౩. అనాగతవారో

(క) అనులోమం

౪౫౧. (క) యో చక్ఖున్ద్రియం పరిజానిస్సతి సో దోమనస్సిన్ద్రియం పజహిస్సతీతి?

ద్వే పుగ్గలా చక్ఖున్ద్రియం పరిజానిస్సన్తి, నో చ దోమనస్సిన్ద్రియం పజహిస్సన్తి. పఞ్చ పుగ్గలా చక్ఖున్ద్రియఞ్చ పరిజానిస్సన్తి దోమనస్సిన్ద్రియఞ్చ పజహిస్సన్తి.

(ఖ) యో వా పన దోమనస్సిన్ద్రియం పజహిస్సతి సో చక్ఖున్ద్రియం పరిజానిస్సతీతి? ఆమన్తా.

(క) యో చక్ఖున్ద్రియం పరిజానిస్సతి సో అనఞ్ఞాతఞ్ఞస్సామీతిన్ద్రియం భావేస్సతీతి?

ఛ పుగ్గలా చక్ఖున్ద్రియం పరిజానిస్సన్తి, నో చ అనఞ్ఞాతఞ్ఞస్సామీతిన్ద్రియం భావేస్సన్తి. యే పుథుజ్జనా మగ్గం పటిలభిస్సన్తి తే చక్ఖున్ద్రియఞ్చ పరిజానిస్సన్తి అనఞ్ఞాతఞ్ఞస్సామీతిన్ద్రియఞ్చ భావేస్సన్తి.

(ఖ) యో వా పన అనఞ్ఞాతఞ్ఞస్సామీతిన్ద్రియం భావేస్సతి సో చక్ఖున్ద్రియం పరిజానిస్సతీతి? ఆమన్తా.

(క) యో చక్ఖున్ద్రియం పరిజానిస్సతి సో అఞ్ఞిన్ద్రియం భావేస్సతీతి? ఆమన్తా.

(ఖ) యో వా పన అఞ్ఞిన్ద్రియం భావేస్సతి సో చక్ఖున్ద్రియం పరిజానిస్సతీతి? ఆమన్తా.

(క) యో చక్ఖున్ద్రియం పరిజానిస్సతి సో అఞ్ఞాతావిన్ద్రియం సచ్ఛికరిస్సతీతి? ఆమన్తా.

(ఖ) యో వా పన అఞ్ఞాతావిన్ద్రియం సచ్ఛికరిస్సతి సో చక్ఖున్ద్రియం పరిజానిస్సతీతి?

అగ్గమగ్గసమఙ్గీ అఞ్ఞాతావిన్ద్రియం సచ్ఛికరిస్సతి, నో చ చక్ఖున్ద్రియం పరిజానిస్సతి. సత్త పుగ్గలా అఞ్ఞాతావిన్ద్రియఞ్చ సచ్ఛికరిస్సన్తి చక్ఖున్ద్రియఞ్చ పరిజానిస్సన్తి. (చక్ఖున్ద్రియమూలకం)

౪౫౨. (క) యో దోమనస్సిన్ద్రియం పజహిస్సతి సో అనఞ్ఞాతఞ్ఞస్సామీతిన్ద్రియం భావేస్సతీతి?

చత్తారో పుగ్గలా దోమనస్సిన్ద్రియం పజహిస్సన్తి, నో చ అనఞ్ఞాతఞ్ఞస్సామీతిన్ద్రియం భావేస్సన్తి. యే పుథుజ్జనా మగ్గం పటిలభిస్సన్తి తే దోమనస్సిన్ద్రియఞ్చ పజహిస్సన్తి అనఞ్ఞాతఞ్ఞస్సామీతిన్ద్రియఞ్చ భావేస్సన్తి.

(ఖ) యో వా పన అనఞ్ఞాతఞ్ఞస్సామీతిన్ద్రియం భావేస్సతి సో దోమనస్సిన్ద్రియం పజహిస్సతీతి? ఆమన్తా.

(క) యో దోమనస్సిన్ద్రియం పజహిస్సతి సో అఞ్ఞిన్ద్రియం భావేస్సతీతి? ఆమన్తా.

(ఖ) యో వా పన అఞ్ఞిన్ద్రియం భావేస్సతి సో దోమనస్సిన్ద్రియం పజహిస్సతీతి?

ద్వే పుగ్గలా అఞ్ఞిన్ద్రియం భావేస్సన్తి నో చ దోమనస్సిన్ద్రియం పజహిస్సన్తి, పఞ్చ పుగ్గలా అఞ్ఞిన్ద్రియఞ్చ భవిస్సన్తి దోమనస్సిన్ద్రియఞ్చ పజహిస్సన్తి.

(క) యో దోమనస్సిన్ద్రియం పజహిస్సతి సో అఞ్ఞాతావిన్ద్రియం సచ్ఛికరిస్సతీతి? ఆమన్తా.

(ఖ) యో వా పన అఞ్ఞాతావిన్ద్రియం సచ్ఛికరిస్సతి సో దోమనస్సిన్ద్రియం పజహిస్సతీతి?

తయో పుగ్గలా అఞ్ఞాతావిన్ద్రియం సచ్ఛికరిస్సన్తి, నో చ దోమనస్సిన్ద్రియం పజహిస్సన్తి. పఞ్చ పుగ్గలా అఞ్ఞాతావిన్ద్రియఞ్చ సచ్ఛికరిస్సన్తి దోమనస్సిన్ద్రియఞ్చ పజహిస్సన్తి. (దోమనస్సిన్ద్రియమూలకం)

౪౫౩. (క) యో అనఞ్ఞాతఞ్ఞస్సామీతిన్ద్రియం భావేస్సతి సో అఞ్ఞిన్ద్రియం భావేస్సతీతి? ఆమన్తా.

(ఖ) యో వా పన అఞ్ఞిన్ద్రియం భావేస్సతి సో అనఞ్ఞాతఞ్ఞస్సామీతిన్ద్రియం భావేస్సతీతి?

ఛ పుగ్గలా అఞ్ఞిన్ద్రియం భావేస్సన్తి, నో చ అనఞ్ఞాతఞ్ఞస్సామీతిన్ద్రియం భావేస్సన్తి. యే పుథుజ్జనా మగ్గం పటిలభిస్సన్తి తే అఞ్ఞిన్ద్రియఞ్చ భావేస్సన్తి అనఞ్ఞాతఞ్ఞస్సామీతిన్ద్రియఞ్చ భావేస్సన్తి.

(క) యో అనఞ్ఞాతఞ్ఞస్సామీతిన్ద్రియం భావేస్సతి సో అఞ్ఞాతావిన్ద్రియం సచ్ఛికరిస్సతీతి? ఆమన్తా.

(ఖ) యో వా పన అఞ్ఞాతావిన్ద్రియం సచ్ఛికరిస్సతి సో అనఞ్ఞాతఞ్ఞస్సామీతిన్ద్రియం భావేస్సతీతి?

సత్త పుగ్గలా అఞ్ఞాతావిన్ద్రియం సచ్ఛికరిస్సన్తి, నో చ అనఞ్ఞాతఞ్ఞస్సామీతిన్ద్రియం భావేస్సన్తి. యే పుథుజ్జనా మగ్గం పటిలభిస్సన్తి తే అఞ్ఞాతావిన్ద్రియఞ్చ సచ్ఛికరిస్సన్తి అనఞ్ఞాతఞ్ఞస్సామీతిన్ద్రియఞ్చ భావేస్సన్తి. (అనఞ్ఞాతఞ్ఞస్సామీతిన్ద్రియమూలకం)

౪౫౪. (క) యో అఞ్ఞిన్ద్రియం భావేస్సతి సో అఞ్ఞాతావిన్ద్రియం సచ్ఛికరిస్సతీతి? ఆమన్తా.

(ఖ) యో వా పన అఞ్ఞాతావిన్ద్రియం సచ్ఛికరిస్సతి సో అఞ్ఞిన్ద్రియం భావేస్సతీతి?

అగ్గమగ్గసమఙ్గీ అఞ్ఞాతావిన్ద్రియం సచ్ఛికరిస్సన్తి, నో చ అఞ్ఞిన్ద్రియం భావేస్సన్తి. సత్త పుగ్గలా అఞ్ఞాతావిన్ద్రియఞ్చ సచ్ఛికరిస్సన్తి అఞ్ఞిన్ద్రియఞ్చ భావేస్సన్తి. (అఞ్ఞిన్ద్రియమూలకం)

(ఖ) పచ్చనీకం

౪౫౫. (క) యో చక్ఖున్ద్రియం న పరిజానిస్సతి సో దోమనస్సిన్ద్రియం నప్పజహిస్సతీతి? ఆమన్తా.

(ఖ) యో వా పన దోమనస్సిన్ద్రియం నప్పజహిస్సతి సో చక్ఖున్ద్రియం న పరిజానిస్సతీతి?

ద్వే పుగ్గలా దోమనస్సిన్ద్రియం నప్పజహిస్సన్తి, నో చ చక్ఖున్ద్రియం న పరిజానిస్సన్తి. తయో పుగ్గలా దోమనస్సిన్ద్రియఞ్చ నప్పజహిస్సన్తి చక్ఖున్ద్రియఞ్చ న పరిజానిస్సన్తి.

(క) యో చక్ఖున్ద్రియం న పరిజానిస్సతి సో అనఞ్ఞాతఞ్ఞస్సామీతిన్ద్రియం న భావేస్సతీతి. ఆమన్తా.

(ఖ) యో వా పన అనఞ్ఞాతఞ్ఞస్సామీతిన్ద్రియం న భావేస్సతి సో చక్ఖున్ద్రియం న పరిజానిస్సతీతి.

ఛ పుగ్గలా అనఞ్ఞాతఞ్ఞస్సామీతిన్ద్రియం న భావేస్సన్తి, నో చ చక్ఖున్ద్రియం న పరిజానిస్సన్తి. తయో పుగ్గలా అనఞ్ఞాతఞ్ఞస్సామీతిన్ద్రియఞ్చ న భావేస్సన్తి చక్ఖున్ద్రియఞ్చ న పరిజానిస్సన్తి.

(క) యో చక్ఖున్ద్రియం న పరిజానిస్సతి సో అఞ్ఞిన్ద్రియం న భావేస్సతీతి? ఆమన్తా.

(ఖ) యో వా పన అఞ్ఞిన్ద్రియం న భావేస్సతి సో చక్ఖున్ద్రియం న పరిజానిస్సతీతి? ఆమన్తా.

(క) యో చక్ఖున్ద్రియం న పరిజానిస్సతి సో అఞ్ఞాతావిన్ద్రియం న సచ్ఛికరిస్సతీతి?

అగ్గమగ్గసమఙ్గీ చక్ఖున్ద్రియం న పరిజానిస్సతి, నో చ అఞ్ఞాతావిన్ద్రియం న సచ్ఛికరిస్సతి. ద్వే పుగ్గలా చక్ఖున్ద్రియఞ్చ న పరిజానిస్సన్తి అఞ్ఞాతావిన్ద్రియఞ్చ న సచ్ఛికరిస్సన్తి.

(ఖ) యో వా పన అఞ్ఞాతావిన్ద్రియం న సచ్ఛికరిస్సతి సో చక్ఖున్ద్రియం న పరిజానిస్సతీతి? ఆమన్తా. (చక్ఖున్ద్రియమూలకం)

౪౫౬. (క) యో దోమనస్సిన్ద్రియం నప్పజహిస్సతి సో అనఞ్ఞాతఞ్ఞస్సామీతిన్ద్రియం న భావేస్సతీతి? ఆమన్తా.

(ఖ) యో వా పన అనఞ్ఞాతఞ్ఞస్సామీతిన్ద్రియం న భావేస్సతి సో దోమనస్సిన్ద్రియం నప్పజహిస్సతీతి?

చత్తారో పుగ్గలా అనఞ్ఞాతఞ్ఞస్సామీతిన్ద్రియం న భావేస్సన్తి, నో చ దోమనస్సిన్ద్రియం నప్పజహిస్సన్తి. పఞ్చ పుగ్గలా అనఞ్ఞాతఞ్ఞస్సామీతిన్ద్రియఞ్చ న భావేస్సన్తి దోమనస్సిన్ద్రియఞ్చ నప్పజహిస్సన్తి.

(క) యో దోమనస్సిన్ద్రియం నప్పజహిస్సతి సో అఞ్ఞిన్ద్రియం న భావేస్సతీతి?

ద్వే పుగ్గలా దోమనస్సిన్ద్రియం నప్పజహిస్సన్తి, నో చ అఞ్ఞిన్ద్రియం న భావేస్సన్తి. తయో పుగ్గలా దోమనస్సిన్ద్రియఞ్చ నప్పజహిస్సన్తి అఞ్ఞిన్ద్రియఞ్చ న భావేస్సన్తి.

(ఖ) యో వా పన అఞ్ఞిన్ద్రియం న భావేస్సతి సో దోమనస్సిన్ద్రియం నప్పజహిస్సతీతి? ఆమన్తా.

(క) యో దోమనస్సిన్ద్రియం నప్పజహిస్సతి సో అఞ్ఞాతావిన్ద్రియం న సచ్ఛికరిస్సతీతి?

తయో పుగ్గలా దోమనస్సిన్ద్రియం నప్పజహిస్సన్తి, నో చ అఞ్ఞాతావిన్ద్రియం న సచ్ఛికరిస్సన్తి. ద్వే పుగ్గలా దోమనస్సిన్ద్రియఞ్చ నప్పజహిస్సన్తి అఞ్ఞాతావిన్ద్రియఞ్చ న సచ్ఛికరిస్సన్తి.

(ఖ) యో వా పన అఞ్ఞాతావిన్ద్రియం న సచ్ఛికరిస్సతి సో దోమనస్సిన్ద్రియం నప్పజహిస్సతీతి? ఆమన్తా. (దోమనస్సిన్ద్రియమూలకం)

౪౫౭. (క) యో అనఞ్ఞాతఞ్ఞస్సామీతిన్ద్రియం న భావేస్సతి సో అఞ్ఞిన్ద్రియం న భావేస్సతీతి?

ఛ పుగ్గలా అనఞ్ఞాతఞ్ఞస్సామీతిన్ద్రియం న భావేస్సన్తి, నో చ అఞ్ఞిన్ద్రియం న భావేస్సన్తి. తయో పుగ్గలా అనఞ్ఞాతఞ్ఞస్సామీతిన్ద్రియఞ్చ న భావేస్సన్తి అఞ్ఞిన్ద్రియఞ్చ న భావేస్సన్తి.

(ఖ) యో వా పన అఞ్ఞిన్ద్రియం న భావేస్సతి సో అనఞ్ఞాతఞ్ఞస్సామీతిన్ద్రియం న భావేస్సతీతి? ఆమన్తా.

(క) యో అనఞ్ఞాతఞ్ఞస్సామీతిన్ద్రియం న భావేస్సతి సో అఞ్ఞాతావిన్ద్రియం న సచ్ఛికరిస్సతీతి?

సత్త పుగ్గలా అనఞ్ఞాతఞ్ఞస్సామీతిన్ద్రియం న భావేస్సన్తి, నో చ అఞ్ఞాతావిన్ద్రియం న సచ్ఛికరిస్సన్తి. ద్వే పుగ్గలా అనఞ్ఞాతఞ్ఞస్సామీతిన్ద్రియఞ్చ న భావేస్సన్తి అఞ్ఞాతావిన్ద్రియఞ్చ న సచ్ఛికరిస్సన్తి.

(ఖ) యో వా పన అఞ్ఞాతావిన్ద్రియం న సచ్ఛికరిస్సతి సో అనఞ్ఞాతఞ్ఞస్సామీతిన్ద్రియం న భావేస్సతీతి? ఆమన్తా. (అనఞ్ఞాతఞ్ఞస్సామీతిన్ద్రియమూలకం)

౪౫౮. (క) యో అఞ్ఞిన్ద్రియం న భావేస్సతి సో అఞ్ఞాతావిన్ద్రియం న సచ్ఛికరిస్సతీతి?

అగ్గమగ్గసమఙ్గీ అఞ్ఞిన్ద్రియం న భావేస్సతి, నో చ అఞ్ఞాతావిన్ద్రియం న సచ్ఛికరిస్సతి. ద్వే పుగ్గలా అఞ్ఞిన్ద్రియఞ్చ న భావేస్సన్తి అఞ్ఞాతావిన్ద్రియఞ్చ న సచ్ఛికరిస్సన్తి.

(ఖ) యో వా పన అఞ్ఞాతావిన్ద్రియం న సచ్ఛికరిస్సతి సో అఞ్ఞిన్ద్రియం న భావేస్సతీతి? ఆమన్తా. (అఞ్ఞిన్ద్రియమూలకం)