౪. ఉపాదిన్నత్తికవణ్ణనా

౫౧. ఉపాదిన్నుపాదానియత్తికస్స పఞ్హావారే వత్థు ఉపాదానియానం ఖన్ధానం పురేజాతపచ్చయేన పచ్చయోతి పవత్తిం సన్ధాయ వుత్తం. పటిసన్ధియం పన తం పురేజాతం న హోతి.

౭౨. ఉపాదిన్నుపాదానియో కబళీకారో ఆహారో ఉపాదిన్నుపాదానియస్స కాయస్స ఆహారపచ్చయేన పచ్చయోతి ఏత్థ ఉపాదిన్నుపాదానియో కబళీకారాహారో నామ కమ్మసముట్ఠానానం రూపానం అబ్భన్తరగతా ఓజా. ఉపాదిన్నుపాదానియస్స కాయస్సాతి తస్సేవ కమ్మసముట్ఠానరూపకాయస్స ఆహారపచ్చయేన పచ్చయో. రూపజీవితిన్ద్రియం వియ కటత్తారూపానం అనుపాలనఉపత్థమ్భనవసేన పచ్చయో, న జనకవసేన. యం పన మణ్డూకాదయో గిలిత్వా ఠితానం అహిఆదీనం కాయస్స జీవమానకమణ్డూకాదిసరీరే ఓజా ఆహారపచ్చయేన పచ్చయోతి వదన్తి, తం న గహేతబ్బం. న హి జీవమానకసరీరే ఓజా అఞ్ఞస్స సరీరస్స ఆహారపచ్చయతం సాధేతి. అనుపాదిన్నుపాదానియస్స కాయస్సాతి ఏత్థ పన జనకవసేనాపి లబ్భతి. ఉపాదిన్నుపాదానియస్స చ అనుపాదిన్నుపాదానియస్స చాతి ఏత్థ ఏకస్స ఉపత్థమ్భకవసేన, ఏకస్స జనకవసేన, ఉభిన్నమ్పి వా ఉపత్థమ్భకవసేనేవ వుత్తో. ద్వే పన ఆహారా ఏకతో పచ్చయా హోన్తా ఉపత్థమ్భకావ హోన్తి, న జనకా. సేసమేత్థ పాళిమేవ సాధుకం ఓలోకేత్వా వేదితబ్బం.

ఉపాదిన్నత్తికవణ్ణనా.