౧. పదసోధనవారో

(క) అనులోమం

౧౦. (క) చక్ఖు చక్ఖుధాతూతి?

దిబ్బచక్ఖు పఞ్ఞాచక్ఖు చక్ఖు, న చక్ఖుధాతు. చక్ఖుధాతు చక్ఖు చేవ చక్ఖుధాతు చ.

(ఖ) చక్ఖుధాతు చక్ఖూతి? ఆమన్తా.

(క) సోతం సోతధాతూతి?

దిబ్బసోతం తణ్హాసోతం సోతం, న సోతధాతు. సోతధాతు సోతఞ్చేవ సోతధాతు చ.

(ఖ) సోతధాతు సోతన్తి? ఆమన్తా.

(క) ఘానం ఘానధాతూతి? ఆమన్తా.

(ఖ) ఘానధాతు ఘానన్తి? ఆమన్తా. (జివ్హాపి ఘానధాతుసదిసా).

(క) కాయో కాయధాతూతి?

కాయధాతుం ఠపేత్వా అవసేసో కాయో [అవసేసో కాయో కాయో (స్యా.)], న కాయధాతు. కాయధాతు కాయో చేవ కాయధాతు చ.

(ఖ) కాయధాతు కాయోతి? ఆమన్తా.

(క) రూపం రూపధాతూతి?

రూపధాతుం ఠపేత్వా అవసేసం రూపం, న రూపధాతు. రూపధాతు రూపఞ్చేవ రూపధాతు చ.

(ఖ) రూపధాతు రూపన్తి? ఆమన్తా. (సద్దో ఘానసదిసో).

(క) గన్ధో గన్ధధాతూతి?

సీలగన్ధో సమాధిగన్ధో పఞ్ఞాగన్ధో గన్ధో, న గన్ధధాతు. గన్ధధాతు గన్ధో చేవ గన్ధధాతు చ.

(ఖ) గన్ధధాతు గన్ధోతి? ఆమన్తా.

(క) రసో రసధాతూతి?

అత్థరసో ధమ్మరసో విముత్తిరసో రసో, న రసధాతు. రసధాతు రసో చేవ రసధాతు చ.

(ఖ) రసధాతు రసోతి? ఆమన్తా. (ఫోట్ఠబ్బో ఘానసదిసో).

(క) చక్ఖువిఞ్ఞాణం చక్ఖువిఞ్ఞాణధాతూతి? ఆమన్తా.

(ఖ) చక్ఖువిఞ్ఞాణధాతు చక్ఖువిఞ్ఞాణన్తి? ఆమన్తా.

సోతవిఞ్ఞాణం…పే… ఘానవిఞ్ఞాణం… జివ్హావిఞ్ఞాణం… కాయవిఞ్ఞాణం….

(క) మనో మనోధాతూతి?

మనోధాతుం ఠపేత్వా అవసేసో మనో, న మనోధాతు. మనోధాతు మనో చేవ మనోధాతు చ.

(ఖ) మనోధాతు మనోతి? ఆమన్తా.

(క) మనోవిఞ్ఞాణం మనోవిఞ్ఞాణధాతూతి? ఆమన్తా.

(ఖ) మనోవిఞ్ఞాణధాతు మనోవిఞ్ఞాణన్తి? ఆమన్తా.

(క) ధమ్మో ధమ్మధాతూతి?

ధమ్మధాతుం ఠపేత్వా అవసేసో ధమ్మో, న ధమ్మధాతు. ధమ్మధాతు ధమ్మో చేవ ధమ్మధాతు చ.

(ఖ) ధమ్మధాతు ధమ్మోతి? ఆమన్తా.

(ఖ) పచ్చనీకం

౧౧. (క) న చక్ఖు న చక్ఖుధాతూతి? ఆమన్తా.

(ఖ) న చక్ఖుధాతు న చక్ఖూతి?

దిబ్బచక్ఖు పఞ్ఞాచక్ఖు న చక్ఖుధాతు, చక్ఖు. చక్ఖుఞ్చ చక్ఖుధాతుఞ్చ ఠపేత్వా అవసేసం న చేవ చక్ఖు న చ చక్ఖుధాతు.

(క) న సోతం న సోతధాతూతి? ఆమన్తా.

(ఖ) న సోతధాతు న సోతన్తి?

దిబ్బసోతం తణ్హాసోతం న సోతధాతు, సోతం. సోతఞ్చ సోతధాతుఞ్చ ఠపేత్వా అవసేసం న చేవ సోతం న చ సోతధాతు.

(క) న ఘానం న ఘానధాతూతి? ఆమన్తా.

(ఖ) న ఘానధాతు న ఘానన్తి? ఆమన్తా.

న జివ్హా… (సంఖిత్తం [యం సంఖిత్తం (స్యా.)], ఉభతో ఆమన్తా).

(క) న కాయో న కాయధాతూతి? ఆమన్తా.

(ఖ) న కాయధాతు న కాయోతి?

కాయధాతుం ఠపేత్వా అవసేసో న కాయధాతు, కాయో. కాయఞ్చ కాయధాతుఞ్చ ఠపేత్వా అవసేసో [అవసేసో కాయో (స్యా.)] న చేవ కాయో న చ కాయధాతు.

(క) న రూపం న రూపధాతూతి? ఆమన్తా.

(ఖ) న రూపధాతు న రూపన్తి?

రూపధాతుం ఠపేత్వా అవసేసం న రూపధాతు, రూపం. రూపఞ్చ రూపధాతుఞ్చ ఠపేత్వా అవసేసం న చేవ రూపం న చ రూపధాతు.

న సద్దో…పే… న గన్ధో న గన్ధధాతూతి? ఆమన్తా.

న గన్ధధాతు న గన్ధోతి?

సీలగన్ధో సమాధిగన్ధో పఞ్ఞాగన్ధో న గన్ధధాతు, గన్ధో. గన్ధఞ్చ గన్ధధాతుఞ్చ ఠపేత్వా అవసేసో న చేవ గన్ధో న చ గన్ధధాతు.

(క) న రసో న రసధాతూతి? ఆమన్తా.

(ఖ) న రసధాతు న రసోతి?

అత్థరసో ధమ్మరసో విముత్తిరసో న రసధాతు, రసో. రసఞ్చ రసధాతుఞ్చ ఠపేత్వా అవసేసో న చేవ రసో న చ రసధాతు.

న ఫోట్ఠబ్బో…పే… న చక్ఖువిఞ్ఞాణం న చక్ఖువిఞ్ఞాణధాతూతి? ఆమన్తా.

న చక్ఖువిఞ్ఞాణధాతు న చక్ఖువిఞ్ఞాణన్తి? ఆమన్తా.

న సోతవిఞ్ఞాణం…పే… న ఘానవిఞ్ఞాణం… న జివ్హావిఞ్ఞాణం… న కాయవిఞ్ఞాణం….

(క) న మనో న మనోధాతూతి? ఆమన్తా.

(ఖ) న మనోధాతు న మనోతి?

మనోధాతుం ఠపేత్వా అవసేసో న మనోధాతు, మనో. మనఞ్చ మనోధాతుఞ్చ ఠపేత్వా అవసేసో న చేవ మనో న చ మనోధాతు.

(క) న మనోవిఞ్ఞాణం న మనోవిఞ్ఞాణధాతూతి? ఆమన్తా.

(ఖ) న మనోవిఞ్ఞాణధాతు న మనోవిఞ్ఞాణన్తి? ఆమన్తా.

(క) న ధమ్మో న ధమ్మధాతూతి? ఆమన్తా.

(ఖ) న ధమ్మధాతు న ధమ్మోతి?

ధమ్మధాతుం ఠపేత్వా అవసేసో న ధమ్మధాతు, ధమ్మో. ధమ్మఞ్చ ధమ్మధాతుఞ్చ ఠపేత్వా అవసేసో న చేవ ధమ్మో న చ ధమ్మధాతు.