(౬) అతీతానాగతవారో
(క) అనులోమపుగ్గలో
౧౯౬. (క) యస్స రూపక్ఖన్ధో ఉప్పజ్జిత్థ తస్స వేదనాక్ఖన్ధో నిరుజ్ఝిస్సతీతి?
పరినిబ్బన్తానం తేసం రూపక్ఖన్ధో ఉప్పజ్జిత్థ, నో చ తేసం వేదనాక్ఖన్ధో నిరుజ్ఝిస్సతి. ఇతరేసం తేసం రూపక్ఖన్ధో చ ఉప్పజ్జిత్థ వేదనాక్ఖన్ధో చ నిరుజ్ఝిస్సతి.
(ఖ) యస్స వా పన వేదనాక్ఖన్ధో నిరుజ్ఝిస్సతి తస్స రూపక్ఖన్ధో ఉప్పజ్జిత్థాతి? ఆమన్తా.
౧౯౭. (క) యస్స వేదనాక్ఖన్ధో ఉప్పజ్జిత్థ తస్స సఞ్ఞాక్ఖన్ధో నిరుజ్ఝిస్సతీతి?
పరినిబ్బన్తానం తేసం వేదనాక్ఖన్ధో ఉప్పజ్జిత్థ, నో చ తేసం సఞ్ఞాక్ఖన్ధో నిరుజ్ఝిస్సతి. ఇతరేసం తేసం వేదనాక్ఖన్ధో చ ఉప్పజ్జిత్థ సఞ్ఞాక్ఖన్ధో చ నిరుజ్ఝిస్సతి.
(ఖ) యస్స వా పన సఞ్ఞాక్ఖన్ధో నిరుజ్ఝిస్సతి తస్స వేదనాక్ఖన్ధో ఉప్పజ్జిత్థాతి? ఆమన్తా.
(ఖ) అనులోమఓకాసో
౧౯౮. యత్థ రూపక్ఖన్ధో ఉప్పజ్జిత్థ…పే….
(గ) అనులోమపుగ్గలోకాసా
౧౯౯. (క) యస్స యత్థ రూపక్ఖన్ధో ఉప్పజ్జిత్థ తస్స తత్థ వేదనాక్ఖన్ధో నిరుజ్ఝిస్సతీతి?
పఞ్చవోకారే పరినిబ్బన్తానం అసఞ్ఞసత్తానం తేసం తత్థ రూపక్ఖన్ధో ఉప్పజ్జిత్థ, నో చ తేసం తత్థ వేదనాక్ఖన్ధో నిరుజ్ఝిస్సతి. ఇతరేసం పఞ్చవోకారానం తేసం తత్థ రూపక్ఖన్ధో చ ఉప్పజ్జిత్థ వేదనాక్ఖన్ధో చ నిరుజ్ఝిస్సతి.
(ఖ) యస్స వా పన యత్థ వేదనాక్ఖన్ధో నిరుజ్ఝిస్సతి తస్స తత్థ రూపక్ఖన్ధో ఉప్పజ్జిత్థాతి?
సుద్ధావాసం ఉపపజ్జన్తానం అరూపానం తేసం తత్థ వేదనాక్ఖన్ధో నిరుజ్ఝిస్సతి, నో చ తేసం తత్థ రూపక్ఖన్ధో ఉప్పజ్జిత్థ. ఇతరేసం పఞ్చవోకారానం తేసం తత్థ వేదనాక్ఖన్ధో చ నిరుజ్ఝిస్సతి రూపక్ఖన్ధో చ ఉప్పజ్జిత్థ.
౨౦౦. (క) యస్స యత్థ వేదనాక్ఖన్ధో ఉప్పజ్జిత్థ తస్స తత్థ సఞ్ఞాక్ఖన్ధో నిరుజ్ఝిస్సతీతి?
పరినిబ్బన్తానం తేసం తత్థ వేదనాక్ఖన్ధో ఉప్పజ్జిత్థ, నో చ తేసం తత్థ సఞ్ఞాక్ఖన్ధో నిరుజ్ఝిస్సతి. ఇతరేసం చతువోకారానం పఞ్చవోకారానం తేసం తత్థ వేదనాక్ఖన్ధో చ ఉప్పజ్జిత్థ సఞ్ఞాక్ఖన్ధో చ నిరుజ్ఝిస్సతి.
(ఖ) యస్స వా పన యత్థ సఞ్ఞాక్ఖన్ధో నిరుజ్ఝిస్సతి తస్స తత్థ వేదనాక్ఖన్ధో ఉప్పజ్జిత్థాతి?
సుద్ధావాసం ఉపపజ్జన్తానం తేసం తత్థ సఞ్ఞాక్ఖన్ధో నిరుజ్ఝిస్సతి, నో చ తేసం తత్థ వేదనాక్ఖన్ధో ఉప్పజ్జిత్థ. ఇతరేసం చతువోకారానం పఞ్చవోకారానం తేసం తత్థ సఞ్ఞాక్ఖన్ధో చ నిరుజ్ఝిస్సతి వేదనాక్ఖన్ధో చ ఉప్పజ్జిత్థ.
(ఘ) పచ్చనీకపుగ్గలో
౨౦౧. (క) యస్స రూపక్ఖన్ధో నుప్పజ్జిత్థ తస్స వేదనాక్ఖన్ధో న నిరుజ్ఝిస్సతీతి? నత్థి.
(ఖ) యస్స వా పన వేదనాక్ఖన్ధో న నిరుజ్ఝిస్సతి తస్స రూపక్ఖన్ధో నుప్పజ్జిత్థాతి? ఉప్పజ్జిత్థ.
౨౦౨. (క) యస్స వేదనాక్ఖన్ధో నుప్పజ్జిత్థ తస్స సఞ్ఞాక్ఖన్ధో న నిరుజ్ఝిస్సతీతి? నత్థి.
(ఖ) యస్స వా పన సఞ్ఞాక్ఖన్ధో న నిరుజ్ఝిస్సతి తస్స వేదనాక్ఖన్ధో నుప్పజ్జిత్థాతి? ఉప్పజ్జిత్థ.
(ఙ) పచ్చనీకఓకాసో
౨౦౩. యత్థ రూపక్ఖన్ధో నుప్పజ్జిత్థ…పే….
(చ) పచ్చనీకపుగ్గలోకాసా
౨౦౪. (క) యస్స యత్థ రూపక్ఖన్ధో నుప్పజ్జిత్థ తస్స తత్థ వేదనాక్ఖన్ధో న నిరుజ్ఝిస్సతీతి?
సుద్ధావాసం ఉపపజ్జన్తానం అరూపానం తేసం తత్థ రూపక్ఖన్ధో నుప్పజ్జిత్థ, నో చ తేసం తత్థ వేదనాక్ఖన్ధో న నిరుజ్ఝిస్సతి. సుద్ధావాసే పరినిబ్బన్తానం అరూపే పరినిబ్బన్తానం తేసం తత్థ రూపక్ఖన్ధో చ నుప్పజ్జిత్థ వేదనాక్ఖన్ధో చ న నిరుజ్ఝిస్సతి.
(ఖ) యస్స వా పన యత్థ వేదనాక్ఖన్ధో న నిరుజ్ఝిస్సతి తస్స తత్థ రూపక్ఖన్ధో నుప్పజ్జిత్థాతి?
పఞ్చవోకారే పరినిబ్బన్తానం అసఞ్ఞసత్తానం తేసం తత్థ వేదనాక్ఖన్ధో న నిరుజ్ఝిస్సతి, నో చ తేసం తత్థ రూపక్ఖన్ధో నుప్పజ్జిత్థ. సుద్ధావాసే పరినిబ్బన్తానం అరూపే పరినిబ్బన్తానం తేసం తత్థ వేదనాక్ఖన్ధో చ న నిరుజ్ఝిస్సతి రూపక్ఖన్ధో చ నుప్పజ్జిత్థ.
౨౦౫. (క) యస్స యత్థ వేదనాక్ఖన్ధో నుప్పజ్జిత్థ తస్స తత్థ సఞ్ఞాక్ఖన్ధో న నిరుజ్ఝిస్సతీతి?
సుద్ధావాసం ఉపపజ్జన్తానం తేసం తత్థ వేదనాక్ఖన్ధో నుప్పజ్జిత్థ, నో చ తేసం తత్థ సఞ్ఞాక్ఖన్ధో న నిరుజ్ఝిస్సతి. సుద్ధావాసే పరినిబ్బన్తానం అసఞ్ఞసత్తానం తేసం తత్థ వేదనాక్ఖన్ధో చ నుప్పజ్జిత్థ సఞ్ఞాక్ఖన్ధో చ న నిరుజ్ఝిస్సతి.
(ఖ) యస్స వా పన యత్థ సఞ్ఞాక్ఖన్ధో న నిరుజ్ఝిస్సతి తస్స తత్థ వేదనాక్ఖన్ధో నుప్పజ్జిత్థాతి?
పరినిబ్బన్తానం తేసం తత్థ సఞ్ఞాక్ఖన్ధో న నిరుజ్ఝిస్సతి, నో చ తేసం తత్థ వేదనాక్ఖన్ధో నుప్పజ్జిత్థ. సుద్ధావాసే పరినిబ్బన్తానం అసఞ్ఞసత్తానం తేసం తత్థ సఞ్ఞాక్ఖన్ధో చ న నిరుజ్ఝిస్సతి వేదనాక్ఖన్ధో చ నుప్పజ్జిత్థ.
ఉప్పాదనిరోధవారో.
పవత్తివారో నిట్ఠితో.