(౧౬) ౬. అచేలకవగ్గవణ్ణనా

౧౫౭-౧౬౩. ఇతో పరేసు ఆగాళ్హా పటిపదాతి గాళ్హా కక్ఖళా లోభవసేన థిరగ్గహణా. నిజ్ఝామాతి అత్తకిలమథానుయోగవసేన సుట్ఠు ఝామా సన్తత్తా పరితత్తా. మజ్ఝిమాతి నేవ కక్ఖళా న ఝామా మజ్ఝే భవా. అచేలకోతి నిచ్చేలో నగ్గో. ముత్తాచారోతి విస్సట్ఠాచారో, ఉచ్చారకమ్మాదీసు లోకియకులపుత్తాచారేన విరహితో ఠితకోవ ఉచ్చారం కరోతి, పస్సావం కరోతి, ఖాదతి భుఞ్జతి. హత్థాపలేఖనోతి హత్థే పిణ్డమ్హి నిట్ఠితే జివ్హాయ హత్థం అపలేఖతి, ఉచ్చారమ్పి కత్వా హత్థస్మింయేవ దణ్డకసఞ్ఞీ హుత్వా హత్థేన అపలేఖతి. భిక్ఖాయ గహణత్థం ‘‘ఏహి, భదన్తే’’తి వుత్తో న ఏతీతి న ఏహిభదన్తికో. ‘‘తేన హి తిట్ఠ, భన్తే’’తి వుత్తోపి న తిట్ఠతీతి న తిట్ఠభదన్తికో. తదుభయమ్పి కిర సో ‘‘ఏతస్స వచనం కతం భవిస్సతీ’’తి న కరోతి. అభిహటన్తి పురేతరం గహేత్వా ఆహటభిక్ఖం. ఉద్దిస్సకతన్తి ఇదం తుమ్హే ఉద్దిస్స కతన్తి ఏవమారోచితభిక్ఖం. నిమన్తనన్తి ‘‘అసుకం నామ కులం వా వీథిం వా గామం వా పవిసేయ్యాథా’’తి ఏవం నిమన్తితభిక్ఖమ్పి న సాదియతి న గణ్హాతి. న కుమ్భిముఖాతి కుమ్భితో ఉద్ధరిత్వా దీయమానం భిక్ఖమ్పి న గణ్హాతి. న కళోపిముఖాతి కళోపీతి ఉక్ఖలి వా పచ్ఛి వా, తతోపి న గణ్హాతి. కస్మా? ‘‘కుమ్భికళోపియో మం నిస్సాయ కటచ్ఛునా పహారం లభన్తీ’’తి. న ఏళకమన్తరన్తి ఉమ్మారం అన్తరం కత్వా దీయమానం న గణ్హాతి. కస్మా? ‘‘అయం మం నిస్సాయ అన్తరకరణం లభతీ’’తి. దణ్డముసలేసుపి ఏసేవ నయో. ద్విన్నన్తి ద్వీసు భుఞ్జమానేసు ఏకస్మిం ఉట్ఠాయ దేన్తే న గణ్హాతి. కస్మా? కబళన్తరాయో హోతీతి.

న గబ్భినియాతిఆదీసు పన గబ్భినియా కుచ్ఛియం దారకో కిలమతి, పాయన్తియా దారకస్స ఖీరన్తరాయో హోతి, పురిసన్తరగతాయ రతిఅన్తరాయో హోతీతి న గణ్హాతి. న సఙ్కిత్తీసూతి సఙ్కిత్తేత్వా కతభత్తేసు. దుబ్భిక్ఖసమయే కిర అచేలకసావకా అచేలకానం అత్థాయ తతో తతో తణ్డులాదీని సమాదపేత్వా భత్తం పచన్తి, ఉక్కట్ఠాచేలకో తతో న పటిగ్గణ్హాతి. న యత్థ సాతి యత్థ సునఖో ‘‘పిణ్డం లభిస్సామీ’’తి ఉపట్ఠితో హోతి, తత్థ తస్స అదత్వా ఆహటం న గణ్హాతి. కస్మా? ఏతస్స పిణ్డన్తరాయో హోతీతి. సణ్డసణ్డచారినీతి సమూహసమూహచారినీ. సచే హి అచేలకం దిస్వా ‘‘ఇమస్స భిక్ఖం దస్సామా’’తి మనుస్సా భత్తగేహం పవిసన్తి, తేసు చ పవిసన్తేసు కళోపిముఖాదీసు నిలీనా మక్ఖికా ఉప్పతిత్వా సణ్డసణ్డా చరన్తి, తతో ఆహటం భిక్ఖం న గణ్హాతి. కస్మా? ‘‘మం నిస్సాయ మక్ఖికానం గోచరన్తరాయో జాతో’’తి.

థుసోదకన్తి సబ్బసస్ససమ్భారేహి కతసోవీరకం. ఏత్థ చ సురాపానమేవ సావజ్జం, అయం పన సబ్బేసు సావజ్జసఞ్ఞీ. ఏకాగారికోతి యో ఏకస్మింయేవ గేహే భిక్ఖం లభిత్వా నివత్తతి. ఏకాలోపికోతి ఏకేనేవ ఆలోపేన యాపేతి. ద్వాగారికాదీసుపి ఏసేవ నయో. ఏకిస్సాపి దత్తియాతి ఏకాయ దత్తియా. దత్తి నామ ఏకా ఖుద్దకపాతి హోతి, యత్థ అగ్గభిక్ఖం పక్ఖిపిత్వా ఠపేన్తి. ఏకాహికన్తి ఏకదివసన్తరికం. అద్ధమాసికన్తి అద్ధమాసన్తరికం. పరియాయభత్తభోజనన్తి వారభత్తభోజనం, ఏకాహవారేన ద్వీహవారేన సత్తాహవారేన అద్ధమాసవారేనాతి ఏవం దివసవారేన ఆభతభత్తభోజనం. సాకభక్ఖోతిఆదీని వుత్తత్థానేవ.

ఉబ్భట్ఠకోతి ఉద్ధం ఠితకో. ఉక్కుటికప్పధానమనుయుత్తోతి ఉక్కుటికవీరియమనుయుత్తో, గచ్ఛన్తోపి ఉక్కుటికోవ హుత్వా ఉప్పతిత్వా ఉప్పతిత్వా గచ్ఛతి. కణ్టకాపస్సయికోతి అయకణ్టకే వా పకతికణ్టకే వా భూమియం కోట్టేత్వా తత్థ చమ్మం అత్థరిత్వా ఠానచఙ్కమాదీని కరోతి. సేయ్యన్తి సయన్తోపి తత్థేవ సేయ్యం కప్పేతి. సాయం తతియమస్సాతి సాయతతియకం. పాతో మజ్ఝన్హికే సాయన్తి దివసస్స తిక్ఖత్తుం ‘‘పాపం పవాహేస్సామీ’’తి ఉదకోరోహనానుయోగం అనుయుత్తో విహరతి.

కాయే కాయానుపస్సీతిఆదీని హేట్ఠా ఏకకనిపాతవణ్ణనాయం వుత్తనయేనేవ వేదితబ్బాని. అయం వుచ్చతి, భిక్ఖవే, మజ్ఝిమా పటిపదాతి, భిక్ఖవే, అయం కామసుఖల్లికానుయోగఞ్చ అత్తకిలమథానుయోగఞ్చాతి ద్వే అన్తే అనుపగతా, సస్సతుచ్ఛేదన్తేహి వా విముత్తా మజ్ఝిమా పటిపదాతి వేదితబ్బా.

అచేలకవగ్గో ఛట్ఠో.