౪. సూచిదాయకత్థేరఅపదానవణ్ణనా

కమ్మారోహం పురే ఆసిన్తిఆదికం ఆయస్మతో సూచిదాయకత్థేరస్స అపదానం. అయమ్పి పురిమబుద్ధేసు కతాధికారో అన్తరన్తరా కుసలబీజాని పూరేన్తో విపస్సిస్స భగవతో కాలే అన్తరన్తరా కతేన ఏకేన కమ్మచ్ఛిద్దేన కమ్మారకులే నిబ్బత్తో వుద్ధిమన్వాయ సకసిప్పేసు నిప్ఫత్తిం పత్తో సత్థు ధమ్మదేసనం సుత్వా పసన్నమానసో చీవరసిబ్బనత్థాయ సూచిదానమదాసి, తేన పుఞ్ఞేన దిబ్బసమ్పత్తిం అనుభవిత్వా అపరభాగే మనుస్సేసు ఉప్పన్నో చక్కవత్తాదయో సమ్పత్తియో చ అనుభవన్తో ఉప్పన్నుప్పన్నభవే తిక్ఖపఞ్ఞో వజీరఞాణో అహోసి. సో కమేన ఇమస్మిం బుద్ధుప్పాదే నిబ్బత్తో వుద్ధిప్పత్తో మహద్ధనో సద్ధాజాతో తిక్ఖపఞ్ఞో అహోసి. సో ఏకదివసం సత్థు ధమ్మదేసనం సుత్వా ధమ్మానుసారేన ఞాణం పేసేత్వా నిసిన్నాసనేయేవ అరహా అహోసి.

౧౯. సో అరహా సమానో అత్తనో పుబ్బకమ్మం సరిత్వా సోమనస్సజాతో పుబ్బచరితాపదానం పకాసేన్తో కమ్మారోహం పురే ఆసిన్తిఆదిమాహ. తత్థ కమ్మారోతి అయోకమ్మలోహకమ్మాదినా కమ్మేన జీవతి రుహతి వుద్ధిం విరూళ్హిం ఆపజ్జతీతి కమ్మారో, పుబ్బే పుఞ్ఞకరణకాలే కమ్మారో ఆసిం అహోసిన్తి అత్థో. సేసం సబ్బత్థ ఉత్తానమేవాతి.

సూచిదాయకత్థేరఅపదానవణ్ణనా సమత్తా.