(౩) అనాగతవారో

(క) అనులోమపుగ్గలో

౫౭. (క) యస్స కుసలా ధమ్మా ఉప్పజ్జిస్సన్తి తస్స అకుసలా ధమ్మా ఉప్పజ్జిస్సన్తీతి?

యస్స చిత్తస్స అనన్తరా అగ్గమగ్గం పటిలభిస్సన్తి తేసం కుసలా ధమ్మా ఉప్పజ్జిస్సన్తి, నో చ తేసం అకుసలా ధమ్మా ఉప్పజ్జిస్సన్తి. ఇతరేసం తేసం కుసలా చ ధమ్మా ఉప్పజ్జిస్సన్తి అకుసలా చ ధమ్మా ఉప్పజ్జిస్సన్తి.

(ఖ) యస్స వా పన అకుసలా ధమ్మా ఉప్పజ్జిస్సన్తి తస్స కుసలా ధమ్మా ఉప్పజ్జిస్సన్తీతి? ఆమన్తా.

(క) యస్స కుసలా ధమ్మా ఉప్పజ్జిస్సన్తి తస్స అబ్యాకతా ధమ్మా ఉప్పజ్జిస్సన్తీతి? ఆమన్తా.

(ఖ) యస్స వా పన అబ్యాకతా ధమ్మా ఉప్పజ్జిస్సన్తి తస్స కుసలా ధమ్మా ఉప్పజ్జిస్సన్తీతి?

అగ్గమగ్గసమఙ్గీనం అరహన్తానం తేసం అబ్యాకతా ధమ్మా ఉప్పజ్జిస్సన్తి, నో చ తేసం కుసలా ధమ్మా ఉప్పజ్జిస్సన్తి. ఇతరేసం తేసం అబ్యాకతా చ ధమ్మా ఉప్పజ్జిస్సన్తి కుసలా చ ధమ్మా ఉప్పజ్జిస్సన్తి.

౫౮. (క) యస్స అకుసలా ధమ్మా ఉప్పజ్జిస్సన్తి తస్స అబ్యాకతా ధమ్మా ఉప్పజ్జిస్సన్తీతి? ఆమన్తా.

(ఖ) యస్స వా పన అబ్యాకతా ధమ్మా ఉప్పజ్జిస్సన్తి తస్స అకుసలా ధమ్మా ఉప్పజ్జిస్సన్తీతి?

అగ్గమగ్గసమఙ్గీనం అరహన్తానం యస్స చిత్తస్స అనన్తరా అగ్గమగ్గం పటిలభిస్సన్తి తేసం అబ్యాకతా ధమ్మా ఉప్పజ్జిస్సన్తి, నో చ తేసం అకుసలా ధమ్మా ఉప్పజ్జిస్సన్తి. ఇతరేసం తేసం అబ్యాకతా చ ధమ్మా ఉప్పజ్జిస్సన్తి అకుసలా చ ధమ్మా ఉప్పజ్జిస్సన్తి.

(ఖ) అనులోమఓకాసో

౫౯. (క) యత్థ కుసలా ధమ్మా ఉప్పజ్జిస్సన్తి తత్థ అకుసలా ధమ్మా ఉప్పజ్జిస్సన్తీతి? ఆమన్తా.

(ఖ) యత్థ వా పన అకుసలా ధమ్మా ఉప్పజ్జిస్సన్తి తత్థ కుసలా ధమ్మా ఉప్పజ్జిస్సన్తీతి? ఆమన్తా.

(క) యత్థ కుసలా ధమ్మా ఉప్పజ్జిస్సన్తి తత్థ అబ్యాకతా ధమ్మా ఉప్పజ్జిస్సన్తీతి? ఆమన్తా.

(ఖ) యత్థ వా పన అబ్యాకతా ధమ్మా ఉప్పజ్జిస్సన్తి తత్థ కుసలా ధమ్మా ఉప్పజ్జిస్సన్తీతి?

అసఞ్ఞసత్తే తత్థ అబ్యాకతా ధమ్మా ఉప్పజ్జిస్సన్తి, నో చ తత్థ కుసలా ధమ్మా ఉప్పజ్జిస్సన్తి. చతువోకారే పఞ్చవోకారే తత్థ అబ్యాకతా చ ధమ్మా ఉప్పజ్జిస్సన్తి కుసలా చ ధమ్మా ఉప్పజ్జిస్సన్తి.

౬౦. (క) యత్థ అకుసలా ధమ్మా ఉప్పజ్జిస్సన్తి తత్థ అబ్యాకతా ధమ్మా ఉప్పజ్జిస్సన్తీతి? ఆమన్తా.

(ఖ) యత్థ వా పన అబ్యాకతా ధమ్మా ఉప్పజ్జిస్సన్తి తత్థ అకుసలా ధమ్మా ఉప్పజ్జిస్సన్తీతి?

అసఞ్ఞసత్తే తత్థ అబ్యాకతా ధమ్మా ఉప్పజ్జిస్సన్తి, నో చ తత్థ అకుసలా ధమ్మా ఉప్పజ్జిస్సన్తి. చతువోకారే పఞ్చవోకారే తత్థ అబ్యాకతా చ ధమ్మా ఉప్పజ్జిస్సన్తి అకుసలా చ ధమ్మా ఉప్పజ్జిస్సన్తి.

(గ) అనులోమపుగ్గలోకాసా

౬౧. (క) యస్స యత్థ కుసలా ధమ్మా ఉప్పజ్జిస్సన్తి తస్స తత్థ అకుసలా ధమ్మా ఉప్పజ్జిస్సన్తీతి?

యస్స చిత్తస్స అనన్తరా అగ్గమగ్గం పటిలభిస్సన్తి తేసం తత్థ కుసలా ధమ్మా ఉప్పజ్జిస్సన్తి, నో చ తేసం తత్థ అకుసలా ధమ్మా ఉప్పజ్జిస్సన్తి. ఇతరేసం చతువోకారానం పఞ్చవోకారానం తేసం తత్థ కుసలా చ ధమ్మా ఉప్పజ్జిస్సన్తి అకుసలా చ ధమ్మా ఉప్పజ్జిస్సన్తి.

(ఖ) యస్స వా పన యత్థ అకుసలా ధమ్మా ఉప్పజ్జిస్సన్తి తస్స తత్థ కుసలా ధమ్మా ఉప్పజ్జిస్సన్తీతి? ఆమన్తా.

(క) యస్స యత్థ కుసలా ధమ్మా ఉప్పజ్జిస్సన్తి తస్స తత్థ అబ్యాకతా ధమ్మా ఉప్పజ్జిస్సన్తీతి? ఆమన్తా.

(ఖ) యస్స వా పన యత్థ అబ్యాకతా ధమ్మా ఉప్పజ్జిస్సన్తి తస్స తత్థ కుసలా ధమ్మా ఉప్పజ్జిస్సన్తీతి?

అగ్గమగ్గసమఙ్గీనం అరహన్తానం అసఞ్ఞసత్తానం తేసం తత్థ అబ్యాకతా ధమ్మా ఉప్పజ్జిస్సన్తి, నో చ తేసం తత్థ కుసలా ధమ్మా ఉప్పజ్జిస్సన్తి. ఇతరేసం చతువోకారానం పఞ్చవోకారానం తేసం తత్థ అబ్యాకతా చ ధమ్మా ఉప్పజ్జిస్సన్తి కుసలా చ ధమ్మా ఉప్పజ్జిస్సన్తి.

౬౨. (క) యస్స యత్థ అకుసలా ధమ్మా ఉప్పజ్జిస్సన్తి తస్స తత్థ అబ్యాకతా ధమ్మా ఉప్పజ్జిస్సన్తీతి? ఆమన్తా.

(ఖ) యస్స వా పన యత్థ అబ్యాకతా ధమ్మా ఉప్పజ్జిస్సన్తి తస్స తత్థ అకుసలా ధమ్మా ఉప్పజ్జిస్సన్తీతి?

అగ్గమగ్గసమఙ్గీనం అరహన్తానం యస్స చిత్తస్స అనన్తరా అగ్గమగ్గం పటిలభిస్సన్తి అసఞ్ఞసత్తానం తేసం తత్థ అబ్యాకతా ధమ్మా ఉప్పజ్జిస్సన్తి, నో చ తేసం తత్థ అకుసలా ధమ్మా ఉప్పజ్జిస్సన్తి. ఇతరేసం చతువోకారానం పఞ్చవోకారానం తేసం తత్థ అబ్యాకతా చ ధమ్మా ఉప్పజ్జిస్సన్తి అకుసలా చ ధమ్మా ఉప్పజ్జిస్సన్తి.

(ఘ) పచ్చనీకపుగ్గలో

౬౩. (క) యస్స కుసలా ధమ్మా న ఉప్పజ్జిస్సన్తి తస్స అకుసలా ధమ్మా న ఉప్పజ్జిస్సన్తీతి? ఆమన్తా.

(ఖ) యస్స వా పన అకుసలా ధమ్మా న ఉప్పజ్జిస్సన్తి తస్స కుసలా ధమ్మా న ఉప్పజ్జిస్సన్తీతి?

యస్స చిత్తస్స అనన్తరా అగ్గమగ్గం పటిలభిస్సన్తి తేసం అకుసలా ధమ్మా న ఉప్పజ్జిస్సన్తి, నో చ తేసం కుసలా ధమ్మా న ఉప్పజ్జిస్సన్తి. అగ్గమగ్గసమఙ్గీనం అరహన్తానం తేసం అకుసలా చ ధమ్మా న ఉప్పజ్జిస్సన్తి కుసలా చ ధమ్మా న ఉప్పజ్జిస్సన్తి.

(క) యస్స కుసలా ధమ్మా న ఉప్పజ్జిస్సన్తి తస్స అబ్యాకతా ధమ్మా న ఉప్పజ్జిస్సన్తీతి?

అగ్గమగ్గసమఙ్గీనం అరహన్తానం తేసం కుసలా ధమ్మా న ఉప్పజ్జిస్సన్తి, నో చ తేసం అబ్యాకతా ధమ్మా న ఉప్పజ్జిస్సన్తి. పచ్ఛిమచిత్తసమఙ్గీనం తేసం కుసలా చ ధమ్మా న ఉప్పజ్జిస్సన్తి అబ్యాకతా చ ధమ్మా న ఉప్పజ్జిస్సన్తి.

(ఖ) యస్స వా పన అబ్యాకతా ధమ్మా న ఉప్పజ్జిస్సన్తి తస్స కుసలా ధమ్మా న ఉప్పజ్జిస్సన్తీతి? ఆమన్తా.

౬౪. (క) యస్స అకుసలా ధమ్మా న ఉప్పజ్జిస్సన్తి తస్స అబ్యాకతా ధమ్మా న ఉప్పజ్జిస్సన్తీతి?

అగ్గమగ్గసమఙ్గీనం అరహన్తానం యస్స చిత్తస్స అనన్తరా అగ్గమగ్గం పటిలభిస్సన్తి తేసం అకుసలా ధమ్మా న ఉప్పజ్జిస్సన్తి, నో చ తేసం అబ్యాకతా ధమ్మా న ఉప్పజ్జిస్సన్తి. పచ్ఛిమచిత్తసమఙ్గీనం తేసం అకుసలా చ ధమ్మా న ఉప్పజ్జిస్సన్తి అబ్యాకతా చ ధమ్మా న ఉప్పజ్జిస్సన్తి.

(ఖ) యస్స వా పన అబ్యాకతా ధమ్మా న ఉప్పజ్జిస్సన్తి తస్స అకుసలా ధమ్మా న ఉప్పజ్జిస్సన్తీతి? ఆమన్తా.

(ఙ) పచ్చనీకఓకాసో

౬౫. (క) యత్థ కుసలా ధమ్మా న ఉప్పజ్జిస్సన్తి తత్థ అకుసలా ధమ్మా న ఉప్పజ్జిస్సన్తీతి? ఆమన్తా.

(ఖ) యత్థ వా పన అకుసలా ధమ్మా న ఉప్పజ్జిస్సన్తి తత్థ కుసలా ధమ్మా న ఉప్పజ్జిస్సన్తీతి? ఆమన్తా.

(క) యత్థ కుసలా ధమ్మా న ఉప్పజ్జిస్సన్తి తత్థ అబ్యాకతా ధమ్మా న ఉప్పజ్జిస్సన్తీతి? ఉప్పజ్జిస్సన్తి.

(ఖ) యత్థ వా పన అబ్యాకతా ధమ్మా న ఉప్పజ్జిస్సన్తి తత్థ కుసలా ధమ్మా న ఉప్పజ్జిస్సన్తీతి? నత్థి.

౬౬. (క) యత్థ అకుసలా ధమ్మా న ఉప్పజ్జిస్సన్తి తత్థ అబ్యాకతా ధమ్మా న ఉప్పజ్జిస్సన్తీతి? ఉప్పజ్జిస్సన్తి.

(ఖ) యత్థ వా పన అబ్యాకతా ధమ్మా న ఉప్పజ్జిస్సన్తి తత్థ అకుసలా ధమ్మా న ఉప్పజ్జిస్సన్తీతి? నత్థి.

(చ) పచ్చనీకపుగ్గలోకాసా

౬౭. (క) యస్స యత్థ కుసలా ధమ్మా న ఉప్పజ్జిస్సన్తి తస్స తత్థ అకుసలా ధమ్మా న ఉప్పజ్జిస్సన్తీతి? ఆమన్తా.

(ఖ) యస్స వా పన యత్థ అకుసలా ధమ్మా న ఉప్పజ్జిస్సన్తి తస్స తత్థ కుసలా ధమ్మా న ఉప్పజ్జిస్సన్తీతి?

యస్స చిత్తస్స అనన్తరా అగ్గమగ్గం పటిలభిస్సన్తి తేసం తత్థ అకుసలా ధమ్మా న ఉప్పజ్జిస్సన్తి, నో చ తేసం తత్థ కుసలా ధమ్మా న ఉప్పజ్జిస్సన్తి. అగ్గమగ్గసమఙ్గీనం అరహన్తానం అసఞ్ఞసత్తానం తేసం తత్థ అకుసలా చ ధమ్మా న ఉప్పజ్జిస్సన్తి కుసలా చ ధమ్మా న ఉప్పజ్జిస్సన్తి.

(క) యస్స యత్థ కుసలా ధమ్మా న ఉప్పజ్జిస్సన్తి తస్స తత్థ అబ్యాకతా ధమ్మా న ఉప్పజ్జిస్సన్తీతి?

అగ్గమగ్గసమఙ్గీనం అరహన్తానం అసఞ్ఞసత్తానం తేసం తత్థ కుసలా ధమ్మా న ఉప్పజ్జిస్సన్తి, నో చ తేసం తత్థ అబ్యాకతా ధమ్మా న ఉప్పజ్జిస్సన్తి. పచ్ఛిమచిత్తసమఙ్గీనం తేసం తత్థ కుసలా చ ధమ్మా న ఉప్పజ్జిస్సన్తి అబ్యాకతా చ ధమ్మా న ఉప్పజ్జిస్సన్తి.

(ఖ) యస్స వా పన యత్థ అబ్యాకతా ధమ్మా న ఉప్పజ్జిస్సన్తి తస్స తత్థ కుసలా ధమ్మా న ఉప్పజ్జిస్సన్తీతి? ఆమన్తా.

౬౮. (క) యస్స యత్థ అకుసలా ధమ్మా న ఉప్పజ్జిస్సన్తి తస్స తత్థ అబ్యాకతా ధమ్మా న ఉప్పజ్జిస్సన్తీతి?

అగ్గమగ్గసమఙ్గీనం అరహన్తానం యస్స చిత్తస్స అనన్తరా అగ్గమగ్గం పటిలభిస్సన్తి అసఞ్ఞసత్తానం తేసం తత్థ అకుసలా ధమ్మా న ఉప్పజ్జిస్సన్తి, నో చ తేసం తత్థ అబ్యాకతా ధమ్మా న ఉప్పజ్జిస్సన్తి. పచ్ఛిమచిత్తసమఙ్గీనం తేసం తత్థ అకుసలా చ ధమ్మా న ఉప్పజ్జిస్సన్తి అబ్యాకతా చ ధమ్మా న ఉప్పజ్జిస్సన్తి.

(ఖ) యస్స వా పన యత్థ అబ్యాకతా ధమ్మా న ఉప్పజ్జిస్సన్తి తస్స తత్థ అకుసలా ధమ్మా న ఉప్పజ్జిస్సన్తీతి? ఆమన్తా.