(౨౬) ౬. ఉపసమ్పదావగ్గో

౧-౩. ఉపసమ్పాదేతబ్బసుత్తాదివణ్ణనా

౨౫౧-౨౫౩. ఛట్ఠస్స పఠమే ఉపసమ్పాదేతబ్బన్తి ఉపజ్ఝాయేన హుత్వా ఉపసమ్పాదేతబ్బం. దుతియే నిస్సయో దాతబ్బోతి ఆచరియేన హుత్వా నిస్సయో దాతబ్బో. తతియే సామణేరో ఉపట్ఠాపేతబ్బోతి ఉపజ్ఝాయేన హుత్వా సామణేరో గహేతబ్బో. ఇతి ఇమాని తీణిపి సుత్తాని పఠమబోధియం ఖీణాసవవసేన వుత్తాని. చతుత్థాదీని అనుపదవణ్ణనాతో ఉత్తానత్థానేవ.

౧. సమ్ముతిపేయ్యాలాదివణ్ణనా

౨౭౨. భత్తుద్దేసకాదీనం వినిచ్ఛయకథా సమన్తపాసాదికాయ వినయట్ఠకథాయం (చూళవ. అట్ఠ. ౩౨౫) వుత్తనయేన వేదితబ్బాతి. సమ్మతో న పేసేతబ్బోతి పకతియా సమ్మతో ‘‘గచ్ఛ భత్తాని ఉద్దిసాహీ’’తి న పేసేతబ్బో.

౨౭౩-౨౮౫. సాటియగ్గాహాపకోతి వస్సికసాటికాయ గాహాపకో. పత్తగ్గాహాపకోతి ‘‘యో చ తస్సా భిక్ఖుపరిసాయ పత్తపరియన్తో, సో తస్స భిక్ఖునో పదాతబ్బో’’తి ఏత్థ వుత్తపత్తగ్గాహాపకో.

౨౯౩-౩౦౨. ఆజీవకోతి నగ్గపరిబ్బాజకో. నిగణ్ఠోతి పురిమభాగప్పటిచ్ఛన్నో. ముణ్డసావకోతి నిగణ్ఠసావకో. జటిలకోతి తాపసో. పరిబ్బాజకోతి ఛన్నపరిబ్బాజకో. మాగణ్డికాదయోపి తిత్థియా ఏవ. ఏతేసం పన సీలేసు పరిపూరకారితాయ అభావేన సుక్కపక్ఖో న గహితో. సేసమేత్థ ఉత్తానమేవాతి.

మనోరథపూరణియా అఙ్గుత్తరనికాయ-అట్ఠకథాయ