౪. వజ్జియమాహితసుత్తవణ్ణనా

౯౪. చతుత్థే వజ్జియమాహితోతి ఏవంనామకో. సబ్బం తపన్తి సబ్బమేవ దుక్కరకారికం. సబ్బం తపస్సిన్తి సబ్బం తపనిస్సితకం. లూఖాజీవిన్తి దుక్కరకారికజీవికానుయోగం అనుయుత్తం. గారయ్హన్తి గరహితబ్బయుత్తకం. పసంసియన్తి పసంసితబ్బయుత్తకం. వేనయికోతి సయం అవినీతో అఞ్ఞేహి వినేతబ్బో. అపఞ్ఞత్తికోతి న కిఞ్చి పఞ్ఞాపేతుం సక్కోతి. అథ వా వేనయికోతి సత్తవినాసకో. అపఞ్ఞత్తికోతి అపచ్చక్ఖం నిబ్బానం పఞ్ఞాపేతి, సయంకతాదీసు కిఞ్చి పఞ్ఞాపేతుం న సక్కోతి. న సో భగవా వేనయికోతి సో భగవా ఏవం యాథావతో ఞత్వా కుసలాకుసలం పఞ్ఞాపేన్తో న అఞ్ఞేన వినేతబ్బో న అఞ్ఞసిక్ఖితో. యే చ ధమ్మే ఉపాదాయ సత్తో పఞ్ఞాపియతి, తేసం పఞ్ఞాపనతో న సత్తవినాసకో, సువినీతో సుసిక్ఖితో సత్తవినాయకోతి అత్థో. తస్స చ పఞ్ఞత్తియో సపఞ్ఞత్తియోయేవాతి దస్సేతి. విముత్తిం విముచ్చతో అకుసలా ధమ్మాతి మిచ్ఛాదిట్ఠిసఙ్ఖాతం చిత్తస్స అధిముత్తిం అధిముచ్చతో అకుసలా ధమ్మా వడ్ఢన్తి నామ, తం సన్ధాయేతం వుత్తం. సాసనే పన చిత్తస్స విముత్తిసఙ్ఖాతో విముత్తి కుసలానంయేవ పచ్చయో హోతి.