౩-౮. పిణ్డోలభారద్వాజత్థేరఅపదానవణ్ణనా

పదుముత్తరో నామ జినోతిఆదికం ఆయస్మతో పిణ్డోలభారద్వాజస్స అపదానం. అయమ్పి పురిమబుద్ధేసు కతాధికారో తత్థ తత్థ భవే వివట్టూపనిస్సయాని పుఞ్ఞాని ఉపచినన్తో పదుముత్తరస్స భగవతో కాలే సీహయోనియం నిబ్బత్తిత్వా పబ్బతపాదే గుహాయం విహాసి. భగవా తస్స అనుగ్గహం కాతుం గోచరాయ పక్కన్తకాలే తస్స సయనగుహం పవిసిత్వా నిరోధం సమాపజ్జిత్వా నిసీది. సీహో గోచరం గహేత్వా నివత్తో గుహద్వారే ఠత్వా భగవన్తం దిస్వా హట్ఠతుట్ఠో జలజథలజపుప్ఫేహి పూజం కత్వా చిత్తం పసాదేన్తో భగవతో ఆరక్ఖణత్థాయ అఞ్ఞే వాళమిగే అపనేతుం తీసు వేలాసు సీహనాదం నదన్తో బుద్ధగతాయ సతియా అట్ఠాసి. యథా పఠమదివసే, ఏవం సత్తాహం పూజేసి. భగవా ‘‘సత్తాహచ్చయేన నిరోధా వుట్ఠహిత్వా వట్టిస్సతి ఇమస్స ఏత్తకో ఉపనిస్సయో’’తి తస్స పస్సన్తస్సేవ ఆకాసం పక్ఖన్దిత్వా విహారమేవ గతో.

సీహో బుద్ధవియోగదుక్ఖం అధివాసేతుం అసక్కోన్తో కాలం కత్వా హంసవతీనగరే మహాభోగకులే నిబ్బత్తిత్వా వయప్పత్తో నగరవాసీహి సద్ధిం విహారం గన్త్వా సత్థు ధమ్మదేసనం సుత్వా పసన్నో సత్తాహం బుద్ధప్పముఖస్స భిక్ఖుసఙ్ఘస్స మహాదానం పవత్తేత్వా యావజీవం పుఞ్ఞాని కత్వా అపరాపరం దేవమనుస్సేసు సంసరన్తో అమ్హాకం భగవతో కాలే కోసమ్బియం రఞ్ఞో ఉదేనస్స పురోహితస్స పుత్తో హుత్వా నిబ్బత్తి. భారద్వాజోతిస్స నామం అహోసి. సో వయప్పతో తయో వేదే ఉగ్గహేత్వా పఞ్చ మాణవకసతాని మన్తే వాచేన్తో మహగ్ఘసభావేన అననురూపాచారత్తా తేహి పరిచ్చత్తో రాజగహం గన్త్వా భగవతో భిక్ఖుసఙ్ఘస్స చ లాభసక్కారం దిస్వా సాసనే పబ్బజిత్వా భోజనే అమత్తఞ్ఞూ హుత్వా విహరతి. సత్థారా ఉపాయేన మత్తఞ్ఞుతాయ పతిట్ఠాపేన్తో విపస్సనం పట్ఠపేత్వా నచిరస్సేవ ఛళభిఞ్ఞో అహోసి. ఛళభిఞ్ఞో పన హుత్వా భగవతో సమ్ముఖా ‘‘యం సావకేహి పత్తబ్బం, తం మయా అనుప్పత్త’’న్తి, భిక్ఖుసఙ్ఘే చ ‘‘యస్స మగ్గే వా ఫలే వా కఙ్ఖా అత్థి, సో మం పుచ్ఛతూ’’తి సీహనాదం నది. తేన తం భగవా – ‘‘ఏతదగ్గం, భిక్ఖవే, మమ సావకానం భిక్ఖూనం సీహనాదికానం యదిదం పిణ్డోలభారద్వాజో’’తి (అ. ని. ౧.౧౮౮, ౧౯౫) ఏతదగ్గే ఠపేసి.

౬౧౩. ఏవం ఏతదగ్గం ఠానం పత్వా పుబ్బే కతపుఞ్ఞసమ్భారం సరిత్వా సోమనస్సవసేన అత్తనో పుఞ్ఞకమ్మాపదానం విభావేన్తో పదుముత్తరోతిఆదిమాహ. తస్సత్థో హేట్ఠా వుత్తోవ. పురతో హిమవన్తస్సాతి హిమాలయపబ్బతతో పుబ్బదిసాభాగేతి అత్థో. చిత్తకూటే వసీ తదాతి యదా అహం సీహో మిగరాజా హుత్వా హిమవన్తపబ్బతసమీపే వసామి, తదా పదుముత్తరో నామ సత్థా అనేకేహి చ ఓసధేహి, అనేకేహి చ రతనేహి చిత్తవిచిత్తతాయ చిత్తకూటే చిత్తపబ్బతసిఖరే వసీతి సమ్బన్ధో.

౬౧౪. అభీతరూపో తత్థాసిన్తి అభీతసభావో నిబ్భయసభావో మిగరాజా తత్థ ఆసిం అహోసిన్తి అత్థో. చతుక్కమోతి చతూహి దిసాహి కమో గన్తుం సమత్థో. యస్స సద్దం సుణిత్వానాతి యస్స మిగరఞ్ఞో సీహనాదం సుత్వా బహుజ్జనా బహుసత్తా విక్ఖమ్భన్తి విసేసేన ఖమ్భన్తి భాయన్తి.

౬౧౫. సుఫుల్లం పదుమం గయ్హాతి భగవతి పసాదేన సుపుప్ఫితపదుమపుప్ఫం డంసిత్వా. నరాసభం నరానం ఆసభం ఉత్తమం సేట్ఠం సమ్బుద్ధం ఉపగచ్ఛిం, సమీపం అగమిన్తి అత్థో. వుట్ఠితస్స సమాధిమ్హాతి నిరోధసమాపత్తితో వుట్ఠితస్స బుద్ధస్స తం పుప్ఫం అభిరోపయిం పూజేసిన్తి అత్థో.

౬౧౬. చతుద్దిసం నమస్సిత్వాతి చతూసు దిసాసు నమస్సిత్వా సకం చిత్తం అత్తనో చిత్తం పసాదేత్వా ఆదరేన పతిట్ఠపేత్వా సీహనాదం అభీతనాదం అనదిం ఘోసేసిన్తి అత్థో.

౬౧౭. తతో బుద్ధేన దిన్నబ్యాకరణం పకాసేన్తో పదుముత్తరోతిఆదిమాహ. తం ఉత్తానత్థమేవ.

౬౧౮. వదతం సేట్ఠోతి ‘‘మయం బుద్ధా, మయం బుద్ధా’’తి వదన్తానం అఞ్ఞతిత్థియానం సేట్ఠో ఉత్తమో బుద్ధో ఆగతోతి సమ్బన్ధో. తస్స ఆగతస్స భగవతో తం ధమ్మం సోస్సామ సుణిస్సామాతి అత్థో.

౬౧౯. తేసం హాసపరేతానన్తి హాసేహి సోమనస్సేహి పరేతానం అభిభూతానం సమన్నాగతానం తేసం దేవమనుస్సానం. లోకనాయకోతి లోకస్స నాయకో సగ్గమోక్ఖసమ్పాపకో మమ సద్దం మయ్హం సీహనాదం పకిత్తేసి పకాసేసి కథేసి, దీఘదస్సీ అనాగతకాలదస్సీ మహాముని మునీనమన్తరే మహన్తో ముని. సేసగాథా సువిఞ్ఞేయ్యమేవ.

౬౨౨. నామేన పదుమో నామ చక్కవత్తీ హుత్వా చతుసట్ఠియా జాతియా ఇస్సరియం ఇస్సరభావం రజ్జం కారయిస్సతీతి అత్థో.

౬౨౩. కప్పసతసహస్సమ్హీతి సామ్యత్థే భుమ్మవచనం, కప్పసతసహస్సానం పరియోసానేతి అత్థో.

౬౨౪. పకాసితే పావచనేతి తేన గోతమేన భగవతా పిటకత్తయే పకాసితే దేసితేతి అత్థో. బ్రహ్మబన్ధు భవిస్సతీతి తదా గోతమస్స భగవతో కాలే అయం సీహో మిగరాజా బ్రాహ్మణకులే నిబ్బత్తిస్సతీతి అత్థో. బ్రహ్మఞ్ఞా అభినిక్ఖమ్మాతి బ్రాహ్మణకులతో నిక్ఖమిత్వా తస్స భగవతో సాసనే పబ్బజిస్సతీతి సమ్బన్ధో.

౬౨౫. పధానపహితత్తోతి వీరియకరణత్థం పేసితచిత్తో. ఉపధిసఙ్ఖాతానం కిలేసానం అభావేన నిరుపధి. కిలేసదరథానం అభావేన ఉపసన్తో. సబ్బాసవే సకలాసవే పరిఞ్ఞాయ పహాయ అనాసవో నిక్కిలేసో నిబ్బాయిస్సతి ఖన్ధపరినిబ్బానేన నిబ్బుతో భవిస్సతీతి అత్థో.

౬౨౬. విజనే పన్తసేయ్యమ్హీతి జనసమ్బాధరహితే దూరారఞ్ఞసేనాసనేతి అత్థో. వాళమిగసమాకులేతి కాళసీహాదీహి చణ్డమిగసఙ్గేహి ఆకులే సంకిణ్ణేతి అత్థో. సేసం వుత్తత్థమేవాతి.

పిణ్డోలభారద్వాజత్థేరఅపదానవణ్ణనా సమత్తా.