౫-౬. సఙ్గారవసుత్తాదివణ్ణనా

౧౧౭-౧౧౮. పఞ్చమే ఓరిమం తీరన్తి లోకియం ఓరిమతీరం. పారిమం తీరన్తి లోకుత్తరం పారిమతీరం. పారగామినోతి నిబ్బానగామినో. తీరమేవానుధావతీతి సక్కాయదిట్ఠితీరంయేవ అనుధావతి. ధమ్మే ధమ్మానువత్తినోతి సమ్మా అక్ఖాతే నవవిధే లోకుత్తరధమ్మే అనుధమ్మవత్తినో, తస్స ధమ్మస్సానుచ్ఛవికాయ సహసీలాయ పుబ్బభాగపటిపత్తియా పవత్తమానా. మచ్చుధేయ్యం సుదుత్తరన్తి మచ్చునో ఠానభూతం తేభూమకవట్టం సుదుత్తరం తరిత్వా. పారమేస్సన్తీతి నిబ్బానం పాపుణిస్సన్తి.

ఓకా అనోకమాగమ్మాతి వట్టతో వివట్టం ఆగమ్మ. వివేకే యత్థ దూరమన్తి యస్మిం కాయచిత్తఉపధివివేకే దురభిరమం, తత్రాభిరతిమిచ్ఛేయ్య. హిత్వా కామేతి దువిధేపి కామే పహాయ. అకిఞ్చనోతి నిప్పలిబోధో. ఆదానపటినిస్సగేతి గహణపటినిస్సగ్గసఙ్ఖాతే నిబ్బానే. అనుపాదాయ యే రతాతి చతూహి ఉపాదానేహి కిఞ్చిపి అనుపాదియిత్వా యే అభిరతా. పరినిబ్బుతాతి తే అపచ్చయపరినిబ్బానేన పరినిబ్బుతా నామాతి వేదితబ్బా. ఛట్ఠం భిక్ఖూనం దేసితం.