౩. పఞ్హాపుచ్ఛకవణ్ణనా

౭౧౪. పఞ్హాపుచ్ఛకే పాళిఅనుసారేనేవ సిక్ఖాపదానం కుసలాదిభావో వేదితబ్బో. ఆరమ్మణత్తికేసు పన యాని సిక్ఖాపదాని ఏత్థ సత్తారమ్మణానీతి వుత్తాని, తాని యస్మా సత్తోతి సఙ్ఖం గతే సఙ్ఖారేయేవ ఆరమ్మణం కరోన్తి, యస్మా చ సబ్బానిపి ఏతాని సమ్పత్తవిరతివసేనేవ నిద్దిట్ఠాని, తస్మా ‘‘పరిత్తారమ్మణా’’తి చ ‘‘పచ్చుప్పన్నారమ్మణా’’తి చ వుత్తం. యతో పన విరమతి తస్స వత్థునో అచ్చన్తబహిద్ధత్తా సబ్బేసమ్పి బహిద్ధారమ్మణతా వేదితబ్బాతి.

ఇమస్మిం పన సిక్ఖాపదవిభఙ్గే సమ్మాసమ్బుద్ధేన అభిధమ్మభాజనీయేపి పఞ్హాపుచ్ఛకేపి లోకియానేవ సిక్ఖాపదాని కథితాని. ఉభోపి హి ఏతే నయా లోకియత్తా ఏకపరిచ్ఛేదా ఏవ. ఏవమయం సిక్ఖాపదవిభఙ్గో ద్వేపరివట్టం నీహరిత్వావ భాజేత్వా దస్సితోతి.

సమ్మోహవినోదనియా విభఙ్గట్ఠకథాయ

సిక్ఖాపదవిభఙ్గవణ్ణనా నిట్ఠితా.