౮. పతిలీనసుత్తవణ్ణనా

౩౮. అట్ఠమే పనుణ్ణపచ్చేకసచ్చోతి ‘‘ఇదమేవ దస్సనం సచ్చం, ఇదమేవ సచ్చ’’న్తి ఏవం పాటిఏక్కం గహితత్తా పచ్చేకసఙ్ఖాతాని దిట్ఠిసచ్చాని పనుణ్ణాని నీహటాని పహీనాని అస్సాతి పనుణ్ణపచ్చేకసచ్చో. సమవయసట్ఠేసనోతి ఏత్థ అవయాతి అనూనా, సట్ఠాతి విస్సట్ఠా, సమ్మా అవయా సట్ఠా ఏసనా అస్సాతి సమవయసట్ఠేసనో, సమ్మా విస్సట్ఠసబ్బఏసనోతి అత్థో. పతిలీనోతి నిలీనో ఏకీభావం ఉపగతో. పుథుసమణబ్రాహ్మణానన్తి బహూనం సమణబ్రాహ్మణానం. ఏత్థ చ సమణాతి పబ్బజ్జూపగతా, బ్రాహ్మణాతి భోవాదినో. పుథుపచ్చేకసచ్చానీతి బహూని పాటేక్కసచ్చాని. నుణ్ణానీతి నీహటాని. పనుణ్ణానీతి సుట్ఠు నీహటాని. చత్తానీతి విస్సట్ఠాని. వన్తానీతి వమితాని. ముత్తానీతి ఛిన్నబన్ధనాని కతాని. పహీనానీతి పజహితాని. పటినిస్సట్ఠానీతి యథా న పున చిత్తం ఆరోహన్తి, ఏవం పటినిస్సజ్జితాని. సబ్బానేవేతాని గహితగహణస్స విస్సట్ఠభావవేవచనాని.

కామేసనా పహీనా హోతీతి అనాగామిమగ్గేన పహీనా. భవేసనా పన అరహత్తమగ్గేన పహీయతి. ‘‘బ్రహ్మచరియం ఏసిస్సామి గవేసిస్సామీ’’తి ఏవం పవత్తజ్ఝాసయసఙ్ఖాతా బ్రహ్మచరియేసనాపి అరహత్తమగ్గేనేవ పటిప్పస్సద్ధిం వూపసమం గచ్ఛతి. దిట్ఠిబ్రహ్మచరియేసనా పన సోతాపత్తిమగ్గేనేవ పటిప్పసమ్భతీతి వేదితబ్బా. ఏవం ఖో, భిక్ఖవేతి ఏవం చతుత్థజ్ఝానేన పస్సద్ధకాయసఙ్ఖారో వూపసన్తఅస్సాసపస్సాసో నామ హోతి. అస్మిమానోతి అస్మీతి ఉప్పజ్జనకో నవవిధమానో.

గాథాసు కామేసనా భవేసనాతి ఏతా ద్వే ఏసనా, బ్రహ్మచరియేసనా సహాతి తాహియేవ సహ బ్రహ్మచరియేసనాతి తిస్సోపి ఏతా. ఇధ ఠత్వా ఏసనా పటినిస్సట్ఠాతి ఇమినా పదేన సద్ధిం యోజనా కాతబ్బా. ఇతి సచ్చపరామాసో, దిట్ఠిట్ఠానా సముస్సయాతి ‘‘ఇతి సచ్చం ఇతి సచ్చ’’న్తి గహణపరామాసో చ దిట్ఠిసఙ్ఖాతాయేవ దిట్ఠిట్ఠానా చ యే సముస్సితత్తా ఉగ్గన్త్వా ఠితత్తా సముస్సయాతి వుచ్చన్తి, తే సబ్బేపి. ఇధ ఠత్వా దిట్ఠిట్ఠానా సమూహతాతి ఇమినా పదేన సద్ధిం యోజనా కాతబ్బా. కస్స పన ఏతా ఏసనా పటినిస్సట్ఠా, ఏతే చ దిట్ఠిట్ఠానా సమూహతాతి? సబ్బరాగవిరత్తస్స తణ్హాక్ఖయవిముత్తినో. యో హి సబ్బరాగేహిపి విరత్తో, తణ్హాక్ఖయే చ నిబ్బానే పవత్తాయ అరహత్తఫలవిముత్తియా సమన్నాగతో, ఏతస్స ఏసనా పటినిస్సట్ఠా, దిట్ఠిట్ఠానా చ సమూహతా. స వే సన్తోతి సో ఏవరూపో కిలేససన్తతాయ సన్తో. పస్సద్ధోతి ద్వీహి కాయచిత్తపస్సద్ధీహి పస్సద్ధో. అపరాజితోతి సబ్బకిలేసే జినిత్వా ఠితత్తా కేనచి అపరాజితో. మానాభిసమయాతి మానస్స పహానాభిసమయేన. బుద్ధోతి చత్తారి సచ్చాని బుజ్ఝిత్వా ఠితో. ఇతి ఇమస్మిం సుత్తేపి గాథాసుపి ఖీణాసవోవ కథితోతి.