౧. తిఠానసుత్తవణ్ణనా

౨౧. తతియస్స పఠమే ఉత్తరకురుకాతి ఉత్తరకురువాసినో. అధిగ్గణ్హన్తీతి అధిభవన్తి, అధికా విసిట్ఠా జేట్ఠకా హోన్తి. అమమాతి నిత్తణ్హా. అట్ఠకథాయం పన నిద్దుక్ఖాతి వుత్తం. అపరిగ్గహాతి ‘‘ఇదం మయ్హ’’న్తి పరిగ్గహరహితా. నియతాయుకాతి తేసఞ్హి నిబద్ధం ఆయు వస్ససహస్సమేవ, గతిపి నిబద్ధా, తతో చవిత్వా సగ్గేయేవ నిబ్బత్తన్తి. సతిమన్తోతి దేవతానఞ్హి ఏకన్తసుఖితాయ సతి థిరా న హోతి, నేరయికానం ఏకన్తదుక్ఖితాయ. ఇమేసం పన వోకిణ్ణసుఖదుక్ఖత్తా సతి థిరా హోతి. ఇధ బ్రహ్మచరియవాసోతి జమ్బుదీపే బుద్ధపచ్చేకబుద్ధానం ఉప్పజ్జనతో అట్ఠఙ్గికమగ్గబ్రహ్మచరియవాసోపి ఇధేవ హోతి.