౨. ధమ్మవారో

(౧) ఉప్పాదనిరోధకాలసమ్భేదవారో

౮౪. (క) యం చిత్తం ఉప్పజ్జతి న నిరుజ్ఝతి తం చిత్తం నిరుజ్ఝిస్సతి న ఉప్పజ్జిస్సతీతి? ఆమన్తా.

(ఖ) యం వా పన చిత్తం నిరుజ్ఝిస్సతి న ఉప్పజ్జిస్సతి తం చిత్తం ఉప్పజ్జతి న నిరుజ్ఝతీతి? ఆమన్తా.

(క) యం చిత్తం న ఉప్పజ్జతి నిరుజ్ఝతి తం చిత్తం న నిరుజ్ఝిస్సతి ఉప్పజ్జిస్సతీతి? నో.

(ఖ) యం వా పన చిత్తం న నిరుజ్ఝిస్సతి ఉప్పజ్జిస్సతి తం చిత్తం న ఉప్పజ్జతి నిరుజ్ఝతీతి? నత్థి.

(౨) ఉప్పాదుప్పన్నవారో

౮౫. (క) యం చిత్తం ఉప్పజ్జతి తం చిత్తం ఉప్పన్నన్తి? ఆమన్తా.

(ఖ) యం వా పన చిత్తం ఉప్పన్నం తం చిత్తం ఉప్పజ్జతీతి?

భఙ్గక్ఖణే చిత్తం ఉప్పన్నం, నో చ తం చిత్తం ఉప్పజ్జతి. ఉప్పాదక్ఖణే చిత్తం ఉప్పన్నఞ్చేవ ఉప్పజ్జతి చ.

(క) యం చిత్తం న ఉప్పజ్జతి తం చిత్తం న ఉప్పన్నన్తి?

భఙ్గక్ఖణే చిత్తం న ఉప్పజ్జతి, నో చ తం చిత్తం న ఉప్పన్నం. అతీతానాగతం చిత్తం న చేవ ఉప్పజ్జతి న చ ఉప్పన్నం.

(ఖ) యం వా పన చిత్తం న ఉప్పన్నం తం చిత్తం న ఉప్పజ్జతీతి? ఆమన్తా.

(౩) నిరోధుప్పన్నవారో

౮౬. (క) యం చిత్తం నిరుజ్ఝతి తం చిత్తం ఉప్పన్నన్తి? ఆమన్తా.

(ఖ) యం వా పన చిత్తం ఉప్పన్నం తం చిత్తం నిరుజ్ఝతీతి?

ఉప్పాదక్ఖణే చిత్తం ఉప్పన్నం, నో చ తం చిత్తం నిరుజ్ఝతి. భఙ్గక్ఖణే చిత్తం ఉప్పన్నఞ్చేవ నిరుజ్ఝతి చ.

(క) యం చిత్తం న నిరుజ్ఝతి తం చిత్తం న ఉప్పన్నన్తి?

ఉప్పాదక్ఖణే చిత్తం న నిరుజ్ఝతి, నో చ తం చిత్తం న ఉప్పన్నం. అతీతానాగతం చిత్తం న చేవ నిరుజ్ఝతి న చ ఉప్పన్నం.

(ఖ) యం వా పన చిత్తం న ఉప్పన్నం తం చిత్తం న నిరుజ్ఝతీతి? ఆమన్తా.

(౪) ఉప్పాదవారో

౮౭. (క) యం చిత్తం ఉప్పజ్జతి తం చిత్తం ఉప్పజ్జిత్థాతి? నో.

(ఖ) యం వా పన చిత్తం ఉప్పజ్జిత్థ తం చిత్తం ఉప్పజ్జతీతి? నో.

(క) యం చిత్తం న ఉప్పజ్జతి తం చిత్తం న ఉప్పజ్జిత్థాతి?

అతీతం చిత్తం న ఉప్పజ్జతి, నో చ తం చిత్తం న ఉప్పజ్జిత్థ. భఙ్గక్ఖణే అనాగతఞ్చ చిత్తం న చేవ ఉప్పజ్జతి న చ ఉప్పజ్జిత్థ.

(ఖ) యం వా పన చిత్తం న ఉప్పజ్జిత్థ తం చిత్తం న ఉప్పజ్జతీతి?

ఉప్పాదక్ఖణే చిత్తం న ఉప్పజ్జిత్థ, నో చ తం చిత్తం న ఉప్పజ్జతి. భఙ్గక్ఖణే అనాగతఞ్చ చిత్తం న చేవ ఉప్పజ్జిత్థ న చ ఉప్పజ్జతి.

౮౮. (క) యం చిత్తం ఉప్పజ్జతి తం చిత్తం ఉప్పజ్జిస్సతీతి? నో.

(ఖ) యం వా పన చిత్తం ఉప్పజ్జిస్సతి తం చిత్తం ఉప్పజ్జతీతి? నో.

(క) యం చిత్తం న ఉప్పజ్జతి తం చిత్తం న ఉప్పజ్జిస్సతీతి?

అనాగతం చిత్తం న ఉప్పజ్జతి, నో చ తం చిత్తం న ఉప్పజ్జిస్సతి. భఙ్గక్ఖణే అతీతఞ్చ చిత్తం న చేవ ఉప్పజ్జతి న చ ఉప్పజ్జిస్సతి.

(ఖ) యం వా పన చిత్తం న ఉప్పజ్జిస్సతి తం చిత్తం న ఉప్పజ్జతీతి?

ఉప్పాదక్ఖణే చిత్తం న ఉప్పజ్జిస్సతి, నో చ తం చిత్తం న ఉప్పజ్జతి. భఙ్గక్ఖణే అతీతఞ్చ చిత్తం న చేవ ఉప్పజ్జిస్సతి న చ ఉప్పజ్జతి.

౮౯. (క) యం చిత్తం ఉప్పజ్జిత్థ తం చిత్తం ఉప్పజ్జిస్సతీతి? నో.

(ఖ) యం వా పన చిత్తం ఉప్పజ్జిస్సతి తం చిత్తం ఉప్పజ్జిత్థాతి? నో.

(క) యం చిత్తం న ఉప్పజ్జిత్థ తం చిత్తం న ఉప్పజ్జిస్సతీతి?

అనాగతం చిత్తం న ఉప్పజ్జిత్థ, నో చ తం చిత్తం న ఉప్పజ్జిస్సతి. పచ్చుప్పన్నం చిత్తం న చేవ ఉప్పజ్జిత్థ న చ ఉప్పజ్జిస్సతి.

(ఖ) యం వా పన చిత్తం న ఉప్పజ్జిస్సతి తం చిత్తం న ఉప్పజ్జిత్థాతి?

అతీతం చిత్తం న ఉప్పజ్జిస్సతి, నో చ తం చిత్తం న ఉప్పజ్జిత్థ. పచ్చుప్పన్నం చిత్తం న చేవ ఉప్పజ్జిస్సతి న చ ఉప్పజ్జిత్థ.

(౫) నిరోధవారో

౯౦. (క) యం చిత్తం నిరుజ్ఝతి తం చిత్తం నిరుజ్ఝిత్థాతి? నో.

(ఖ) యం వా పన చిత్తం నిరుజ్ఝిత్థ తం చిత్తం నిరుజ్ఝతీతి? నో.

(క) యం చిత్తం న నిరుజ్ఝతి తం చిత్తం న నిరుజ్ఝిత్థాతి?

అతీతం చిత్తం న నిరుజ్ఝతి, నో చ తం చిత్తం న నిరుజ్ఝిత్థ. ఉప్పాదక్ఖణే అనాగతఞ్చ చిత్తం న చేవ నిరుజ్ఝతి న చ నిరుజ్ఝిత్థ.

(ఖ) యం వా పన చిత్తం న నిరుజ్ఝిత్థ తం చిత్తం న నిరుజ్ఝతీతి?

భఙ్గక్ఖణే చిత్తం న నిరుజ్ఝిత్థ, నో చ తం చిత్తం న నిరుజ్ఝతి. ఉప్పాదక్ఖణే అనాగతఞ్చ చిత్తం న చేవ నిరుజ్ఝిత్థ న చ నిరుజ్ఝతి.

౯౧. (క) యం చిత్తం నిరుజ్ఝతి తం చిత్తం నిరుజ్ఝిస్సతీతి? నో.

(ఖ) యం వా పన చిత్తం నిరుజ్ఝిస్సతి తం చిత్తం నిరుజ్ఝతీతి? నో.

(క) యం చిత్తం న నిరుజ్ఝతి తం చిత్తం న నిరుజ్ఝిస్సతీతి?

ఉప్పాదక్ఖణే అనాగతఞ్చ చిత్తం న నిరుజ్ఝతి, నో చ తం చిత్తం న నిరుజ్ఝిస్సతి. అతీతం చిత్తం న చేవ నిరుజ్ఝతి న చ నిరుజ్ఝిస్సతి.

(ఖ) యం వా పన చిత్తం న నిరుజ్ఝిస్సతి తం చిత్తం న నిరుజ్ఝతీతి?

భఙ్గక్ఖణే చిత్తం న నిరుజ్ఝిస్సతి, నో చ తం చిత్తం న నిరుజ్ఝతి. అతీతం చిత్తం న చేవ నిరుజ్ఝిస్సతి న చ నిరుజ్ఝతి.

౯౨. (క) యం చిత్తం నిరుజ్ఝిత్థ తం చిత్తం నిరుజ్ఝిస్సతీతి? నో.

(ఖ) యం వా పన చిత్తం నిరుజ్ఝిస్సతి తం చిత్తం నిరుజ్ఝిత్థాతి? నో.

(క) యం చిత్తం న నిరుజ్ఝిత్థ తం చిత్తం న నిరుజ్ఝిస్సతీతి?

ఉప్పాదక్ఖణే అనాగతఞ్చ చిత్తం న నిరుజ్ఝిత్థ, నో చ తం చిత్తం న నిరుజ్ఝిస్సతి. భఙ్గక్ఖణే చిత్తం న చేవ నిరుజ్ఝిత్థ న చ నిరుజ్ఝిస్సతి.

(ఖ) యం వా పన చిత్తం న నిరుజ్ఝిస్సతి తం చిత్తం న నిరుజ్ఝిత్థాతి?

అతీతం చిత్తం న నిరుజ్ఝిస్సతి, నో చ తం చిత్తం న నిరుజ్ఝిత్థ. భఙ్గక్ఖణే చిత్తం న చేవ నిరుజ్ఝిస్సతి న చ నిరుజ్ఝిత్థ.

(౬) ఉప్పాదనిరోధవారో

౯౩. (క) యం చిత్తం ఉప్పజ్జతి తం చిత్తం నిరుజ్ఝిత్థాతి? నో.

(ఖ) యం వా పన చిత్తం నిరుజ్ఝిత్థ తం చిత్తం ఉప్పజ్జతీతి? నో.

(క) యం చిత్తం న ఉప్పజ్జతి తం చిత్తం న నిరుజ్ఝిత్థాతి?

అతీతం చిత్తం న ఉప్పజ్జతి, నో చ తం చిత్తం న నిరుజ్ఝిత్థ. భఙ్గక్ఖణే అనాగతఞ్చ చిత్తం న చేవ ఉప్పజ్జతి న చ నిరుజ్ఝిత్థ.

(ఖ) యం వా పన చిత్తం న నిరుజ్ఝిత్థ తం చిత్తం న ఉప్పజ్జతీతి?

ఉప్పాదక్ఖణే చిత్తం న నిరుజ్ఝిత్థ, నో చ తం చిత్తం న ఉప్పజ్జతి. భఙ్గక్ఖణే అనాగతఞ్చ చిత్తం న చేవ నిరుజ్ఝిత్థ న చ ఉప్పజ్జతి.

౯౪. (క) యం చిత్తం ఉప్పజ్జతి తం చిత్తం నిరుజ్ఝిస్సతీతి? ఆమన్తా.

(ఖ) యం వా పన చిత్తం నిరుజ్ఝిస్సతి తం చిత్తం ఉప్పజ్జతీతి?

అనాగతం చిత్తం నిరుజ్ఝిస్సతి, నో చ తం చిత్తం ఉప్పజ్జతి. ఉప్పాదక్ఖణే చిత్తం నిరుజ్ఝిస్సతి చేవ ఉప్పజ్జతి చ.

(క) యం చిత్తం న ఉప్పజ్జతి తం చిత్తం న నిరుజ్ఝిస్సతీతి?

అనాగతం చిత్తం న ఉప్పజ్జతి, నో చ తం చిత్తం న నిరుజ్ఝిస్సతి. భఙ్గక్ఖణే అతీతఞ్చ చిత్తం న చేవ ఉప్పజ్జతి న చ నిరుజ్ఝిస్సతి.

(ఖ) యం వా పన చిత్తం న నిరుజ్ఝిస్సతి తం చిత్తం న ఉప్పజ్జతీతి? ఆమన్తా.

౯౫. (క) యం చిత్తం ఉప్పజ్జిత్థ తం చిత్తం నిరుజ్ఝిస్సతీతి? నో.

(ఖ) యం వా పన చిత్తం నిరుజ్ఝిస్సతి తం చిత్తం ఉప్పజ్జిత్థాతి? నో.

(క) యం చిత్తం న ఉప్పజ్జిత్థ తం చిత్తం న నిరుజ్ఝిస్సతీతి?

ఉప్పాదక్ఖణే అనాగతఞ్చ చిత్తం న ఉప్పజ్జిత్థ, నో చ తం చిత్తం న నిరుజ్ఝిస్సతి. భఙ్గక్ఖణే చిత్తం న చేవ ఉప్పజ్జిత్థ న చ నిరుజ్ఝిస్సతి.

(ఖ) యం వా పన చిత్తం న నిరుజ్ఝిస్సతి తం చిత్తం న ఉప్పజ్జిత్థాతి?

అతీతం చిత్తం న నిరుజ్ఝిస్సతి, నో చ తం చిత్తం న ఉప్పజ్జిత్థ. భఙ్గక్ఖణే చిత్తం న చేవ నిరుజ్ఝిస్సతి న చ ఉప్పజ్జిత్థ.

(౭) ఉప్పజ్జమాన-ననిరోధవారో

౯౬. (క) యం చిత్తం ఉప్పజ్జతి తం చిత్తం న నిరుజ్ఝతీతి? ఆమన్తా.

(ఖ) యం వా పన చిత్తం న నిరుజ్ఝతి తం చిత్తం ఉప్పజ్జతీతి?

అతీతానాగతం చిత్తం న నిరుజ్ఝతి, నో చ తం చిత్తం ఉప్పజ్జతి. ఉప్పాదక్ఖణే చిత్తం న నిరుజ్ఝతి చేవ ఉప్పజ్జతి చ.

(క) యం చిత్తం న ఉప్పజ్జతి తం చిత్తం నిరుజ్ఝతీతి?

అతీతానాగతం చిత్తం న ఉప్పజ్జతి, నో చ తం చిత్తం నిరుజ్ఝతి. భఙ్గక్ఖణే చిత్తం న ఉప్పజ్జతి చేవ నిరుజ్ఝతి చ.

(ఖ) యం వా పన చిత్తం నిరుజ్ఝతి తం చిత్తం న ఉప్పజ్జతీతి? ఆమన్తా.

(౮) ఉప్పజ్జమానుప్పన్నవారో

౯౭. (క) యం చిత్తం ఉప్పజ్జమానం తం చిత్తం ఉప్పన్నన్తి? ఆమన్తా.

(ఖ) యం వా పన చిత్తం ఉప్పన్నం తం చిత్తం ఉప్పజ్జమానన్తి?

భఙ్గక్ఖణే చిత్తం ఉప్పన్నం, నో చ తం చిత్తం ఉప్పజ్జమానం. ఉప్పాదక్ఖణే చిత్తం ఉప్పన్నఞ్చేవ ఉప్పజ్జమానఞ్చ.

(క) యం చిత్తం న ఉప్పజ్జమానం తం చిత్తం న ఉప్పన్నన్తి?

భఙ్గక్ఖణే చిత్తం న ఉప్పజ్జమానం, నో చ తం చిత్తం న ఉప్పన్నం. అతీతానాగతం చిత్తం న చేవ ఉప్పజ్జమానం న చ ఉప్పన్నం.

(ఖ) యం వా పన చిత్తం న ఉప్పన్నం తం చిత్తం న ఉప్పజ్జమానన్తి? ఆమన్తా.

(౯) నిరుజ్ఝమానుప్పన్నవారో

౯౮. (క) యం చిత్తం నిరుజ్ఝమానం తం చిత్తం ఉప్పన్నన్తి? ఆమన్తా.

(ఖ) యం వా పన చిత్తం ఉప్పన్నం తం చిత్తం నిరుజ్ఝమానన్తి?

ఉప్పాదక్ఖణే చిత్తం ఉప్పన్నం, నో చ తం చిత్తం నిరుజ్ఝమానం. భఙ్గక్ఖణే చిత్తం ఉప్పన్నఞ్చేవ నిరుజ్ఝమానఞ్చ.

(క) యం చిత్తం న నిరుజ్ఝమానం తం చిత్తం న ఉప్పన్నన్తి?

ఉప్పాదక్ఖణే చిత్తం న నిరుజ్ఝమానం, నో చ తం చిత్తం న ఉప్పన్నం. అతీతానాగతం చిత్తం న చేవ నిరుజ్ఝమానం న చ ఉప్పన్నం.

(ఖ) యం వా పన చిత్తం న ఉప్పన్నం తం చిత్తం న నిరుజ్ఝమానన్తి? ఆమన్తా.

(౧౦) ఉప్పన్నుప్పాదవారో

౯౯. (క) యం చిత్తం ఉప్పన్నం తం చిత్తం ఉప్పజ్జిత్థాతి? నో.

(ఖ) యం వా పన చిత్తం ఉప్పజ్జిత్థ తం చిత్తం ఉప్పన్నన్తి? నో.

(క) యం చిత్తం న ఉప్పన్నం తం చిత్తం న ఉప్పజ్జిత్థాతి?

అతీతం చిత్తం న ఉప్పన్నం, నో చ తం చిత్తం న ఉప్పజ్జిత్థ. అనాగతం చిత్తం న చేవ ఉప్పన్నం న చ ఉప్పజ్జిత్థ.

(ఖ) యం వా పన చిత్తం న ఉప్పజ్జిత్థ తం చిత్తం న ఉప్పన్నన్తి?

పచ్చుప్పన్నం చిత్తం న ఉప్పజ్జిత్థ, నో చ తం చిత్తం న ఉప్పన్నం. అనాగతం చిత్తం న చేవ ఉప్పజ్జిత్థ న చ ఉప్పన్నం.

౧౦౦. (క) యం చిత్తం ఉప్పన్నం తం చిత్తం ఉప్పజ్జిస్సతీతి? నో.

(ఖ) యం వా పన చిత్తం ఉప్పజ్జిస్సతి తం చిత్తం ఉప్పన్నన్తి? నో.

(క) యం చిత్తం న ఉప్పన్నం తం చిత్తం న ఉప్పజ్జిస్సతీతి?

అనాగతం చిత్తం న ఉప్పన్నం, నో చ తం చిత్తం న ఉప్పజ్జిస్సతి. అతీతం చిత్తం న చేవ ఉప్పన్నం న చ ఉప్పజ్జిస్సతి.

(ఖ) యం వా పన చిత్తం న ఉప్పజ్జిస్సతి తం చిత్తం న ఉప్పన్నన్తి?

పచ్చుప్పన్నం చిత్తం న ఉప్పజ్జిస్సతి, నో చ తం చిత్తం న ఉప్పన్నం. అతీతం చిత్తం న చేవ ఉప్పజ్జిస్సతి న చ ఉప్పన్నం.

(౧౧) అతీతానాగతవారో

౧౦౧. (క) యం చిత్తం ఉప్పజ్జిత్థ నో చ తం చిత్తం ఉప్పన్నం, తం చిత్తం ఉప్పజ్జిస్సతీతి? నో.

(ఖ) యం వా పన చిత్తం ఉప్పజ్జిస్సతి నో చ తం చిత్తం ఉప్పన్నం, తం చిత్తం ఉప్పజ్జిత్థాతి? నో.

(క) యం చిత్తం న ఉప్పజ్జిత్థ నో చ తం చిత్తం న ఉప్పన్నం, తం చిత్తం న ఉప్పజ్జిస్సతీతి? ఆమన్తా.

(ఖ) యం వా పన చిత్తం న ఉప్పజ్జిస్సతి నో చ తం చిత్తం న ఉప్పన్నం, తం చిత్తం న ఉప్పజ్జిత్థాతి? ఆమన్తా.

(౧౨) ఉప్పన్నుప్పజ్జమానవారో

౧౦౨. (క) ఉప్పన్నం ఉప్పజ్జమానన్తి?

భఙ్గక్ఖణే ఉప్పన్నం, నో చ ఉప్పజ్జమానం. ఉప్పాదక్ఖణే ఉప్పన్నఞ్చేవ ఉప్పజ్జమానఞ్చ.

(ఖ) ఉప్పజ్జమానం ఉప్పన్నన్తి? ఆమన్తా.

(క) న ఉప్పన్నం న ఉప్పజ్జమానన్తి? ఆమన్తా.

(ఖ) న ఉప్పజ్జమానం న ఉప్పన్నన్తి?

భఙ్గక్ఖణే న ఉప్పజ్జమానం, నో చ న ఉప్పన్నం. అతీతానాగతం చిత్తం న చేవ ఉప్పజ్జమానం న చ ఉప్పన్నం.

(౧౩) నిరుద్ధనిరుజ్ఝమానవారో

౧౦౩. (క) నిరుద్ధం నిరుజ్ఝమానన్తి? నో.

(ఖ) నిరుజ్ఝమానం నిరుద్ధన్తి? నో.

(క) న నిరుద్ధం న నిరుజ్ఝమానన్తి?

భఙ్గక్ఖణే న నిరుద్ధం, నో చ న నిరుజ్ఝమానం. ఉప్పాదక్ఖణే అనాగతఞ్చ చిత్తం న చేవ నిరుద్ధం న చ నిరుజ్ఝమానం.

(ఖ) న నిరుజ్ఝమానం న నిరుద్ధన్తి?

అతీతం చిత్తం న నిరుజ్ఝమానం, నో చ న నిరుద్ధం. ఉప్పాదక్ఖణే అనాగతఞ్చ చిత్తం న చేవ నిరుజ్ఝమానం న చ నిరుద్ధం.

(౧౪) అతిక్కన్తకాలవారో

౧౦౪. (క) యం చిత్తం ఉప్పజ్జమానం ఖణం ఖణం వీతిక్కన్తం అతిక్కన్తకాలం, నిరుజ్ఝమానం ఖణం ఖణం వీతిక్కన్తం అతిక్కన్తకాలం తం చిత్తన్తి?

భఙ్గక్ఖణే చిత్తం ఉప్పాదక్ఖణం వీతిక్కన్తం భఙ్గక్ఖణం అవీతిక్కన్తం, అతీతం చిత్తం ఉప్పాదక్ఖణఞ్చ వీతిక్కన్తం భఙ్గక్ఖణఞ్చ వీతిక్కన్తం.

(ఖ) యం వా పన చిత్తం నిరుజ్ఝమానం ఖణం ఖణం వీతిక్కన్తం అతిక్కన్తకాలం, ఉప్పజ్జమానం ఖణం ఖణం వీతిక్కన్తం అతిక్కన్తకాలం తం చిత్తన్తి?

అతీతం చిత్తం.

(క) యం చిత్తం న ఉప్పజ్జమానం ఖణం ఖణం వీతిక్కన్తం అతిక్కన్తకాలం, న నిరుజ్ఝమానం ఖణం ఖణం వీతిక్కన్తం అతిక్కన్తకాలం తం చిత్తన్తి?

ఉప్పాదక్ఖణే అనాగతం చిత్తం.

(ఖ) యం వా పన చిత్తం న నిరుజ్ఝమానం ఖణం ఖణం వీతిక్కన్తం అతిక్కన్తకాలం, న ఉప్పజ్జమానం ఖణం ఖణం వీతిక్కన్తం అతిక్కన్తకాలం తం చిత్తన్తి?

భఙ్గక్ఖణే చిత్తం భఙ్గక్ఖణం అవీతిక్కన్తం నో చ ఉప్పాదక్ఖణం అవీతిక్కన్తం, ఉప్పాదక్ఖణే అనాగతఞ్చ చిత్తం భఙ్గక్ఖణఞ్చ అవీతిక్కన్తం ఉప్పాదక్ఖణఞ్చ అవీతిక్కన్తం.