౧౦-౧౧. ఆఘాతపటివినయసుత్తాదివణ్ణనా
౩౦-౩౧. దసమే ఆఘాతపటివినయాతి ఆఘాతస్స పటివినయకారణాని. తం కుతేత్థ లబ్భాతి ‘‘తం అనత్థచరణం మా అహోసీ’’తి ఏతస్మిం పుగ్గలే కుతో లబ్భా, కేన కారణేన సక్కా లద్ధుం, ‘‘పరో నామ పరస్స అత్తనో చిత్తరుచియా అనత్థం కరోతీ’’తి ఏవం చిన్తేత్వా ఆఘాతం పటివినేతి. అథ వా సచాహం కోపం కరేయ్యం, తం కోపకరణం ఏత్థ పుగ్గలే కుతో లబ్భా, కేన కారణేన లద్ధబ్బన్తి అత్థో. కుతో లాభాతిపి పాఠో. సచాహం ఏత్థ కోపం కరేయ్యం, తస్మిం మే కోపకరణే కుతో లాభా లాభా, నామ కే సియున్తి అత్థో. ఇమస్మిఞ్చ అత్థే తన్తి నిపాతమత్తమేవ హోతి. ఏకాదసమే అనుపుబ్బనిరోధాతి అనుపటిపాటినిరోధా. సేసం సబ్బత్థ ఉత్తానత్థమేవాతి.
సత్తావాసవగ్గో తతియో.