౩. పఞ్హాపుచ్ఛకవణ్ణనా

౪౮౨. పఞ్హాపుచ్ఛకే పాళిఅనుసారేనేవ బోజ్ఝఙ్గానం కుసలాదిభావో వేదితబ్బో. ఆరమ్మణత్తికేసు పన సబ్బేపేతే అప్పమాణం నిబ్బానం ఆరబ్భ పవత్తితో అప్పమాణారమ్మణా ఏవ, న మగ్గారమ్మణా. సహజాతహేతువసేన పనేత్థ కుసలా మగ్గహేతుకా, వీరియం వా వీమంసం వా జేట్ఠకం కత్వా మగ్గభావనాకాలే మగ్గాధిపతినో, ఛన్దచిత్తజేట్ఠికాయ మగ్గభావనాయ న వత్తబ్బా మగ్గాధిపతినోతి, ఫలకాలేపి న వత్తబ్బా ఏవ.

అతీతాదీసు ఏకారమ్మణభావేనపి న వత్తబ్బా, నిబ్బానస్స పన బహిద్ధాధమ్మత్తా బహిద్ధారమ్మణా నామ హోన్తీతి. ఏవమేతస్మిం పఞ్హాపుచ్ఛకేపి నిబ్బత్తితలోకుత్తరావ బోజ్ఝఙ్గా కథితా. సమ్మాసమ్బుద్ధేన హి సుత్తన్తభాజనీయస్సేవ పఠమనయస్మిం లోకియా, దుతియతతియేసు లోకియలోకుత్తరమిస్సకా బోజ్ఝఙ్గా కథితా. అభిధమ్మభాజనీయస్స పన చతూసుపి నయేసు ఇమస్మిఞ్చ పఞ్హాపుచ్ఛకే లోకుత్తరాయేవాతి ఏవమయం బోజ్ఝఙ్గవిభఙ్గోపి తేపరివట్టం నీహరిత్వావ భాజేత్వా దస్సితోతి.

సమ్మోహవినోదనియా విభఙ్గట్ఠకథాయ

బోజ్ఝఙ్గవిభఙ్గవణ్ణనా నిట్ఠితా.