౧. నసుత్తాహరణకథావణ్ణనా

౨౭౯. ఇదాని జహతికథా నామ హోతి. తత్థ యేసం ‘‘ఝానలాభీ పుథుజ్జనో సహ సచ్చాభిసమయా అనాగామీ నామ హోతి, తస్స పుథుజ్జనకాలేయేవ కామరాగబ్యాపాదా పహీనా’’తి లద్ధి సేయ్యథాపి ఏతరహి సమ్మితియానం, తేసం తం లద్ధిం భిన్దితుం జహతి పుథుజ్జనోతి పుచ్ఛా సకవాదిస్స, ఝానవిక్ఖమ్భితానం పన తేసం పరియుట్ఠానం అపస్సన్తస్స పటిఞ్ఞా పరవాదిస్స. యస్మా పన తేసం ఝానవిక్ఖమ్భితానమ్పి అనాగామిమగ్గేనేవ అచ్చన్తం పహానం హోతి, తస్మా పున అచ్చన్తన్తిఆదిఅనుయోగో సకవాదిస్స, తథారూపస్స పహానస్స అభావతో పటిక్ఖేపో ఇతరస్స. విక్ఖమ్భేతీతి అచ్చన్తవిక్ఖమ్భనమేవ సన్ధాయ పుచ్ఛా సకవాదిస్స. తతో పరం అనాగామిమగ్గట్ఠేన సద్ధిం పుథుజ్జనసంసన్దనం హోతి. తం ఉత్తానత్థమేవ.

౨౮౦. తతో పరం అనాగామిఫలే సణ్ఠాతీతి పుట్ఠో ఝానానాగామితం సన్ధాయ పటిజానాతి. అరహత్తే సణ్ఠాతీతి పుట్ఠో దస్సనమగ్గేన ఉద్ధమ్భాగియానం పహానాభావతో పటిక్ఖిపతి.

అపుబ్బం అచరిమం తయో మగ్గేతి పుట్ఠో తథారూపాయ భావనాయ అభావా పటిక్ఖిపతి. పున పుట్ఠో తిణ్ణం మగ్గానం కిచ్చసబ్భావం సన్ధాయ పటిజానాతి. సామఞ్ఞఫలపుచ్ఛాసుపి ఏసేవ నయో. కతమేన మగ్గేనాతి పుట్ఠో అనాగామిమగ్గేనాతి ఝానానాగామితం సన్ధాయ వదతి. పున సంయోజనప్పహానం పుట్ఠో తిణ్ణం అనాగామిమగ్గేన తేసం కిలేసానం అప్పహేయ్యత్తా పటిక్ఖిపతి. దుతియం పుట్ఠో పఠమమగ్గస్సేవ ఝానానాగామిమగ్గభావం సన్ధాయ పటిజానాతి. సేసమేత్థ ఉత్తానత్థమేవాతి.

జహతికథా.