౩. పఞ్హాపుచ్ఛకవణ్ణనా

౭౪౭. పఞ్హాపుచ్ఛకే పాళిఅనుసారేనేవ చతున్నం పటిసమ్భిదానం కుసలాదిభావో వేదితబ్బో. ఆరమ్మణత్తికేసు పన నిరుత్తిపటిసమ్భిదా సద్దమేవ ఆరమ్మణం కరోతీతి పరిత్తారమ్మణా. అత్థపటిసమ్భిదా కామావచరవిపాకకిరియసఙ్ఖాతఞ్చేవ పచ్చయసముప్పన్నఞ్చ అత్థం పచ్చవేక్ఖన్తస్స పరిత్తారమ్మణా; వుత్తప్పభేదమేవ రూపావచరారూపావచరం అత్థం పచ్చవేక్ఖన్తస్స మహగ్గతారమ్మణా; లోకుత్తరవిపాకత్థఞ్చేవ పరమత్థఞ్చ నిబ్బానం పచ్చవేక్ఖన్తస్స అప్పమాణారమ్మణా. ధమ్మపటిసమ్భిదా కామావచరం కుసలధమ్మం అకుసలధమ్మం పచ్చయధమ్మఞ్చ పచ్చవేక్ఖన్తస్స పరిత్తారమ్మణా; రూపావచరారూపావచరం కుసలం ధమ్మం పచ్చయధమ్మఞ్చ పచ్చవేక్ఖన్తస్స మహగ్గతారమ్మణా; లోకుత్తరం కుసలం ధమ్మం పచ్చయధమ్మఞ్చ పచ్చవేక్ఖన్తస్స అప్పమాణారమ్మణా. పటిభానపటిసమ్భిదా కామావచరకుసలవిపాకకిరియఞాణాని పచ్చవేక్ఖన్తస్స పరిత్తారమ్మణా; రూపావచరారూపావచరాని కుసలవిపాకకిరియఞాణాని పచ్చవేక్ఖన్తస్స తేసం ఆరమ్మణాని విజానన్తస్స మహగ్గతారమ్మణా; లోకుత్తరాని కుసలవిపాకఞాణాని పచ్చవేక్ఖన్తస్స అప్పమాణారమ్మణా.

అత్థపటిసమ్భిదా సహజాతహేతువసేన సియా మగ్గహేతుకా, వీరియజేట్ఠికాయ మగ్గభావనాయ సియా మగ్గాధిపతి, ఛన్దచిత్తజేట్ఠికాయ నవత్తబ్బా, ఫలకాలేపి నవత్తబ్బా ఏవ. ధమ్మపటిసమ్భిదా మగ్గం పచ్చవేక్ఖణకాలే మగ్గారమ్మణా, మగ్గం గరుం కత్వా పచ్చవేక్ఖన్తస్స ఆరమ్మణాధిపతివసేన మగ్గాధిపతి. పటిభానపటిసమ్భిదా మగ్గఞాణం పచ్చవేక్ఖణకాలే మగ్గారమ్మణా, మగ్గం గరుం కత్వా పచ్చవేక్ఖన్తస్స మగ్గాధిపతి, సేసఞాణం పఞ్చవేక్ఖణకాలే నవత్తబ్బారమ్మణా. నిరుత్తిపటిసమ్భిదా పచ్చుప్పన్నమేవ సద్దం ఆరమ్మణం కరోతీతి పచ్చుప్పన్నారమ్మణా.

అత్థపటిసమ్భిదా అతీతం విపాకత్థం కిరియత్థం పచ్చయసముప్పన్నఞ్చ పచ్చవేక్ఖన్తస్స అతీతారమ్మణా, అనాగతం పచ్చవేక్ఖన్తస్స అనాగతారమ్మణా, పచ్చుప్పన్నం పచ్చవేక్ఖన్తస్స పచ్చుప్పన్నారమ్మణా, లోకుత్తరం పరమత్థం పచ్చవేక్ఖన్తస్స నవత్తబ్బారమ్మణా. ధమ్మపటిసమ్భిదా అతీతం కుసలం అకుసలం పచ్చయధమ్మఞ్చ పచ్చవేక్ఖన్తస్స అతీతారమ్మణా, అనాగతం పచ్చవేక్ఖన్తస్స అనాగతారమ్మణా, పచ్చుప్పన్నం పచ్చవేక్ఖన్తస్స పచ్చుప్పన్నారమ్మణా. పటిభానపటిసమ్భిదా అతీతం కుసలఞాణం విపాకఞాణం కిరియఞాణఞ్చ పచ్చవేక్ఖన్తస్స అతీతారమ్మణా, అనాగతం పచ్చవేక్ఖన్తస్స అనాగతారమ్మణా, పచ్చుప్పన్నం పచ్చవేక్ఖన్తస్స పచ్చుప్పన్నారమ్మణా.

నిరుత్తిపటిసమ్భిదా సద్దారమ్మణత్తా బహిద్ధారమ్మణా. ఇతరాసు తీసు అత్థపటిసమ్భిదా అజ్ఝత్తం విపాకత్థం కిరియత్థం పచ్చయసముప్పన్నఞ్చ పచ్చవేక్ఖన్తస్స అజ్ఝత్తారమ్మణా, బహిద్ధా పచ్చవేక్ఖన్తస్స బహిద్ధారమ్మణా, అజ్ఝత్తబహిద్ధా పచ్చవేక్ఖన్తస్స అజ్ఝత్తబహిద్ధారమ్మణా, పరమత్థం పచ్చవేక్ఖన్తస్స బహిద్ధారమ్మణా ఏవ. ధమ్మపటిసమ్భిదా అజ్ఝత్తం కుసలాకుసలం పచ్చయధమ్మం పచ్చవేక్ఖణకాలే అజ్ఝత్తారమ్మణా, బహిద్ధా కుసలాకుసలం పచ్చయధమ్మం పచ్చవేక్ఖణకాలే బహిద్ధారమ్మణా, అజ్ఝత్తబహిద్ధా కుసలాకుసలం పచ్చయధమ్మం పచ్చవేక్ఖణకాలే అజ్ఝత్తబహిద్ధారమ్మణా. పటిభానపటిసమ్భిదా అజ్ఝత్తం కుసలవిపాకకిరియఞాణం పచ్చవేక్ఖణకాలే అజ్ఝత్తారమ్మణా, బహిద్ధా…పే… అజ్ఝత్తబహిద్ధా కుసలవిపాకకిరియఞాణం పచ్చవేక్ఖణకాలే అజ్ఝత్తబహిద్ధారమ్మణాతి.

ఇధాపి తిస్సో పటిసమ్భిదా లోకియా; అత్థపటిసమ్భిదా లోకియలోకుత్తరా. ఇమస్మిఞ్హి పటిసమ్భిదావిభఙ్గే సమ్మాసమ్బుద్ధేన తయోపి నయా లోకియలోకుత్తరమిస్సకత్తా ఏకపరిచ్ఛేదావ కథితా. తీసుపి హి ఏతాసు తిస్సో పటిసమ్భిదా లోకియా, అత్థపటిసమ్భిదా లోకియలోకుత్తరాతి. ఏవమయం పటిసమ్భిదావిభఙ్గోపి తేపరివట్టం నీహరిత్వావ భాజేత్వా దస్సితోతి.

సమ్మోహవినోదనియా విభఙ్గట్ఠకథాయ

పటిసమ్భిదావిభఙ్గవణ్ణనా నిట్ఠితా.