౮. దుతియమహాపఞ్హసుత్తవణ్ణనా

౨౮. అట్ఠమే కజఙ్గలాయన్తి ఏవంనామకే నగరే. కజఙ్గలాతి కజఙ్గలావాసినో. మహాపఞ్హేసూతి మహన్తఅత్థపరిగ్గాహకేసు పఞ్హేసు. యథా మేత్థ ఖాయతీతి యథా మే ఏత్థ ఉపట్ఠాతి. సమ్మా సుభావితచిత్తోతి హేతునా నయేన సుట్ఠు భావితచిత్తో. ఏసో చేవ తస్స అత్థోతి కిఞ్చాపి భగవతా ‘‘చత్తారో ధమ్మా’’తిఆదయో పఞ్హా ‘‘చత్తారో ఆహారా’’తిఆదినా నయేన విస్సజ్జితా, యస్మా పన చతూసు ఆహారేసు పరిఞ్ఞాతేసు చత్తారో సతిపట్ఠానా భావితా హోన్తి, తేసు చ భావితేసు చత్తారో ఆహారా పరిఞ్ఞాతావ హోన్తి. తస్మా దేసనావిలాసేన బ్యఞ్జనమేవేత్థ నానం, అత్థో పన ఏకోయేవ. ఇన్ద్రియాదీసుపి ఏసేవ నయో. తేన వుత్తం – ‘‘ఏసో చేవ తస్స అత్థో’’తి. అత్థతో హి ఉభయమ్పేతం మజ్ఝే భిన్నసువణ్ణమివ హోతి.