౪. తికదుకపట్ఠానవణ్ణనా

తికదుకపట్ఠానేపి కుసలం హేతుం ధమ్మం పటిచ్చ కుసలో హేతు ధమ్మో ఉప్పజ్జతి హేతుపచ్చయాతి పఞ్హామత్తుద్ధారవసేనేవ దేసనా కతా. తత్థ యథా హేట్ఠా హేతుదుకేన సద్ధిం కుసలపదం యోజేత్వా సబ్బపచ్చయవసేన సబ్బవారేసు సఙ్ఖేపతో దేసనా కతా, ఏవమిధ కుసలత్తికేన సద్ధిం హేతుపదం యోజేత్వా సబ్బపచ్చయవసేన సబ్బవారేసు సఙ్ఖేపతో దేసనా కతా. యథా చ హేతుపదం, ఏవం నహేతుపదమ్పి కుసలత్తికేన సద్ధిం యోజేత్వా కుసలత్తికహేతుదుకం నిట్ఠాపితం. తతో పరం సుఖాయ వేదనాయ సమ్పయుత్తం హేతుం ధమ్మన్తిఆదినా నయేన వేదనాత్తికహేతుదుకాదీని ఏకవీసతి తికదుకాని దస్సితాని.

ఏవం బావీసతియా తికేహి సద్ధిం హేతుదుకం యోజేత్వా పున తేహియేవ సద్ధిం సహేతుకదుకాదయో సరణదుకపరియోసానా లబ్భమానవసేన సబ్బదుకా యోజితా. ఇధాపి యం యం పదం యోజనం న గచ్ఛతి, తం తం పాళియంయేవ పటిక్ఖిత్తం. ఏవం దుకసతం గహేత్వా ద్వావీసతియా తికేసు పక్ఖిపిత్వా తికదుకపట్ఠానం నామ దేసితం. తత్రాపి యేన యేన నయేన పాళి సఙ్ఖిత్తా, సో సో నయో విత్థారతో వేదితబ్బో.

తికదుకపట్ఠానవణ్ణనా.