౨౦. అమతవగ్గవణ్ణనా

౬౦౦-౬౧౧. అమతం తే, భిక్ఖవే, న పరిభుఞ్జన్తీతి మరణవిరహితం నిబ్బానం న పరిభుఞ్జన్తీతి అత్థో. నను చ నిబ్బానం లోకుత్తరం, కాయగతాసతి లోకియా, కథం తం పరిభుఞ్జన్తా అమతం పరిభుఞ్జన్తీతి? తం భావేత్వా అధిగన్తబ్బతో. కాయగతఞ్హి సతిం భావేన్తో అమతమధిగచ్ఛతి, అభావేన్తో నాధిగచ్ఛతి. తస్మా ఏవం వుత్తం. ఏతేనుపాయేన సబ్బత్థ అత్థో వేదితబ్బో. అపి చేత్థ విరద్ధన్తి విరాధితం నాధిగతం. ఆరద్ధన్తి పరిపుణ్ణం. పమాదింసూతి పమజ్జన్తి. పముట్ఠన్తి సమ్ముట్ఠం విస్సరితం నట్ఠం వా. ఆసేవితన్తి ఆదితో సేవితం. భావితన్తి వడ్ఢితం. బహులీకతన్తి పునప్పునం కతం. అనభిఞ్ఞాతన్తి ఞాతఅభిఞ్ఞాయ అజానితం. అపరిఞ్ఞాతన్తి ఞాతపరిఞ్ఞావసేనేవ అపరిఞ్ఞాతం. అసచ్ఛికతన్తి అపచ్చక్ఖకతం. సేసం సబ్బత్థ ఉత్తానత్థమేవాతి.

అమతవగ్గవణ్ణనా.