(౪) పచ్చుప్పన్నాతీతవారో
(క) అనులోమపుగ్గలో
౬౯. (క) యస్స కుసలా ధమ్మా ఉప్పజ్జన్తి తస్స అకుసలా ధమ్మా ఉప్పజ్జిత్థాతి? ఆమన్తా.
(ఖ) యస్స వా పన అకుసలా ధమ్మా ఉప్పజ్జిత్థ తస్స కుసలా ధమ్మా ఉప్పజ్జన్తీతి?
సబ్బేసం చిత్తస్స భఙ్గక్ఖణే కుసలవిప్పయుత్తచిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం అకుసలా ధమ్మా ఉప్పజ్జిత్థ, నో చ తేసం కుసలా ధమ్మా ఉప్పజ్జన్తి. కుసలానం ఉప్పాదక్ఖణే తేసం అకుసలా చ ధమ్మా ఉప్పజ్జిత్థ కుసలా చ ధమ్మా ఉప్పజ్జన్తి.
(క) యస్స కుసలా ధమ్మా ఉప్పజ్జన్తి తస్స అబ్యాకతా ధమ్మా ఉప్పజ్జిత్థాతి? ఆమన్తా.
(ఖ) యస్స వా పన అబ్యాకతా ధమ్మా ఉప్పజ్జిత్థ తస్స కుసలా ధమ్మా ఉప్పజ్జన్తీతి?
సబ్బేసం చిత్తస్స భఙ్గక్ఖణే కుసలవిప్పయుత్తచిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం అబ్యాకతా ధమ్మా ఉప్పజ్జిత్థ, నో చ తేసం కుసలా ధమ్మా ఉప్పజ్జన్తి. కుసలానం ఉప్పాదక్ఖణే తేసం అబ్యాకతా చ ధమ్మా ఉప్పజ్జిత్థ కుసలా చ ధమ్మా ఉప్పజ్జన్తి.
౭౦. (క) యస్స అకుసలా ధమ్మా ఉప్పజ్జన్తి తస్స అబ్యాకతా ధమ్మా ఉప్పజ్జిత్థాతి? ఆమన్తా.
(ఖ) యస్స వా పన అబ్యాకతా ధమ్మా ఉప్పజ్జిత్థ తస్స అకుసలా ధమ్మా ఉప్పజ్జన్తీతి?
సబ్బేసం చిత్తస్స భఙ్గక్ఖణే అకుసలవిప్పయుత్తచిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం అబ్యాకతా ధమ్మా ఉప్పజ్జిత్థ, నో చ తేసం అకుసలా ధమ్మా ఉప్పజ్జన్తి. అకుసలానం ఉప్పాదక్ఖణే తేసం అబ్యాకతా చ ధమ్మా ఉప్పజ్జిత్థ అకుసలా చ ధమ్మా ఉప్పజ్జన్తి.
(ఖ) అనులోమఓకాసో
౭౧. యత్థ కుసలా ధమ్మా ఉప్పజ్జన్తి తత్థ అకుసలా ధమ్మా ఉప్పజ్జిత్థాతి?…పే….
(గ) అనులోమపుగ్గలోకాసా
౭౨. (క) యస్స యత్థ కుసలా ధమ్మా ఉప్పజ్జన్తి తస్స తత్థ అకుసలా ధమ్మా ఉప్పజ్జిత్థాతి? ఆమన్తా.
(ఖ) యస్స వా పన యత్థ అకుసలా ధమ్మా ఉప్పజ్జిత్థ తస్స తత్థ కుసలా ధమ్మా ఉప్పజ్జన్తీతి?
సబ్బేసం చిత్తస్స భఙ్గక్ఖణే కుసలవిప్పయుత్తచిత్తస్స ఉప్పాదక్ఖణే తేసం తత్థ అకుసలా ధమ్మా ఉప్పజ్జిత్థ, నో చ తేసం తత్థ కుసలా ధమ్మా ఉప్పజ్జన్తి. కుసలానం ఉప్పాదక్ఖణే తేసం తత్థ అకుసలా చ ధమ్మా ఉప్పజ్జిత్థ కుసలా చ ధమ్మా ఉప్పజ్జన్తి.
(క) యస్స యత్థ కుసలా ధమ్మా ఉప్పజ్జన్తి తస్స తత్థ అబ్యాకతా ధమ్మా ఉప్పజ్జిత్థాతి? ఆమన్తా.
(ఖ) యస్స వా పన యత్థ అబ్యాకతా ధమ్మా ఉప్పజ్జిత్థ తస్స తత్థ కుసలా ధమ్మా ఉప్పజ్జన్తీతి?
సబ్బేసం చిత్తస్స భఙ్గక్ఖణే కుసలవిప్పయుత్తచిత్తస్స ఉప్పాదక్ఖణే అసఞ్ఞసత్తానం తేసం తత్థ అబ్యాకతా ధమ్మా ఉప్పజ్జిత్థ, నో చ తేసం తత్థ కుసలా ధమ్మా ఉప్పజ్జన్తి. కుసలానం ఉప్పాదక్ఖణే తేసం తత్థ అబ్యాకతా చ ధమ్మా ఉప్పజ్జిత్థ కుసలా చ ధమ్మా ఉప్పజ్జన్తి.
౭౩. (క) యస్స యత్థ అకుసలా ధమ్మా ఉప్పజ్జన్తి తస్స తత్థ అబ్యాకతా ధమ్మా ఉప్పజ్జిత్థాతి? ఆమన్తా.
(ఖ) యస్స వా పన యత్థ అబ్యాకతా ధమ్మా ఉప్పజ్జిత్థ తస్స తత్థ అకుసలా ధమ్మా ఉప్పజ్జన్తీతి?
సబ్బేసం చిత్తస్స భఙ్గక్ఖణే అకుసలవిప్పయుత్తచిత్తస్స ఉప్పాదక్ఖణే అసఞ్ఞసత్తానం తేసం తత్థ అబ్యాకతా ధమ్మా ఉప్పజ్జిత్థ, నో చ తేసం తత్థ అకుసలా ధమ్మా ఉప్పజ్జన్తి. అకుసలానం ఉప్పాదక్ఖణే తేసం తత్థ అబ్యాకతా చ ధమ్మా ఉప్పజ్జిత్థ అకుసలా చ ధమ్మా ఉప్పజ్జన్తి.
(ఘ) పచ్చనీకపుగ్గలో
౭౪. (క) యస్స కుసలా ధమ్మా న ఉప్పజ్జన్తి తస్స అకుసలా ధమ్మా న ఉప్పజ్జిత్థాతి? ఉప్పజ్జిత్థ.
(ఖ) యస్స వా పన అకుసలా ధమ్మా న ఉప్పజ్జిత్థ తస్స కుసలా ధమ్మా న ఉప్పజ్జన్తీతి? నత్థి.
(క) యస్స కుసలా ధమ్మా న ఉప్పజ్జన్తి తస్స అబ్యాకతా ధమ్మా న ఉప్పజ్జిత్థాతి? ఉప్పజ్జిత్థ.
(ఖ) యస్స వా పన అబ్యాకతా ధమ్మా న ఉప్పజ్జిత్థ తస్స కుసలా ధమ్మా న ఉప్పజ్జన్తీతి? నత్థి.
౭౫. (క) యస్స అకుసలా ధమ్మా న ఉప్పజ్జన్తి తస్స అబ్యాకతా ధమ్మా న ఉప్పజ్జిత్థాతి? ఉప్పజ్జిత్థ.
(ఖ) యస్స వా పన అబ్యాకతా ధమ్మా న ఉప్పజ్జిత్థ తస్స అకుసలా ధమ్మా న ఉప్పజ్జన్తీతి? నత్థి.
(ఙ) పచ్చనీకఓకాసో
౭౬. యత్థ కుసలా ధమ్మా న ఉప్పజ్జన్తి తత్థ అకుసలా ధమ్మా న ఉప్పజ్జిత్థాతి?…పే….
(చ) పచ్చనీకపుగ్గలోకాసా
౭౭. (క) యస్స యత్థ కుసలా ధమ్మా న ఉప్పజ్జన్తి తస్స తత్థ అకుసలా ధమ్మా న ఉప్పజ్జిత్థాతి?
సబ్బేసం చిత్తస్స భఙ్గక్ఖణే కుసలవిప్పయుత్తచిత్తస్స ఉప్పాదక్ఖణే తేసం తత్థ కుసలా ధమ్మా న ఉప్పజ్జన్తి, నో చ తేసం తత్థ అకుసలా ధమ్మా న ఉప్పజ్జిత్థ. సుద్ధావాసానం దుతియే చిత్తే వత్తమానే అసఞ్ఞసత్తానం తేసం తత్థ కుసలా చ ధమ్మా న ఉప్పజ్జన్తి అకుసలా చ ధమ్మా న ఉప్పజ్జిత్థ.
(ఖ) యస్స వా పన యత్థ అకుసలా ధమ్మా న ఉప్పజ్జిత్థ తస్స తత్థ కుసలా ధమ్మా న ఉప్పజ్జన్తీతి? ఆమన్తా.
(క) యస్స యత్థ కుసలా ధమ్మా న ఉప్పజ్జన్తి తస్స తత్థ అబ్యాకతా ధమ్మా న ఉప్పజ్జిత్థాతి?
సబ్బేసం చిత్తస్స భఙ్గక్ఖణే కుసలవిప్పయుత్తచిత్తస్స ఉప్పాదక్ఖణే అసఞ్ఞసత్తానం తేసం తత్థ కుసలా ధమ్మా న ఉప్పజ్జన్తి, నో చ తేసం తత్థ అబ్యాకతా ధమ్మా న ఉప్పజ్జిత్థ. సుద్ధావాసం ఉపపజ్జన్తానం తేసం తత్థ కుసలా చ ధమ్మా న ఉప్పజ్జన్తి అబ్యాకతా చ ధమ్మా న ఉప్పజ్జిత్థ.
(ఖ) యస్స వా పన యత్థ అబ్యాకతా ధమ్మా న ఉప్పజ్జిత్థ తస్స తత్థ కుసలా ధమ్మా న ఉప్పజ్జన్తీతి? ఆమన్తా.
౭౮. (క) యస్స యత్థ అకుసలా ధమ్మా న ఉప్పజ్జన్తి తస్స తత్థ అబ్యాకతా ధమ్మా న ఉప్పజ్జిత్థాతి?
సబ్బేసం చిత్తస్స భఙ్గక్ఖణే అకుసలవిప్పయుత్తచిత్తస్స ఉప్పాదక్ఖణే అసఞ్ఞసత్తానం తేసం తత్థ అకుసలా ధమ్మా న ఉప్పజ్జన్తి, నో చ తేసం తత్థ అబ్యాకతా ధమ్మా న ఉప్పజ్జిత్థ. సుద్ధావాసం ఉపపజ్జన్తానం తేసం తత్థ అకుసలా చ ధమ్మా న ఉప్పజ్జన్తి అబ్యాకతా చ ధమ్మా న ఉప్పజ్జిత్థ.
(ఖ) యస్స వా పన యత్థ అబ్యాకతా ధమ్మా న ఉప్పజ్జిత్థ తస్స తత్థ అకుసలా ధమ్మా న ఉప్పజ్జన్తీతి? ఆమన్తా.