(౫) పచ్చుప్పన్నానాగతవారో

(క) అనులోమపుగ్గలో

౧౮౬. (క) యస్స రూపక్ఖన్ధో ఉప్పజ్జతి తస్స వేదనాక్ఖన్ధో నిరుజ్ఝిస్సతీతి? ఆమన్తా.

(ఖ) యస్స వా పన వేదనాక్ఖన్ధో నిరుజ్ఝిస్సతి తస్స రూపక్ఖన్ధో ఉప్పజ్జతీతి?

సబ్బేసం చవన్తానం అరూపం ఉపపజ్జన్తానం తేసం వేదనాక్ఖన్ధో నిరుజ్ఝిస్సతి, నో చ తేసం రూపక్ఖన్ధో ఉప్పజ్జతి. పఞ్చవోకారం ఉపపజ్జన్తానం అసఞ్ఞసత్తం ఉపపజ్జన్తానం తేసం వేదనాక్ఖన్ధో చ నిరుజ్ఝిస్సతి రూపక్ఖన్ధో చ ఉప్పజ్జతి.

౧౮౭. (క) యస్స వేదనాక్ఖన్ధో ఉప్పజ్జతి తస్స సఞ్ఞాక్ఖన్ధో నిరుజ్ఝిస్సతీతి? ఆమన్తా.

(ఖ) యస్స వా పన సఞ్ఞాక్ఖన్ధో నిరుజ్ఝిస్సతి తస్స వేదనాక్ఖన్ధో ఉప్పజ్జతీతి?

సబ్బేసం చవన్తానం అసఞ్ఞసత్తం ఉపపజ్జన్తానం తేసం సఞ్ఞాక్ఖన్ధో నిరుజ్ఝిస్సతి, నో చ తేసం వేదనాక్ఖన్ధో ఉప్పజ్జతి. చతువోకారం పఞ్చవోకారం ఉపపజ్జన్తానం తేసం సఞ్ఞాక్ఖన్ధో చ నిరుజ్ఝిస్సతి వేదనాక్ఖన్ధో చ ఉప్పజ్జతి.

(ఖ) అనులోమఓకాసో

౧౮౮. యత్థ రూపక్ఖన్ధో ఉప్పజ్జతి…పే….

(గ) అనులోమపుగ్గలోకాసా

౧౮౯. (క) యస్స యత్థ రూపక్ఖన్ధో ఉప్పజ్జతి తస్స తత్థ వేదనాక్ఖన్ధో నిరుజ్ఝిస్సతీతి?

అసఞ్ఞసత్తం ఉపపజ్జన్తానం తేసం తత్థ రూపక్ఖన్ధో ఉప్పజ్జతి, నో చ తేసం తత్థ వేదనాక్ఖన్ధో నిరుజ్ఝిస్సతి. పఞ్చవోకారం ఉపపజ్జన్తానం తేసం తత్థ రూపక్ఖన్ధో చ ఉప్పజ్జతి వేదనాక్ఖన్ధో చ నిరుజ్ఝిస్సతి.

(ఖ) యస్స వా పన యత్థ వేదనాక్ఖన్ధో నిరుజ్ఝిస్సతి తస్స తత్థ రూపక్ఖన్ధో ఉప్పజ్జతీతి?

పఞ్చవోకారా చవన్తానం అరూపానం తేసం తత్థ వేదనాక్ఖన్ధో నిరుజ్ఝిస్సతి, నో చ తేసం తత్థ రూపక్ఖన్ధో ఉప్పజ్జతి. పఞ్చవోకారం ఉపపజ్జన్తానం తేసం తత్థ వేదనాక్ఖన్ధో చ నిరుజ్ఝిస్సతి రూపక్ఖన్ధో చ ఉప్పజ్జతి.

౧౯౦. (క) యస్స యత్థ వేదనాక్ఖన్ధో ఉప్పజ్జతి తస్స తత్థ సఞ్ఞాక్ఖన్ధో నిరుజ్ఝిస్సతీతి? ఆమన్తా.

(ఖ) యస్స వా పన యత్థ సఞ్ఞాక్ఖన్ధో నిరుజ్ఝిస్సతి తస్స తత్థ వేదనాక్ఖన్ధో ఉప్పజ్జతీతి?

చతువోకారా పఞ్చవోకారా చవన్తానం తేసం తత్థ సఞ్ఞాక్ఖన్ధో నిరుజ్ఝిస్సతి, నో చ తేసం తత్థ వేదనాక్ఖన్ధో ఉప్పజ్జతి. చతువోకారం పఞ్చవోకారం ఉపపజ్జన్తానం తేసం తత్థ సఞ్ఞాక్ఖన్ధో చ నిరుజ్ఝిస్సతి వేదనాక్ఖన్ధో చ ఉప్పజ్జతి.

(ఘ) పచ్చనీకపుగ్గలో

౧౯౧. (క) యస్స రూపక్ఖన్ధో నుప్పజ్జతి తస్స వేదనాక్ఖన్ధో న నిరుజ్ఝిస్సతీతి?

సబ్బేసం చవన్తానం అరూపం ఉపపజ్జన్తానం తేసం రూపక్ఖన్ధో నుప్పజ్జతి, నో చ తేసం వేదనాక్ఖన్ధో న నిరుజ్ఝిస్సతి. పరినిబ్బన్తానం తేసం రూపక్ఖన్ధో చ నుప్పజ్జతి వేదనాక్ఖన్ధో చ న నిరుజ్ఝిస్సతి.

(ఖ) యస్స వా పన వేదనాక్ఖన్ధో న నిరుజ్ఝిస్సతి తస్స రూపక్ఖన్ధో నుప్పజ్జతీతి? ఆమన్తా.

౧౯౨. (క) యస్స వేదనాక్ఖన్ధో నుప్పజ్జతి తస్స సఞ్ఞాక్ఖన్ధో న నిరుజ్ఝిస్సతీతి?

సబ్బేసం చవన్తానం అసఞ్ఞసత్తం ఉపపజ్జన్తానం తేసం వేదనాక్ఖన్ధో నుప్పజ్జతి, నో చ తేసం సఞ్ఞాక్ఖన్ధో న నిరుజ్ఝిస్సతి. పరినిబ్బన్తానం తేసం వేదనాక్ఖన్ధో చ నుప్పజ్జతి సఞ్ఞాక్ఖన్ధో చ న నిరుజ్ఝిస్సతి.

(ఖ) యస్స వా పన సఞ్ఞాక్ఖన్ధో న నిరుజ్ఝిస్సతి తస్స వేదనాక్ఖన్ధో నుప్పజ్జతీతి? ఆమన్తా.

(ఙ) పచ్చనీకఓకాసో

౧౯౩. యత్థ రూపక్ఖన్ధో నుప్పజ్జతి…పే….

(చ) పచ్చనీకపుగ్గలోకాసా

౧౯౪. (క) యస్స యత్థ రూపక్ఖన్ధో నుప్పజ్జతి తస్స తత్థ వేదనాక్ఖన్ధో న నిరుజ్ఝిస్సతీతి?

పఞ్చవోకారా చవన్తానం అరూపానం తేసం తత్థ రూపక్ఖన్ధో నుప్పజ్జతి, నో చ తేసం తత్థ వేదనాక్ఖన్ధో న నిరుజ్ఝిస్సతి. పరినిబ్బన్తానం అసఞ్ఞసత్తా చవన్తానం తేసం తత్థ రూపక్ఖన్ధో చ నుప్పజ్జతి వేదనాక్ఖన్ధో చ న నిరుజ్ఝిస్సతి.

(ఖ) యస్స వా పన యత్థ వేదనాక్ఖన్ధో న నిరుజ్ఝిస్సతి తస్స తత్థ రూపక్ఖన్ధో నుప్పజ్జతీతి?

అసఞ్ఞసత్తం ఉపపజ్జన్తానం తేసం తత్థ వేదనాక్ఖన్ధో న నిరుజ్ఝిస్సతి, నో చ తేసం తత్థ రూపక్ఖన్ధో నుప్పజ్జతి. పరినిబ్బన్తానం అసఞ్ఞసత్తా చవన్తానం తేసం తత్థ వేదనాక్ఖన్ధో చ న నిరుజ్ఝిస్సతి రూపక్ఖన్ధో చ నుప్పజ్జతి.

౧౯౫. (క) యస్స యత్థ వేదనాక్ఖన్ధో నుప్పజ్జతి తస్స తత్థ సఞ్ఞాక్ఖన్ధో న నిరుజ్ఝిస్సతీతి?

చతువోకారా పఞ్చవోకారా చవన్తానం తేసం తత్థ వేదనాక్ఖన్ధో నుప్పజ్జతి, నో చ తేసం తత్థ సఞ్ఞాక్ఖన్ధో న నిరుజ్ఝిస్సతి. పరినిబ్బన్తానం అసఞ్ఞసత్తానం తేసం తత్థ వేదనాక్ఖన్ధో చ నుప్పజ్జతి సఞ్ఞాక్ఖన్ధో చ న నిరుజ్ఝిస్సతి.

(ఖ) యస్స వా పన యత్థ సఞ్ఞాక్ఖన్ధో న నిరుజ్ఝిస్సతి తస్స తత్థ వేదనాక్ఖన్ధో నుప్పజ్జతీతి? ఆమన్తా.