౯. చఙ్కమసుత్తవణ్ణనా

౨౯. నవమే అద్ధానక్ఖమో హోతీతి దూరం అద్ధానమగ్గం గచ్ఛన్తో ఖమతి, అధివాసేతుం సక్కోతి. పధానక్ఖమోతి వీరియక్ఖమో. చఙ్కమాధిగతో సమాధీతి చఙ్కమం అధిట్ఠహన్తేన అధిగతో అట్ఠన్నం సమాపత్తీనం అఞ్ఞతరసమాధి. చిరట్ఠితికో హోతీతి చిరం తిట్ఠతి. ఠితకేన గహితనిమిత్తఞ్హి నిసిన్నస్స నస్సతి, నిసిన్నేన గహితనిమిత్తం నిపన్నస్స. చఙ్కమం అధిట్ఠహన్తేన చలితారమ్మణే గహితనిమిత్తం పన ఠితస్సపి నిసిన్నస్సపి నిపన్నస్సపి న నస్సతీతి.