(౨) అతీతవారో

(క) అనులోమపుగ్గలో

౧౬౫. (క) యస్స రూపక్ఖన్ధో ఉప్పజ్జిత్థ తస్స వేదనాక్ఖన్ధో నిరుజ్ఝిత్థాతి? ఆమన్తా.

(ఖ) యస్స వా పన వేదనాక్ఖన్ధో నిరుజ్ఝిత్థ తస్స రూపక్ఖన్ధో ఉప్పజ్జిత్థాతి? ఆమన్తా.

౧౬౬. (క) యస్స వేదనాక్ఖన్ధో ఉప్పజ్జిత్థ తస్స సఞ్ఞాక్ఖన్ధో నిరుజ్ఝిత్థాతి? ఆమన్తా.

(ఖ) యస్స వా పన సఞ్ఞాక్ఖన్ధో నిరుజ్ఝిత్థ తస్స వేదనాక్ఖన్ధో ఉప్పజ్జిత్థాతి? ఆమన్తా.

(ఖ) అనులోమఓకాసో

౧౬౭. యత్థ రూపక్ఖన్ధో ఉప్పజ్జిత్థ…పే….

(గ) అనులోమపుగ్గలోకాసా

౧౬౮. (క) యస్స యత్థ రూపక్ఖన్ధో ఉప్పజ్జిత్థ తస్స తత్థ వేదనాక్ఖన్ధో నిరుజ్ఝిత్థాతి?

అసఞ్ఞసత్తానం తేసం తత్థ రూపక్ఖన్ధో ఉప్పజ్జిత్థ, నో చ తేసం తత్థ వేదనాక్ఖన్ధో నిరుజ్ఝిత్థ. పఞ్చవోకారానం తేసం తత్థ రూపక్ఖన్ధో చ ఉప్పజ్జిత్థ వేదనాక్ఖన్ధో చ నిరుజ్ఝిత్థ.

(ఖ) యస్స వా పన యత్థ వేదనాక్ఖన్ధో నిరుజ్ఝిత్థ తస్స తత్థ రూపక్ఖన్ధో ఉప్పజ్జిత్థాతి?

అరూపానం తేసం తత్థ వేదనాక్ఖన్ధో నిరుజ్ఝిత్థ, నో చ తేసం తత్థ రూపక్ఖన్ధో ఉప్పజ్జిత్థ. పఞ్చవోకారానం తేసం తత్థ వేదనాక్ఖన్ధో చ నిరుజ్ఝిత్థ రూపక్ఖన్ధో చ ఉప్పజ్జిత్థ.

౧౬౯. (క) యస్స యత్థ వేదనాక్ఖన్ధో ఉప్పజ్జిత్థ తస్స తత్థ సఞ్ఞాక్ఖన్ధో నిరుజ్ఝిత్థాతి? ఆమన్తా.

(ఖ) యస్స వా పన యత్థ సఞ్ఞాక్ఖన్ధో నిరుజ్ఝిత్థ తస్స తత్థ వేదనాక్ఖన్ధో ఉప్పజ్జిత్థాతి? ఆమన్తా.

(ఘ) పచ్చనీకపుగ్గలో

౧౭౦. (క) యస్స రూపక్ఖన్ధో నుప్పజ్జిత్థ తస్స వేదనాక్ఖన్ధో న నిరుజ్ఝిత్థాతి? నత్థి.

(ఖ) యస్స వా పన వేదనాక్ఖన్ధో న నిరుజ్ఝిత్థ తస్స రూపక్ఖన్ధో నుప్పజ్జిత్థాతి? నత్థి.

౧౭౧. (క) యస్స వేదనాక్ఖన్ధో నుప్పజ్జిత్థ తస్స సఞ్ఞాక్ఖన్ధో న నిరుజ్ఝిత్థాతి? నత్థి.

(ఖ) యస్స వా పన సఞ్ఞాక్ఖన్ధో న నిరుజ్ఝిత్థ తస్స వేదనాక్ఖన్ధో నుప్పజ్జిత్థాతి? నత్థి.

(ఙ) పచ్చనీకఓకాసో

౧౭౨. యత్థ రూపక్ఖన్ధో నుప్పజ్జిత్థ…పే….

(చ) పచ్చనీకపుగ్గలోకాసా

౧౭౩. (క) యస్స యత్థ రూపక్ఖన్ధో నుప్పజ్జిత్థ తస్స తత్థ వేదనాక్ఖన్ధో న నిరుజ్ఝిత్థాతి?

అరూపానం తేసం తత్థ రూపక్ఖన్ధో నుప్పజ్జిత్థ, నో చ తేసం తత్థ వేదనాక్ఖన్ధో న నిరుజ్ఝిత్థ. సుద్ధావాసానం తేసం తత్థ రూపక్ఖన్ధో చ నుప్పజ్జిత్థ వేదనాక్ఖన్ధో చ న నిరుజ్ఝిత్థ.

(ఖ) యస్స వా పన యత్థ వేదనాక్ఖన్ధో న నిరుజ్ఝిత్థ తస్స తత్థ రూపక్ఖన్ధో నుప్పజ్జిత్థాతి?

అసఞ్ఞసత్తానం తేసం తత్థ వేదనాక్ఖన్ధో న నిరుజ్ఝిత్థ, నో చ తేసం తత్థ రూపక్ఖన్ధో నుప్పజ్జిత్థ. సుద్ధావాసానం తేసం తత్థ వేదనాక్ఖన్ధో చ న నిరుజ్ఝిత్థ రూపక్ఖన్ధో చ నుప్పజ్జిత్థ.

౧౭౪. (క) యస్స యత్థ వేదనాక్ఖన్ధో నుప్పజ్జిత్థ తస్స తత్థ సఞ్ఞాక్ఖన్ధో న నిరుజ్ఝిత్థాతి? ఆమన్తా.

(ఖ) యస్స వా పన యత్థ సఞ్ఞాక్ఖన్ధో న నిరుజ్ఝిత్థ తస్స తత్థ వేదనాక్ఖన్ధో నుప్పజ్జిత్థాతి? ఆమన్తా.