(౬) అతీతానాగతవారో
(క) అనులోమపుగ్గలో
౭౮. (క) యస్స దుక్ఖసచ్చం ఉప్పజ్జిత్థ తస్స సముదయసచ్చం ఉప్పజ్జిస్సతీతి?
అగ్గమగ్గసమఙ్గీనం అరహన్తానం యస్స చిత్తస్స అనన్తరా అగ్గమగ్గం పటిలభిస్సన్తి తేసం దుక్ఖసచ్చం ఉప్పజ్జిత్థ, నో చ తేసం సముదయసచ్చం ఉప్పజ్జిస్సతి. ఇతరేసం తేసం దుక్ఖసచ్చఞ్చ ఉప్పజ్జిత్థ సముదయసచ్చఞ్చ ఉప్పజ్జిస్సతి.
(ఖ) యస్స వా పన సముదయసచ్చం ఉప్పజ్జిస్సతి తస్స దుక్ఖసచ్చం ఉప్పజ్జిత్థాతి? ఆమన్తా.
(క) యస్స దుక్ఖసచ్చం ఉప్పజ్జిత్థ తస్స మగ్గసచ్చం ఉప్పజ్జిస్సతీతి?
అగ్గమగ్గసమఙ్గీనం అరహన్తానం యే చ పుథుజ్జనా మగ్గం న పటిలభిస్సన్తి తేసం దుక్ఖసచ్చం ఉప్పజ్జిత్థ, నో చ తేసం మగ్గసచ్చం ఉప్పజ్జిస్సతి. యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం దుక్ఖసచ్చఞ్చ ఉప్పజ్జిత్థ మగ్గసచ్చఞ్చ ఉప్పజ్జిస్సతి.
(ఖ) యస్స వా పన…పే…? ఆమన్తా.
౭౯. (క) యస్స సముదయసచ్చం ఉప్పజ్జిత్థ తస్స మగ్గసచ్చం ఉప్పజ్జిస్సతీతి? అగ్గమగ్గసమఙ్గీనం అరహన్తానం యే చ పుథుజ్జనా మగ్గం న పటిలభిస్సన్తి తేసం సముదయసచ్చం ఉప్పజ్జిత్థ, నో చ తేసం మగ్గసచ్చం ఉప్పజ్జిస్సతి. యస్స చిత్తస్స అనన్తరా అగ్గమగ్గం పటిలభిస్సన్తి, యే చఞ్ఞే మగ్గం పటిలభిస్సన్తి తేసం సముదయసచ్చఞ్చ ఉప్పజ్జిత్థ మగ్గసచ్చఞ్చ ఉప్పజ్జిస్సతి.
(ఖ) యస్స వా పన…పే…? ఆమన్తా.
(ఖ) అనులోమఓకాసో
౮౦. యత్థ దుక్ఖసచ్చం ఉప్పజ్జిత్థ…పే….
(గ) అనులోమపుగ్గలోకాసా
౮౧. (క) యస్స యత్థ దుక్ఖసచ్చం ఉప్పజ్జిత్థ తస్స తత్థ సముదయసచ్చం ఉప్పజ్జిస్సతీతి?
అగ్గమగ్గసమఙ్గీనం అరహన్తానం యస్స చిత్తస్స అనన్తరా అగ్గమగ్గం పటిలభిస్సన్తి అసఞ్ఞసత్తానం తేసం తత్థ దుక్ఖసచ్చం ఉప్పజ్జిత్థ, నో చ తేసం తత్థ సముదయసచ్చం ఉప్పజ్జిస్సతి. ఇతరేసం చతువోకారానం పఞ్చవోకారానం తేసం తత్థ దుక్ఖసచ్చఞ్చ ఉప్పజ్జిత్థ సముదయసచ్చఞ్చ ఉప్పజ్జిస్సతి.
(ఖ) యస్స వా పన యత్థ సముదయసచ్చం ఉప్పజ్జిస్సతి తస్స తత్థ దుక్ఖసచ్చం ఉప్పజ్జిత్థాతి?
సుద్ధావాసం ఉపపజ్జన్తానం తేసం తత్థ సముదయసచ్చం ఉప్పజ్జిస్సతి, నో చ తేసం తత్థ దుక్ఖసచ్చం ఉప్పజ్జిత్థ. ఇతరేసం చతువోకారానం పఞ్చవోకారానం తేసం తత్థ సముదయసచ్చఞ్చ ఉప్పజ్జిస్సతి దుక్ఖసచ్చఞ్చ ఉప్పజ్జిత్థ.
(క) యస్స యత్థ దుక్ఖసచ్చం ఉప్పజ్జిత్థ తస్స తత్థ మగ్గసచ్చం ఉప్పజ్జిస్సతీతి?
అగ్గమగ్గసమఙ్గీనం అరహన్తానం యే చ పుథుజ్జనా మగ్గం న పటిలభిస్సన్తి ఆపాయికానం అసఞ్ఞసత్తానం తేసం తత్థ దుక్ఖసచ్చం ఉప్పజ్జిత్థ, నో చ తేసం తత్థ మగ్గసచ్చం ఉప్పజ్జిస్సతి. యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం తత్థ దుక్ఖసచ్చఞ్చ ఉప్పజ్జిత్థ మగ్గసచ్చఞ్చ ఉప్పజ్జిస్సతి.
(ఖ) యస్స వా పన యత్థ మగ్గసచ్చం ఉప్పజ్జిస్సతి తస్స తత్థ దుక్ఖసచ్చం ఉప్పజ్జిత్థాతి?
సుద్ధావాసం ఉపపజ్జన్తానం తేసం తత్థ మగ్గసచ్చం ఉప్పజ్జిస్సతి, నో చ తేసం తత్థ దుక్ఖసచ్చం ఉప్పజ్జిత్థ. యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం తత్థ మగ్గసచ్చఞ్చ ఉప్పజ్జిస్సతి దుక్ఖసచ్చఞ్చ ఉప్పజ్జిత్థ.
౮౨. (క) యస్స యత్థ సముదయసచ్చం ఉప్పజ్జిత్థ తస్స తత్థ మగ్గసచ్చం ఉప్పజ్జిస్సతీతి?
అగ్గమగ్గసమఙ్గీనం అరహన్తానం యే చ పుథుజ్జనా మగ్గం న పటిలభిస్సన్తి ఆపాయికానం తేసం తత్థ సముదయసచ్చం ఉప్పజ్జిత్థ, నో చ తేసం తత్థ మగ్గసచ్చం ఉప్పజ్జిస్సతి. యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం తత్థ సముదయసచ్చఞ్చ ఉప్పజ్జిత్థ మగ్గసచ్చఞ్చ ఉప్పజ్జిస్సతి.
(ఖ) యస్స వా పన యత్థ మగ్గసచ్చం ఉప్పజ్జిస్సతి తస్స తత్థ సముదయసచ్చం ఉప్పజ్జిత్థాతి?
సుద్ధావాసానం దుతియే చిత్తే వత్తమానే తేసం తత్థ మగ్గసచ్చం ఉప్పజ్జిస్సతి, నో చ తేసం తత్థ సముదయసచ్చం ఉప్పజ్జిత్థ. యస్స చిత్తస్స అనన్తరా అగ్గమగ్గం పటిలభిస్సన్తి యే చఞ్ఞే మగ్గం పటిలభిస్సన్తి తేసం తత్థ మగ్గసచ్చఞ్చ ఉప్పజ్జిస్సతి సముదయసచ్చఞ్చ ఉప్పజ్జిత్థ.
(ఘ) పచ్చనీకపుగ్గలో
౮౩. (క) యస్స దుక్ఖసచ్చం నుప్పజ్జిత్థ తస్స సముదయసచ్చం నుప్పజ్జిస్సతీతి? నత్థి.
(ఖ) యస్స వా పన సముదయసచ్చం నుప్పజ్జిస్సతి తస్స దుక్ఖసచ్చం నుప్పజ్జిత్థాతి? ఉప్పజ్జిత్థ.
(క) యస్స దుక్ఖసచ్చం నుప్పజ్జిత్థ తస్స మగ్గసచ్చం నుప్పజ్జిస్సతీతి? నత్థి.
(ఖ) యస్స వా పన మగ్గసచ్చం నుప్పజ్జిస్సతి తస్స దుక్ఖసచ్చం నుప్పజ్జిత్థాతి? ఉప్పజ్జిత్థ.
౮౪. (క) యస్స సముదయసచ్చం నుప్పజ్జిత్థ తస్స మగ్గసచ్చం నుప్పజ్జిస్సతీతి? నత్థి.
(ఖ) యస్స వా పన మగ్గసచ్చం నుప్పజ్జిస్సతి తస్స సముదయసచ్చం నుప్పజ్జిత్థాతి? ఉప్పజ్జిత్థ.
(ఙ) పచ్చనీకఓకాసో
౮౫. యత్థ దుక్ఖసచ్చం నుప్పజ్జిత్థ…పే….
(చ) పచ్చనీకపుగ్గలోకాసా
౮౬. (క) యస్స యత్థ దుక్ఖసచ్చం నుప్పజ్జిత్థ తస్స తత్థ సముదయసచ్చం నుప్పజ్జిస్సతీతి? ఉప్పజ్జిస్సతి.
(ఖ) యస్స వా పన యత్థ సముదయసచ్చం నుప్పజ్జిస్సతి తస్స తత్థ దుక్ఖసచ్చం నుప్పజ్జిత్థాతి? ఉప్పజ్జిత్థ.
(క) యస్స యత్థ దుక్ఖసచ్చం నుప్పజ్జిత్థ తస్స తత్థ మగ్గసచ్చం నుప్పజ్జిస్సతీతి? ఉప్పజ్జిస్సతి.
(ఖ) యస్స వా పన యత్థ మగ్గసచ్చం నుప్పజ్జిస్సతి తస్స తత్థ దుక్ఖసచ్చం నుప్పజ్జిత్థాతి? ఉప్పజ్జిత్థ.
౮౭. (క) యస్స యత్థ సముదయసచ్చం నుప్పజ్జిత్థ తస్స తత్థ మగ్గసచ్చం నుప్పజ్జిస్సతీతి?
సుద్ధావాసానం దుతియే చిత్తే వత్తమానే తేసం తత్థ సముదయసచ్చం నుప్పజ్జిత్థ, నో చ తేసం తత్థ మగ్గసచ్చం నుప్పజ్జిస్సతి. అసఞ్ఞసత్తానం తేసం తత్థ సముదయసచ్చఞ్చ నుప్పజ్జిత్థ మగ్గసచ్చఞ్చ నుప్పజ్జిస్సతి.
(ఖ) యస్స వా పన యత్థ మగ్గసచ్చం నుప్పజ్జిస్సతి తస్స తత్థ సముదయసచ్చం నుప్పజ్జిత్థాతి?
అగ్గమగ్గసమఙ్గీనం అరహన్తానం యే చ పుథుజ్జనా మగ్గం న పటిలభిస్సన్తి ఆపాయికానం తేసం తత్థ మగ్గసచ్చం నుప్పజ్జిస్సతి, నో చ తేసం తత్థ సముదయసచ్చం నుప్పజ్జిత్థ. అసఞ్ఞసత్తానం తేసం తత్థ మగ్గసచ్చఞ్చ నుప్పజ్జిస్సతి సముదయసచ్చఞ్చ నుప్పజ్జిత్థ.
ఉప్పాదవారో.