవాతి.
మగ్గసఞ్ఞకత్థేరఅపదానవణ్ణనా సమత్తా.
౯. పచ్చుపట్ఠానసఞ్ఞకత్థేరఅపదానవణ్ణనా
అత్థదస్సిమ్హి సుగతేతిఆదికం ఆయస్మతో పచ్చుపట్ఠానసఞ్ఞకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో అత్థదస్సిస్స భగవతో కాలే యక్ఖయోనియం నిబ్బత్తో భగవతి ధరమానే దస్సనస్స అలద్ధత్తా పచ్ఛా పరినిబ్బుతే మహాసోకప్పత్తో విహాసి. తదా హిస్స భగవతో సాగతో నామ అగ్గసావకో అనుసాసన్తో భగవతో సారీరికధాతుపూజా భగవతి ధరమానే కతపూజా వియ చిత్తప్పసాదవసా మహప్ఫలం భవతీ’’తి వత్వా ‘‘థూపం కరోహీ’’తి నియోజితో థూపం కారేసి, తం పూజేత్వా తతో చుతో దేవమనుస్సేసు సక్కచక్కవత్తిసమ్పత్తిమనుభవిత్వా ఇమస్మిం బుద్ధుప్పాదే సావత్థియం ఏకస్మిం కులగేహే నిబ్బత్తో విఞ్ఞుతం పత్తో సత్థరి పసీదిత్వా పబ్బజిత్వా నచిరస్సేవ అరహా అహోసి.
౭౨. సో అపరభాగే అత్తనో పుఞ్ఞకమ్మం సరిత్వా సోమనస్సజాతో పుబ్బచరితాపదానం పకాసేన్తో అత్థదస్సిమ్హి సుగతేతిఆదిమాహ. తం హేట్ఠా వుత్తమేవ. యక్ఖయోనిం ఉపపజ్జిన్తి ఏత్థ పన అత్తనో సకాసం సమ్పత్తసమ్పత్తే ఖాదన్తా యన్తి గచ్ఛన్తీతి యక్ఖా, యక్ఖానం యోని జాతీతి యక్ఖయోని, యక్ఖయోనియం నిబ్బత్తోతి అత్థో.
౭౩. దుల్లద్ధం వత మే ఆసీతి మే మయా లద్ధయసం దుల్లద్ధం, బుద్ధభూతస్స సత్థునో సక్కారం అకతత్తా విరాధేత్వా లద్ధన్తి అత్థో. దుప్పభాతన్తి దుట్ఠు పభాతం రత్తియా పభాతకరణం, మయ్హం న సుట్ఠుం పభాతన్తి అత్థో. దురుట్ఠితన్తి దుఉట్ఠితం, సూరియస్స ఉగ్గమనం మయ్హం దుఉగ్గమనన్తి అత్థో. సేసం సబ్బత్థ ఉత్తానమేవాతి.
పచ్చుపట్ఠానసఞ్ఞకత్థేరఅపదానవణ్ణనా సమత్తా.
౧౦. జాతిపూజకత్థేరఅపదానవణ్ణనా
జాయం తస్స విపస్సిస్సాతిఆదికం ఆయస్మతో జాతిపూజకత్థేరస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో విపస్సిస్స భగవతో కాలే కులగేహే నిబ్బత్తో విఞ్ఞుతం పత్తో నక్ఖత్తపాఠకేహి విపస్సిబోధిసత్తస్స వుత్తలక్ఖణనిమిత్తం సుత్వా ‘‘అయం కిర కుమారో బుద్ధో హుత్వా సకలలోకస్స అగ్గో సేట్ఠో సుత్వా సబ్బసత్తే సంసారతో ఉద్ధరిస్సతీ’’తి సుత్వా తం భగవన్తం కుమారకాలేయేవ బుద్ధస్స వియ మహాపూజమకాసి. పచ్ఛా కమేన కుమారకాలం రాజకుమారకాలం రజ్జకాలన్తి కాలత్తయమతిక్కమ్మ బుద్ధే జాతేపి మహాపూజం కత్వా తతో చుతో తుసితాదీసు నిబ్బత్తో దిబ్బసుఖమనుభవిత్వా పచ్ఛా మనుస్సేసు చక్కవత్తాదిమనుస్ససుఖమనుభవిత్వా ఇమస్మిం బుద్ధుప్పాదే కులగేహే నిబ్బత్తో సత్తట్ఠవస్సకాలేయేవ భగవతి పసన్నో పబ్బజిత్వా విపస్సనం వడ్ఢేత్వా నచిరస్సేవ అరహా అహోసి.
౮౨. సో అపరభాగే అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో జాయం తస్స విపస్సిస్సాతిఆదిమాహ. తం హేట్ఠా వుత్తత్థమేవ.
౮౪. నేమిత్తానం సుణిత్వానాతి ఏత్థ నిమిత్తం కారణం సుఖదుక్ఖప్పత్తిహేతుం జానన్తీతి నేమిత్తా, తేసం నేమిత్తానం నక్ఖత్తపాఠకానం వచనం సుణిత్వాతి అత్థో. సేసం సబ్బత్థ ఉత్తానమేవాతి.
జాతిపూజకత్థేరఅపదానవణ్ణనా సమత్తా.
ద్వాదసమవగ్గవణ్ణనా సమత్తా.