(౨౬) ౬. అభిఞ్ఞావగ్గో

౧-౩. అభిఞ్ఞాసుత్తాదివణ్ణనా

౨౫౪-౨౫౬. ఛట్ఠస్స పఠమే అభిఞ్ఞాయాతి జానిత్వా. సమథో చ విపస్సనా చాతి చిత్తేకగ్గతా చ సఙ్ఖారపరిగ్గహవిపస్సనాఞాణఞ్చ. విజ్జా చ విముత్తి చాతి మగ్గఞాణవిజ్జా చ సేసా సమ్పయుత్తకధమ్మా చ. దుతియే అనరియపరియేసనాతి అనరియానం ఏసనా గవేసనా. జరాధమ్మన్తి జరాసభావం. సేసేసుపి ఏసేవ నయో. తతియం ఉత్తానమేవ.

౪. మాలుక్యపుత్తసుత్తవణ్ణనా

౨౫౭. చతుత్థే మాలుక్యపుత్తోతి మాలుక్యబ్రాహ్మణియా పుత్తో. ఏత్థాతి ఏతస్మిం తవ ఓవాదయాచనే. ఇమినా థేరం అపసాదేతిపి ఉస్సాదేతిపి. కథం? అయం కిర దహరకాలే పచ్చయేసు లగ్గో హుత్వా పచ్ఛా మహల్లకకాలే అరఞ్ఞవాసం పత్థేన్తో కమ్మట్ఠానం యాచతి. అథ భగవా ‘‘ఏత్థ దహరే కిం వక్ఖామ, మాలుక్యపుత్తో వియ తుమ్హేపి తరుణకాలే పచ్చయేసు లగ్గిత్వా మహల్లకకాలే అరఞ్ఞం పవిసిత్వా సమణధమ్మం కరేయ్యాథా’’తి ఇమినా అధిప్పాయేన భణన్తో థేరం అపసాదేతి నామ. యస్మా పన థేరో మహల్లకకాలేవ అరఞ్ఞం పవిసిత్వా సమణధమ్మం కాతుకామో, తస్మా భగవా ‘‘ఏత్థ దహరే కిం వక్ఖామ, అయం అమ్హాకం మాలుక్యపుత్తో మహల్లకకాలేపి అరఞ్ఞం పవిసిత్వా సమణధమ్మం కాతుకామో కమ్మట్ఠానం యాచతి. తుమ్హే తావ తరుణకాలేపి వీరియం న కరోథా’’తి ఇమినా అధిప్పాయేన భణన్తో థేరం ఉస్సాదేతి నామాతి యోజనా.

౫-౧౦. కులసుత్తాదివణ్ణనా

౨౫౮-౨౬౩. పఞ్చమే ఆధిపచ్చే ఠపేన్తీతి భణ్డాగారికట్ఠానే ఠపేన్తి. ఛట్ఠే వణ్ణసమ్పన్నోతి సరీరవణ్ణేన సమన్నాగతో. బలసమ్పన్నోతి కాయబలేన సమన్నాగతో. భిక్ఖువారే వణ్ణసమ్పన్నోతి గుణవణ్ణేన సమన్నాగతో. బలసమ్పన్నోతి వీరియబలేన సమన్నాగతో. జవసమ్పన్నోతి ఞాణజవేన సమన్నాగతో. సత్తమేపి ఏసేవ నయో. సేసమేత్థ ఉత్తానమేవాతి.

అభిఞ్ఞావగ్గో ఛట్ఠో.