(౭.) సత్తకనిద్దేసవణ్ణనా

౯౪౯. సత్తకనిద్దేసే థామగతట్ఠేన అప్పహీనట్ఠేన చ అనుసేన్తీతి అనుసయా. వట్టస్మిం సత్తే సంయోజేన్తి ఘటేన్తీతి సంయోజనాని. సముదాచారవసేన పరియుట్ఠహన్తీతి పరియుట్ఠానాని. కామరాగోవ పరియుట్ఠానం కామరాగపరియుట్ఠానం. సేసేసుపి ఏసేవ నయో.

౯౫౦. అసతం ధమ్మా, లామకట్ఠేన వా అసన్తా ధమ్మాతి అసద్ధమ్మా. రాగాదీహి దోసేహి దుట్ఠాని చరితానీతి దుచ్చరితాని. తేన తేనాకారేన మఞ్ఞన్తీతి మానా.

౯౫౧. దిట్ఠినిద్దేసే రూపీతి రూపవా. చాతుమహాభూతికోతి చతుమహాభూతమయో. మాతాపితూనం ఏతన్తి మాతాపేత్తికం. కిన్తం? సుక్కసోణితం. మాతాపేత్తికే సమ్భూతో జాతోతి మాతాపేత్తికసమ్భవో. ఇధ రూపకాయసీసేన మనుస్సత్తభావం అత్తాతి వదతి. దుతియో తం పటిక్ఖిపిత్వా దిబ్బత్తభావం వదతి. దిబ్బోతి దేవలోకే సమ్భూతో. కామావచరోతి ఛకామావచరదేవపరియాపన్నో. కబళీకారం భక్ఖయతీతి కబళీకారభక్ఖో. మనోమయోతి ఝానమనేన నిబ్బత్తో. సబ్బఙ్గపచ్చఙ్గీతి సబ్బఙ్గపచ్చఙ్గయుత్తో. అహీనిన్ద్రియోతి పరిపుణ్ణిన్ద్రియో; యాని బ్రహ్మలోకే అత్థి తేసం వసేన, ఇతరేసఞ్చ సణ్ఠానవసేనేతం వుత్తం. ఆకాసానఞ్చాయతనూపగోతి ఆకాసానఞ్చాయతనభావం ఉపగతో. ఇతరేసుపి ఏసేవ నయో. సేసం సబ్బత్థ ఉత్తానత్థమేవాతి.

సత్తకనిద్దేసవణ్ణనా.