(౧) పచ్చుప్పన్నవారో
(క) అనులోమపుగ్గలో
౧౯. (క) యస్స కాయసఙ్ఖారో ఉప్పజ్జతి తస్స వచీసఙ్ఖారో ఉప్పజ్జతీతి?
వినా వితక్కవిచారేహి అస్సాసపస్సాసానం ఉప్పాదక్ఖణే తేసం కాయసఙ్ఖారో ఉప్పజ్జతి, నో చ తేసం వచీసఙ్ఖారో ఉప్పజ్జతి. పఠమజ్ఝానం సమాపన్నానం కామావచరానం అస్సాసపస్సాసానం ఉప్పాదక్ఖణే తేసం కాయసఙ్ఖారో చ ఉప్పజ్జతి వచీసఙ్ఖారో చ ఉప్పజ్జతి.
(ఖ) యస్స వా పన వచీసఙ్ఖారో ఉప్పజ్జతి తస్స కాయసఙ్ఖారో ఉప్పజ్జతీతి?
వినా అస్సాసపస్సాసేహి వితక్కవిచారానం ఉప్పాదక్ఖణే తేసం వచీసఙ్ఖారో ఉప్పజ్జతి, నో చ తేసం కాయసఙ్ఖారో ఉప్పజ్జతి. పఠమజ్ఝానం సమాపన్నానం కామావచరానం అస్సాసపస్సాసానం ఉప్పాదక్ఖణే తేసం వచీసఙ్ఖారో చ ఉప్పజ్జతి కాయసఙ్ఖారో చ ఉప్పజ్జతి.
(క) యస్స కాయసఙ్ఖారో ఉప్పజ్జతి తస్స చిత్తసఙ్ఖారో ఉప్పజ్జతీతి? ఆమన్తా.
(ఖ) యస్స వా పన చిత్తసఙ్ఖారో ఉప్పజ్జతి తస్స కాయసఙ్ఖారో ఉప్పజ్జతీతి?
వినా అస్సాసపస్సాసేహి చిత్తస్స ఉప్పాదక్ఖణే తేసం చిత్తసఙ్ఖారో ఉప్పజ్జతి, నో చ తేసం కాయసఙ్ఖారో ఉప్పజ్జతి. అస్సాసపస్సాసానం ఉప్పాదక్ఖణే తేసం చిత్తసఙ్ఖారో చ ఉప్పజ్జతి కాయసఙ్ఖారో చ ఉప్పజ్జతి.
౨౦. (క) యస్స వచీసఙ్ఖారో ఉప్పజ్జతి తస్స చిత్తసఙ్ఖారో ఉప్పజ్జతీతి? ఆమన్తా.
(ఖ) యస్స వా పన చిత్తసఙ్ఖారో ఉప్పజ్జతి తస్స వచీసఙ్ఖారో ఉప్పజ్జతీతి?
వినా వితక్కవిచారేహి చిత్తస్స ఉప్పాదక్ఖణే తేసం చిత్తసఙ్ఖారో ఉప్పజ్జతి, నో చ తేసం వచీసఙ్ఖారో ఉప్పజ్జతి. వితక్కవిచారానం ఉప్పాదక్ఖణే తేసం చిత్తసఙ్ఖారో చ ఉప్పజ్జతి వచీసఙ్ఖారో చ ఉప్పజ్జతి.
(ఖ) అనులోమఓకాసో
౨౧. (క) యత్థ కాయసఙ్ఖారో ఉప్పజ్జతి తత్థ వచీసఙ్ఖారో ఉప్పజ్జతీతి?
దుతియజ్ఝానే తతియజ్ఝానే తత్థ కాయసఙ్ఖారో ఉప్పజ్జతి, నో చ తత్థ వచీసఙ్ఖారో ఉప్పజ్జతి. పఠమజ్ఝానే కామావచరే తత్థ కాయసఙ్ఖారో చ ఉప్పజ్జతి వచీసఙ్ఖారో చ ఉప్పజ్జతి.
(ఖ) యత్థ వా పన వచీసఙ్ఖారో ఉప్పజ్జతి తత్థ కాయసఙ్ఖారో ఉప్పజ్జతీతి?
రూపావచరే అరూపావచరే తత్థ వచీసఙ్ఖారో ఉప్పజ్జతి, నో చ తత్థ కాయసఙ్ఖారో ఉప్పజ్జతి. పఠమజ్ఝానే కామావచరే తత్థ వచీసఙ్ఖారో చ ఉప్పజ్జతి కాయసఙ్ఖారో చ ఉప్పజ్జతి.
(క) యత్థ కాయసఙ్ఖారో ఉప్పజ్జతి తత్థ చిత్తసఙ్ఖారో ఉప్పజ్జతీతి? ఆమన్తా.
(ఖ) యత్థ వా పన చిత్తసఙ్ఖారో ఉప్పజ్జతి తత్థ కాయసఙ్ఖారో ఉప్పజ్జతీతి?
చతుత్థజ్ఝానే రూపావచరే అరూపావచరే తత్థ చిత్తసఙ్ఖారో ఉప్పజ్జతి, నో చ తత్థ కాయసఙ్ఖారో ఉప్పజ్జతి. పఠమజ్ఝానే దుతియజ్ఝానే తతియజ్ఝానే కామావచరే తత్థ చిత్తసఙ్ఖారో చ ఉప్పజ్జతి కాయసఙ్ఖారో చ ఉప్పజ్జతి.
౨౨. (క) యత్థ వచీసఙ్ఖారో ఉప్పజ్జతి తత్థ చిత్తసఙ్ఖారో ఉప్పజ్జతీతి? ఆమన్తా.
(ఖ) యత్థ వా పన చిత్తసఙ్ఖారో ఉప్పజ్జతి తత్థ వచీసఙ్ఖారో ఉప్పజ్జతీతి?
దుతియజ్ఝానే తతియజ్ఝానే చతుత్థజ్ఝానే తత్థ చిత్తసఙ్ఖారో ఉప్పజ్జతి, నో చ తత్థ వచీసఙ్ఖారో ఉప్పజ్జతి. పఠమజ్ఝానే కామావచరే రూపావచరే అరూపావచరే తత్థ చిత్తసఙ్ఖారో చ ఉప్పజ్జతి వచీసఙ్ఖారో చ ఉప్పజ్జతి.
(గ) అనులోమపుగ్గలోకాసా
౨౩. యస్స యత్థ కాయసఙ్ఖారో ఉప్పజ్జతి…పే….
(యస్సకమ్పి యస్సయత్థకమ్పి సదిసం.)
(ఘ) పచ్చనీకపుగ్గలో
౨౪. (క) యస్స కాయసఙ్ఖారో నుప్పజ్జతి తస్స వచీసఙ్ఖారో నుప్పజ్జతీతి?
వినా అస్సాసపస్సాసేహి వితక్కవిచారానం ఉప్పాదక్ఖణే తేసం కాయసఙ్ఖారో నుప్పజ్జతి, నో చ తేసం వచీసఙ్ఖారో నుప్పజ్జతి. సబ్బేసం చిత్తస్స భఙ్గక్ఖణే వినా అస్సాసపస్సాసేహి అవితక్కఅవిచారచిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం కాయసఙ్ఖారో చ నుప్పజ్జతి వచీసఙ్ఖారో చ నుప్పజ్జతి.
(ఖ) యస్స వా పన వచీసఙ్ఖారో నుప్పజ్జతి తస్స కాయసఙ్ఖారో నుప్పజ్జతీతి?
వినా వితక్కవిచారేహి అస్సాసపస్సాసానం ఉప్పాదక్ఖణే తేసం వచీసఙ్ఖారో నుప్పజ్జతి, నో చ తేసం కాయసఙ్ఖారో నుప్పజ్జతి. సబ్బేసం చిత్తస్స భఙ్గక్ఖణే వినా అస్సాసపస్సాసేహి అవితక్కఅవిచారచిత్తస్స ఉప్పాదక్ఖణే నిరోధసమాపన్నానం అసఞ్ఞసత్తానం తేసం వచీసఙ్ఖారో చ నుప్పజ్జతి కాయసఙ్ఖారో చ నుప్పజ్జతి.
(క) యస్స కాయసఙ్ఖారో నుప్పజ్జతి తస్స చిత్తసఙ్ఖారో నుప్పజ్జతీతి?
వినా అస్సాసపస్సాసేహి చిత్తస్స ఉప్పాదక్ఖణే తేసం కాయసఙ్ఖారో నుప్పజ్జతి, నో చ తేసం చిత్తసఙ్ఖారో నుప్పజ్జతి. సబ్బేసం చిత్తస్స భఙ్గక్ఖణే నిరోధసమాపన్నానం అసఞ్ఞసత్తానం తేసం కాయసఙ్ఖారో చ నుప్పజ్జతి చిత్తసఙ్ఖారో చ నుప్పజ్జతి.
(ఖ) యస్స వా పన చిత్తసఙ్ఖారో నుప్పజ్జతి తస్స కాయసఙ్ఖారో నుప్పజ్జతీతి? ఆమన్తా.
౨౫. (క) యస్స వచీసఙ్ఖారో నుప్పజ్జతి తస్స చిత్తసఙ్ఖారో నుప్పజ్జతీతి?
వినా వితక్కవిచారేహి చిత్తస్స ఉప్పాదక్ఖణే తేసం వచీసఙ్ఖారో నుప్పజ్జతి, నో చ తేసం చిత్తసఙ్ఖారో నుప్పజ్జతి. సబ్బేసం చిత్తస్స భఙ్గక్ఖణే నిరోధసమాపన్నానం అసఞ్ఞసత్తానం తేసం వచీసఙ్ఖారో చ నుప్పజ్జతి చిత్తసఙ్ఖారో చ నుప్పజ్జతి.
(ఖ) యస్స వా పన చిత్తసఙ్ఖారో నుప్పజ్జతి తస్స వచీసఙ్ఖారో నుప్పజ్జతీతి? ఆమన్తా.
(ఙ) పచ్చనీకఓకాసో
౨౬. (క) యత్థ కాయసఙ్ఖారో నుప్పజ్జతి తత్థ వచీసఙ్ఖారో నుప్పజ్జతీతి?
రూపావచరే అరూపావచరే తత్థ కాయసఙ్ఖారో నుప్పజ్జతి, నో చ తత్థ వచీసఙ్ఖారో నుప్పజ్జతి. చతుత్థజ్ఝానే అసఞ్ఞసత్తే తత్థ కాయసఙ్ఖారో చ నుప్పజ్జతి వచీసఙ్ఖారో చ నుప్పజ్జతి.
(ఖ) యత్థ వా పన వచీసఙ్ఖారో నుప్పజ్జతి తత్థ కాయసఙ్ఖారో నుప్పజ్జతీతి?
దుతియజ్ఝానే తతియజ్ఝానే తత్థ వచీసఙ్ఖారో నుప్పజ్జతి, నో చ తత్థ కాయసఙ్ఖారో నుప్పజ్జతి. చతుత్థజ్ఝానే అసఞ్ఞసత్తే తత్థ వచీసఙ్ఖారో చ నుప్పజ్జతి కాయసఙ్ఖారో చ నుప్పజ్జతి.
(క) యత్థ కాయసఙ్ఖారో నుప్పజ్జతి తత్థ చిత్తసఙ్ఖారో నుప్పజ్జతీతి?
చతుత్థజ్ఝానే రూపావచరే అరూపావచరే తత్థ కాయసఙ్ఖారో నుప్పజ్జతి, నో చ తత్థ చిత్తసఙ్ఖారో నుప్పజ్జతి. అసఞ్ఞసత్తే తత్థ కాయసఙ్ఖారో చ నుప్పజ్జతి చిత్తసఙ్ఖారో చ నుప్పజ్జతి.
(ఖ) యత్థ వా పన…పే…? ఆమన్తా.
౨౭. (క) యత్థ వచీసఙ్ఖారో నుప్పజ్జతి తత్థ చిత్తసఙ్ఖారో నుప్పజ్జతీతి?
దుతియజ్ఝానే తతియజ్ఝానే చతుత్థజ్ఝానే తత్థ వచీసఙ్ఖారో నుప్పజ్జతి, నో చ తత్థ చిత్తసఙ్ఖారో నుప్పజ్జతి. అసఞ్ఞసత్తే తత్థ వచీసఙ్ఖారో చ నుప్పజ్జతి చిత్తసఙ్ఖారో చ నుప్పజ్జతి.
(ఖ) యత్థ వా పన…పే…? ఆమన్తా.
(చ) పచ్చనీకపుగ్గలోకాసా
౨౮. (క) యస్స యత్థ కాయసఙ్ఖారో నుప్పజ్జతి తస్స తత్థ వచీసఙ్ఖారో నుప్పజ్జతీతి?
వినా అస్సాసపస్సాసేహి వితక్కవిచారానం ఉప్పాదక్ఖణే తేసం తత్థ కాయసఙ్ఖారో నుప్పజ్జతి, నో చ తేసం తత్థ వచీసఙ్ఖారో నుప్పజ్జతి. సబ్బేసం చిత్తస్స భఙ్గక్ఖణే వినా అస్సాసపస్సాసేహి అవితక్కఅవిచారచిత్తస్స ఉప్పాదక్ఖణే అసఞ్ఞసత్తానం తేసం తత్థ కాయసఙ్ఖారో చ నుప్పజ్జతి వచీసఙ్ఖారో చ నుప్పజ్జతి.
(ఖ) యస్స వా పన యత్థ…పే…? ఆమన్తా.
(యస్సకమ్పి యస్సయత్థకమ్పి సదిసం విత్థారేతబ్బం, యస్సయత్థకే నిరోధసమాపన్నానన్తి న లబ్భతి.)