(౫) పచ్చుప్పన్నానాగతవారో

(క) అనులోమపుగ్గలో

౬౮. (క) యస్స దుక్ఖసచ్చం ఉప్పజ్జతి తస్స సముదయసచ్చం ఉప్పజ్జిస్సతీతి?

అగ్గమగ్గస్స ఉప్పాదక్ఖణే అరహన్తానం చిత్తస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స ఉప్పాదక్ఖణే తేసం దుక్ఖసచ్చం ఉప్పజ్జతి, నో చ తేసం సముదయసచ్చం ఉప్పజ్జిస్సతి. ఇతరేసం ఉపపజ్జన్తానం పవత్తే చిత్తస్స ఉప్పాదక్ఖణే తేసం దుక్ఖసచ్చఞ్చ ఉప్పజ్జతి సముదయసచ్చఞ్చ ఉప్పజ్జిస్సతి.

(ఖ) యస్స వా పన సముదయసచ్చం ఉప్పజ్జిస్సతి తస్స దుక్ఖసచ్చం ఉప్పజ్జతీతి?

సబ్బేసం చవన్తానం పవత్తే చిత్తస్స భఙ్గక్ఖణే అరూపే మగ్గస్స చ ఫలస్స చ ఉప్పాదక్ఖణే తేసం సముదయసచ్చం ఉప్పజ్జిస్సతి, నో చ తేసం దుక్ఖసచ్చం ఉప్పజ్జతి. సబ్బేసం ఉపపజ్జన్తానం పవత్తే చిత్తస్స ఉప్పాదక్ఖణే తేసం సముదయసచ్చఞ్చ ఉప్పజ్జిస్సతి దుక్ఖసచ్చఞ్చ ఉప్పజ్జతి.

(క) యస్స దుక్ఖసచ్చం ఉప్పజ్జతి తస్స మగ్గసచ్చం ఉప్పజ్జిస్సతీతి?

అగ్గమగ్గస్స ఉప్పాదక్ఖణే అరహన్తానం చిత్తస్స ఉప్పాదక్ఖణే యే చ పుథుజ్జనా మగ్గం న పటిలభిస్సన్తి తేసం ఉపపజ్జన్తానం పవత్తే చిత్తస్స ఉప్పాదక్ఖణే తేసం దుక్ఖసచ్చం ఉప్పజ్జతి, నో చ తేసం మగ్గసచ్చం ఉప్పజ్జిస్సతి. యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స ఉప్పాదక్ఖణే యే చఞ్ఞే మగ్గం పటిలభిస్సన్తి తేసం ఉపపజ్జన్తానం పవత్తే చిత్తస్స ఉప్పాదక్ఖణే తేసం దుక్ఖసచ్చఞ్చ ఉప్పజ్జతి మగ్గసచ్చఞ్చ ఉప్పజ్జిస్సతి.

(ఖ) యస్స వా పన మగ్గసచ్చం ఉప్పజ్జిస్సతి తస్స దుక్ఖసచ్చం ఉప్పజ్జతీతి?

యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స భఙ్గక్ఖణే యే చఞ్ఞే మగ్గం పటిలభిస్సన్తి తేసం చవన్తానం పవత్తే చిత్తస్స భఙ్గక్ఖణే అరూపే మగ్గస్స చ ఫలస్స చ ఉప్పాదక్ఖణే తేసం మగ్గసచ్చం ఉప్పజ్జిస్సతి, నో చ తేసం దుక్ఖసచ్చం ఉప్పజ్జతి. యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స ఉప్పాదక్ఖణే యే చఞ్ఞే మగ్గం పటిలభిస్సన్తి తేసం ఉపపజ్జన్తానం పవత్తే చిత్తస్స ఉప్పాదక్ఖణే తేసం మగ్గసచ్చఞ్చ ఉప్పజ్జిస్సతి దుక్ఖసచ్చఞ్చ ఉప్పజ్జతి.

౬౯. (క) యస్స సముదయసచ్చం ఉప్పజ్జతి తస్స మగ్గసచ్చం ఉప్పజ్జిస్సతీతి?

యే పుథుజ్జనా మగ్గం న పటిలభిస్సన్తి తేసం తణ్హాయ ఉప్పాదక్ఖణే తేసం సముదయసచ్చం ఉప్పజ్జతి, నో చ తేసం మగ్గసచ్చం ఉప్పజ్జిస్సతి. యే మగ్గం పటిలభిస్సన్తి తేసం తణ్హాయ ఉప్పాదక్ఖణే తేసం సముదయసచ్చఞ్చ ఉప్పజ్జతి మగ్గసచ్చఞ్చ ఉప్పజ్జిస్సతి.

(ఖ) యస్స వా పన మగ్గసచ్చం ఉప్పజ్జిస్సతి తస్స సముదయసచ్చం ఉప్పజ్జతీతి?

యస్స చిత్తస్స అనన్తరా అగ్గమగ్గం పటిలభిస్సన్తి యే [పటిలభిస్సన్తి తస్స చిత్తస్స ఉప్పాదక్ఖణే యే (సీ. స్యా.) పుగ్గలోకాసవారేపి] చఞ్ఞే మగ్గం పటిలభిస్సన్తి తేసం తణ్హాయ భఙ్గక్ఖణే తణ్హావిప్పయుత్తచిత్తే వత్తమానే నిరోధసమాపన్నానం అసఞ్ఞసత్తానం తేసం మగ్గసచ్చం ఉప్పజ్జిస్సతి, నో చ తేసం సముదయసచ్చం ఉప్పజ్జతి. యే మగ్గం పటిలభిస్సన్తి తేసం తణ్హాయ ఉప్పాదక్ఖణే తేసం మగ్గసచ్చఞ్చ ఉప్పజ్జిస్సతి సముదయసచ్చఞ్చ ఉప్పజ్జతి.

(ఖ) అనులోమఓకాసో

౭౦. యత్థ దుక్ఖసచ్చం ఉప్పజ్జతి…పే… (యత్థకమ్పి యస్సయత్థకసదిసం కాతబ్బం).

(గ) అనులోమపుగ్గలోకాసా

౭౧. (క) యస్స యత్థ దుక్ఖసచ్చం ఉప్పజ్జతి తస్స తత్థ సముదయసచ్చం ఉప్పజ్జిస్సతీతి?

అగ్గమగ్గస్స ఉప్పాదక్ఖణే అరహన్తానం చిత్తస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స ఉప్పాదక్ఖణే అసఞ్ఞసత్తం ఉపపజ్జన్తానం తేసం తత్థ దుక్ఖసచ్చం ఉప్పజ్జతి, నో చ తేసం తత్థ సముదయసచ్చం ఉప్పజ్జిస్సతి. ఇతరేసం చతువోకారం పఞ్చవోకారం ఉపపజ్జన్తానం పవత్తే చిత్తస్స ఉప్పాదక్ఖణే తేసం తత్థ దుక్ఖసచ్చఞ్చ ఉప్పజ్జతి సముదయసచ్చఞ్చ ఉప్పజ్జిస్సతి.

(ఖ) యస్స వా పన యత్థ సముదయసచ్చం ఉప్పజ్జిస్సతి తస్స తత్థ దుక్ఖసచ్చం ఉప్పజ్జతీతి?

చతువోకారా పఞ్చవోకారా చవన్తానం పవత్తే చిత్తస్స భఙ్గక్ఖణే అరూపే మగ్గస్స చ ఫలస్స చ ఉప్పాదక్ఖణే తేసం తత్థ సముదయసచ్చం ఉప్పజ్జిస్సతి, నో చ తేసం తత్థ దుక్ఖసచ్చం ఉప్పజ్జతి. చతువోకారం పఞ్చవోకారం ఉపపజ్జన్తానం పవత్తే చిత్తస్స ఉప్పాదక్ఖణే తేసం తత్థ సముదయసచ్చఞ్చ ఉప్పజ్జిస్సతి దుక్ఖసచ్చఞ్చ ఉప్పజ్జతి.

(క) యస్స యత్థ దుక్ఖసచ్చం ఉప్పజ్జతి తస్స తత్థ మగ్గసచ్చం ఉప్పజ్జిస్సతీతి?

అగ్గమగ్గస్స ఉప్పాదక్ఖణే అరహన్తానం చిత్తస్స ఉప్పాదక్ఖణే ఆపాయికానం యే చ పుథుజ్జనా మగ్గం న పటిలభిస్సన్తి తేసం ఉపపజ్జన్తానం పవత్తే చిత్తస్స ఉప్పాదక్ఖణే అసఞ్ఞసత్తం ఉపపజ్జన్తానం తేసం తత్థ దుక్ఖసచ్చం ఉప్పజ్జతి, నో చ తేసం తత్థ మగ్గసచ్చం ఉప్పజ్జిస్సతి. యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స ఉప్పాదక్ఖణే యే చఞ్ఞే మగ్గం పటిలభిస్సన్తి తేసం ఉపపజ్జన్తానం పవత్తే చిత్తస్స ఉప్పాదక్ఖణే తేసం తత్థ దుక్ఖసచ్చఞ్చ ఉప్పజ్జతి మగ్గసచ్చఞ్చ ఉప్పజ్జిస్సతి.

(ఖ) యస్స వా పన యత్థ మగ్గసచ్చం ఉప్పజ్జిస్సతి తస్స తత్థ దుక్ఖసచ్చం ఉప్పజ్జతీతి?

యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స భఙ్గక్ఖణే యే చఞ్ఞే మగ్గం పటిలభిస్సన్తి తేసం చవన్తానం పవత్తే చిత్తస్స భఙ్గక్ఖణే అరూపే మగ్గస్స చ ఫలస్స చ ఉప్పాదక్ఖణే తేసం తత్థ మగ్గసచ్చం ఉప్పజ్జిస్సతి, నో చ తేసం తత్థ దుక్ఖసచ్చం ఉప్పజ్జతి. యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స ఉప్పాదక్ఖణే యే చఞ్ఞే మగ్గం పటిలభిస్సన్తి తేసం ఉపపజ్జన్తానం పవత్తే చిత్తస్స ఉప్పాదక్ఖణే తేసం తత్థ మగ్గసచ్చఞ్చ ఉప్పజ్జిస్సతి దుక్ఖసచ్చఞ్చ ఉప్పజ్జతి.

౭౨. (క) యస్స యత్థ సముదయసచ్చం ఉప్పజ్జతి తస్స తత్థ మగ్గసచ్చం ఉప్పజ్జిస్సతీతి?

ఆపాయికానం యే చ పుథుజ్జనా మగ్గం న పటిలభిస్సన్తి తేసం తణ్హాయ ఉప్పాదక్ఖణే తేసం తత్థ సముదయసచ్చం ఉప్పజ్జతి, నో చ తేసం తత్థ మగ్గసచ్చం ఉప్పజ్జిస్సతి. యే మగ్గం పటిలభిస్సన్తి తేసం తణ్హాయ ఉప్పాదక్ఖణే తేసం తత్థ సముదయసచ్చఞ్చ ఉప్పజ్జతి మగ్గసచ్చఞ్చ ఉప్పజ్జిస్సతి.

(ఖ) యస్స వా పన యత్థ మగ్గసచ్చం ఉప్పజ్జిస్సతి తస్స తత్థ సముదయసచ్చం ఉప్పజ్జతీతి?

యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం తణ్హాయ భఙ్గక్ఖణే తణ్హావిప్పయుత్తచిత్తే వత్తమానే తేసం తత్థ మగ్గసచ్చం ఉప్పజ్జిస్సతి, నో చ తేసం తత్థ సముదయసచ్చం ఉప్పజ్జతి. యే మగ్గం పటిలభిస్సన్తి తేసం తణ్హాయ ఉప్పాదక్ఖణే తేసం తత్థ మగ్గసచ్చఞ్చ ఉప్పజ్జిస్సతి సముదయసచ్చఞ్చ ఉప్పజ్జతి.

(ఘ) పచ్చనీకపుగ్గలో

౭౩. (క) యస్స దుక్ఖసచ్చం నుప్పజ్జతి తస్స సముదయసచ్చం నుప్పజ్జిస్సతీతి?

సబ్బేసం చవన్తానం పవత్తే చిత్తస్స భఙ్గక్ఖణే అరూపే మగ్గస్స చ ఫలస్స చ ఉప్పాదక్ఖణే తేసం దుక్ఖసచ్చం నుప్పజ్జతి, నో చ తేసం సముదయసచ్చం నుప్పజ్జిస్సతి. అగ్గమగ్గస్స భఙ్గక్ఖణే అరహన్తానం చిత్తస్స భఙ్గక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స భఙ్గక్ఖణే అరూపే అగ్గమగ్గస్స చ ఫలస్స చ ఉప్పాదక్ఖణే తేసం దుక్ఖసచ్చఞ్చ నుప్పజ్జతి సముదయసచ్చఞ్చ నుప్పజ్జిస్సతి.

(ఖ) యస్స వా పన సముదయసచ్చం నుప్పజ్జిస్సతి తస్స దుక్ఖసచ్చం నుప్పజ్జతీతి?

అగ్గమగ్గస్స ఉప్పాదక్ఖణే అరహన్తానం చిత్తస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స ఉప్పాదక్ఖణే తేసం సముదయసచ్చం నుప్పజ్జిస్సతి, నో చ తేసం దుక్ఖసచ్చం నుప్పజ్జతి. అగ్గమగ్గస్స భఙ్గక్ఖణే అరహన్తానం చిత్తస్స భఙ్గక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స భఙ్గక్ఖణే అరూపే అగ్గమగ్గస్స చ ఫలస్స చ ఉప్పాదక్ఖణే తేసం సముదయసచ్చఞ్చ నుప్పజ్జిస్సతి దుక్ఖసచ్చఞ్చ నుప్పజ్జతి.

(క) యస్స దుక్ఖసచ్చం నుప్పజ్జతి తస్స మగ్గసచ్చం నుప్పజ్జిస్సతీతి?

యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స భఙ్గక్ఖణే యే చఞ్ఞే మగ్గం పటిలభిస్సన్తి తేసం చవన్తానం పవత్తే చిత్తస్స భఙ్గక్ఖణే అరూపే మగ్గస్స చ ఫలస్స చ ఉప్పాదక్ఖణే తేసం దుక్ఖసచ్చం నుప్పజ్జతి, నో చ తేసం మగ్గసచ్చం నుప్పజ్జిస్సతి. అగ్గమగ్గస్స భఙ్గక్ఖణే అరహన్తానం చిత్తస్స భఙ్గక్ఖణే యే చ పుథుజ్జనా మగ్గం న పటిలభిస్సన్తి తేసం చవన్తానం పవత్తే చిత్తస్స భఙ్గక్ఖణే అరూపే అగ్గమగ్గస్స చ ఫలస్స చ ఉప్పాదక్ఖణే తేసం దుక్ఖసచ్చఞ్చ నుప్పజ్జతి మగ్గసచ్చఞ్చ నుప్పజ్జిస్సతి.

(ఖ) యస్స వా పన మగ్గసచ్చం నుప్పజ్జిస్సతి తస్స దుక్ఖసచ్చం నుప్పజ్జతీతి?

అగ్గమగ్గస్స ఉప్పాదక్ఖణే అరహన్తానం చిత్తస్స ఉప్పాదక్ఖణే యే చ పుథుజ్జనా మగ్గం న పటిలభిస్సన్తి తేసం ఉపపజ్జన్తానం పవత్తే చిత్తస్స ఉప్పాదక్ఖణే తేసం మగ్గసచ్చం నుప్పజ్జిస్సతి, నో చ తేసం దుక్ఖసచ్చం నుప్పజ్జతి. అగ్గమగ్గస్స భఙ్గక్ఖణే అరహన్తానం చిత్తస్స భఙ్గక్ఖణే యే చ పుథుజ్జనా మగ్గం న పటిలభిస్సన్తి తేసం చవన్తానం పవత్తే చిత్తస్స భఙ్గక్ఖణే అరూపే అగ్గమగ్గస్స చ ఫలస్స చ ఉప్పాదక్ఖణే తేసం మగ్గసచ్చఞ్చ నుప్పజ్జిస్సతి దుక్ఖసచ్చఞ్చ నుప్పజ్జతి.

౭౪. (క) యస్స సముదయసచ్చం నుప్పజ్జతి తస్స మగ్గసచ్చం నుప్పజ్జిస్సతీతి?

యస్స చిత్తస్స అనన్తరా అగ్గమగ్గం పటిలభిస్సాన్తి యే చఞ్ఞే మగ్గం పటిలభిస్సన్తి తేసం తణ్హాయ భఙ్గక్ఖణే తణ్హావిప్పయుత్తచిత్తే వత్తమానే నిరోధసమాపన్నానం అసఞ్ఞసత్తానం తేసం సముదయసచ్చం నుప్పజ్జతి, నో చ తేసం మగ్గసచ్చం నుప్పజ్జిస్సతి. అగ్గమగ్గసమఙ్గీనం అరహన్తానం యే చ పుథుజ్జనా మగ్గం న పటిలభిస్సన్తి తేసం తణ్హాయ భఙ్గక్ఖణే తణ్హావిప్పయుత్తచిత్తే వత్తమానే తేసం సముదయసచ్చఞ్చ నుప్పజ్జతి మగ్గసచ్చఞ్చ నుప్పజ్జిస్సతి.

(ఖ) యస్స వా పన మగ్గసచ్చం నుప్పజ్జిస్సతి తస్స సముదయసచ్చం నుప్పజ్జతీతి?

యే పుథుజ్జనా మగ్గం న పటిలభిస్సన్తి తేసం తణ్హాయ ఉప్పాదక్ఖణే తేసం మగ్గసచ్చం నుప్పజ్జిస్సతి, నో చ తేసం సముదయసచ్చం నుప్పజ్జతి. అగ్గమగ్గసమఙ్గీనం అరహన్తానం యే చ పుథుజ్జనా మగ్గం న పటిలభిస్సన్తి తేసం తణ్హాయ భఙ్గక్ఖణే తణ్హావిప్పయుత్తచిత్తే వత్తమానే తేసం మగ్గసచ్చఞ్చ నుప్పజ్జిస్సతి సముదయసచ్చఞ్చ నుప్పజ్జతి.

(ఙ) పచ్చనీకఓకాసో

౭౫. యత్థ దుక్ఖసచ్చం నుప్పజ్జతి…పే….

(చ) పచ్చనీకపుగ్గలోకాసా

౭౬. (క) యస్స యత్థ దుక్ఖసచ్చం నుప్పజ్జతి తస్స తత్థ సముదయసచ్చం నుప్పజ్జిస్సతీతి?

చతువోకారా పఞ్చవోకారా చవన్తానం పవత్తే చిత్తస్స భఙ్గక్ఖణే అరూపే మగ్గస్స చ ఫలస్స చ ఉప్పాదక్ఖణే తేసం తత్థ దుక్ఖసచ్చం నుప్పజ్జతి, నో చ తేసం తత్థ సముదయసచ్చం నుప్పజ్జిస్సతి. అగ్గమగ్గస్స భఙ్గక్ఖణే అరహన్తానం చిత్తస్స భఙ్గక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స భఙ్గక్ఖణే అసఞ్ఞసత్తా చవన్తానం అరూపే అగ్గమగ్గస్స చ ఫలస్స చ ఉప్పాదక్ఖణే తేసం తత్థ దుక్ఖసచ్చఞ్చ నుప్పజ్జతి సముదయసచ్చఞ్చ నుప్పజ్జిస్సతి.

(ఖ) యస్స వా పన యత్థ సముదయసచ్చం నుప్పజ్జిస్సతి తస్స తత్థ దుక్ఖసచ్చం నుప్పజ్జతీతి?

అగ్గమగ్గస్స ఉప్పాదక్ఖణే అరహన్తానం చిత్తస్స ఉప్పాదక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స ఉప్పాదక్ఖణే అసఞ్ఞసత్తం ఉపపజ్జన్తానం తేసం తత్థ సముదయసచ్చం నుప్పజ్జిస్సతి, నో చ తేసం తత్థ దుక్ఖసచ్చం నుప్పజ్జతి. అగ్గమగ్గస్స భఙ్గక్ఖణే అరహన్తానం చిత్తస్స భఙ్గక్ఖణే యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స భఙ్గక్ఖణే అరూపే అగ్గమగ్గస్స చ ఫలస్స చ ఉప్పాదక్ఖణే అసఞ్ఞసత్తా చవన్తానం తేసం తత్థ సముదయసచ్చఞ్చ నుప్పజ్జిస్సతి దుక్ఖసచ్చఞ్చ నుప్పజ్జతి.

(క) యస్స యత్థ దుక్ఖసచ్చం నుప్పజ్జతి తస్స తత్థ మగ్గసచ్చం నుప్పజ్జిస్సతీతి?

యస్స చిత్తస్స అనన్తరా అగ్గమగ్గం పటిలభిస్సన్తి తస్స చిత్తస్స భఙ్గక్ఖణే యే చఞ్ఞే మగ్గం పటిలభిస్సన్తి తేసం చవన్తానం పవత్తే చిత్తస్స భఙ్గక్ఖణే అరూపే మగ్గస్స చ ఫలస్స చ ఉప్పాదక్ఖణే తేసం తత్థ దుక్ఖసచ్చం నుప్పజ్జతి, నో చ తేసం తత్థ మగ్గసచ్చం నుప్పజ్జిస్సతి. అగ్గమగ్గస్స భఙ్గక్ఖణే అరహన్తానం చిత్తస్స భఙ్గక్ఖణే ఆపాయికానం యే చ పుథుజ్జనా మగ్గం న పటిలభిస్సన్తి తేసం చవన్తానం పవత్తే చిత్తస్స భఙ్గక్ఖణే అసఞ్ఞత్తా చవన్తానం అరూపే అగ్గమగ్గస్స చ ఫలస్స చ ఉప్పాదక్ఖణే అసఞ్ఞసత్తా చవన్తానం తేసం తత్థ దుక్ఖసచ్చఞ్చ నుప్పజ్జతి మగ్గసచ్చఞ్చ నుప్పజ్జిస్సతి.

(ఖ) యస్స వా పన యత్థ మగ్గసచ్చం నుప్పజ్జిస్సతి తస్స తత్థ దుక్ఖసచ్చం నుప్పజ్జతీతి?

అగ్గమగ్గస్స ఉప్పాదక్ఖణే అరహన్తానం చిత్తస్స ఉప్పాదక్ఖణే ఆపాయికానం యే చ పుథుజ్జనా మగ్గం న పటిలభిస్సన్తి తేసం ఉపపజ్జన్తానం పవత్తే చిత్తస్స ఉప్పాదక్ఖణే అసఞ్ఞసత్తం ఉపపజ్జన్తానం తేసం తత్థ మగ్గసచ్చం నుప్పజ్జిస్సతి, నో చ తేసం తత్థ దుక్ఖసచ్చం నుప్పజ్జతి. అగ్గమగ్గస్స భఙ్గక్ఖణే అరహన్తానం చిత్తస్స భఙ్గక్ఖణే ఆపాయికానం యే చ పుథుజ్జనా మగ్గం న పటిలభిస్సన్తి తేసం చవన్తానం పవత్తే చిత్తస్స భఙ్గక్ఖణే అరూపే అగ్గమగ్గస్స చ ఫలస్స చ ఉప్పాదక్ఖణే అసఞ్ఞసత్తా చవన్తానం తేసం తత్థ మగ్గసచ్చఞ్చ నుప్పజ్జిస్సతి దుక్ఖసచ్చఞ్చ నుప్పజ్జతి.

౭౭. (క) యస్స యత్థ సముదయసచ్చం నుప్పజ్జతి తస్స తత్థ మగ్గసచ్చం నుప్పజ్జిస్సతీతి?

యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం తణ్హాయ భఙ్గక్ఖణే తణ్హావిప్పయుత్తచిత్తే వత్తమానే తేసం తత్థ సముదయసచ్చం నుప్పజ్జతి, నో చ తేసం తత్థ మగ్గసచ్చం నుప్పజ్జిస్సతి. అగ్గమగ్గసమఙ్గీనం అరహన్తానం, ఆపాయికానం యే చ పుథుజ్జనా మగ్గం న పటిలభిస్సన్తి తేసం తణ్హాయ భఙ్గక్ఖణే తణ్హావిప్పయుత్తచిత్తే వత్తమానే అసఞ్ఞసత్తానం తేసం తత్థ సముదయసచ్చఞ్చ నుప్పజ్జతి మగ్గసచ్చఞ్చ నుప్పజ్జిస్సతి.

(ఖ) యస్స వా పన యత్థ మగ్గసచ్చం నుప్పజ్జిస్సతి తస్స తత్థ సముదయసచ్చం నుప్పజ్జతీతి?

ఆపాయికానం యే చ పుథుజ్జనా మగ్గం న పటిలభిస్సన్తి తేసం తణ్హాయ ఉప్పాదక్ఖణే తేసం తత్థ మగ్గసచ్చం నుప్పజ్జిస్సతి, నో చ తేసం తత్థ సముదయసచ్చం నుప్పజ్జతి. అగ్గమగ్గసమఙ్గీనం అరహన్తానం ఆపాయికానం యే చ పుథుజ్జనా మగ్గం న పటిలభిస్సన్తి తేసం తణ్హాయ భఙ్గక్ఖణే తణ్హావిప్పయుత్తచిత్తే వత్తమానే అసఞ్ఞసత్తానం తేసం తత్థ మగ్గసచ్చఞ్చ నుప్పజ్జిస్సతి సముదయసచ్చఞ్చ నుప్పజ్జతి.