౪. పచ్చుప్పన్నాతీతవారో

౨౦౯. (క) యో రూపక్ఖన్ధం పరిజానాతి సో వేదనాక్ఖన్ధం పరిజానిత్థాతి? నో.

(ఖ) యో వా పన వేదనాక్ఖన్ధం పరిజానిత్థ సో రూపక్ఖన్ధం పరిజానాతీతి? నో.

(క) యో రూపక్ఖన్ధం న పరిజానాతి సో వేదనాక్ఖన్ధం న పరిజానిత్థాతి?

అరహా రూపక్ఖన్ధం న పరిజానాతి, నో చ వేదనాక్ఖన్ధం న పరిజానిత్థ. అగ్గమగ్గసమఙ్గిఞ్చ అరహన్తఞ్చ ఠపేత్వా అవసేసా పుగ్గలా రూపక్ఖన్ధఞ్చ న పరిజానన్తి వేదనాక్ఖన్ధఞ్చ న పరిజానిత్థ.

(ఖ) యో వా పన వేదనాక్ఖన్ధం న పరిజానిత్థ సో రూపక్ఖన్ధం న పరిజానాతీతి?

అగ్గమగ్గసమఙ్గీ వేదనాక్ఖన్ధం న పరిజానిత్థ, నో చ రూపక్ఖన్ధం న పరిజానాతి. అగ్గమగ్గసమఙ్గిఞ్చ అరహన్తఞ్చ ఠపేత్వా అవసేసా పుగ్గలా వేదనాక్ఖన్ధఞ్చ న పరిజానిత్థ రూపక్ఖన్ధఞ్చ న పరిజానన్తి.