౬. నిజ్జరసుత్తవణ్ణనా

౧౦౬. ఛట్ఠే నిజ్జరవత్థూనీతి నిజ్జరకారణాని. మిచ్ఛాదిట్ఠి నిజ్జిణ్ణా హోతీతి అయం హేట్ఠా విపస్సనాయపి నిజ్జిణ్ణా ఏవ పహీనా. కస్మా పున గహితాతి? అసముచ్ఛిన్నత్తా. విపస్సనాయ హి కిఞ్చాపి నిజ్జిణ్ణా, న పన సముచ్ఛిన్నా. మగ్గో పన ఉప్పజ్జిత్వా తం సముచ్ఛిన్దతి, న పున వుట్ఠాతుం దేతి. తస్మా పున గహితా. ఏవం సబ్బపదేసు యోజేతబ్బో. ఏత్థ చ సమ్మావిముత్తిపచ్చయా చతుసట్ఠి ధమ్మా భావనాపారిపూరిం గచ్ఛన్తి. కతమే చతుసట్ఠి? సోతాపత్తిమగ్గక్ఖణే అధిమోక్ఖట్ఠేన సద్ధిన్ద్రియం పరిపూరతి, పగ్గహట్ఠేన వీరియిన్ద్రియం, ఉపట్ఠానట్ఠేన సతిన్ద్రియం, అవిక్ఖేపట్ఠేన సమాధిన్ద్రియం, దస్సనట్ఠేన పఞ్ఞిన్ద్రియం పరిపూరేతి, విజాననట్ఠేన మనిన్ద్రియం, అభినన్దనట్ఠేన సోమనస్సిన్ద్రియం, పవత్తసన్తతిఆధిపతేయ్యట్ఠేన జీవితిన్ద్రియం పరిపూరతి…పే… అరహత్తఫలక్ఖణే అధిమోక్ఖట్ఠేన సద్ధిన్ద్రియం…పే… పవత్తసన్తతిఆధిపతేయ్యట్ఠేన జీవితిన్ద్రియం పరిపూరతీతి ఏవం చతూసు చ మగ్గేసు చతూసు చ ఫలేసు అట్ఠట్ఠ హుత్వా చతుసట్ఠి ధమ్మా పారిపూరిం గచ్ఛన్తి.