(౩) అనాగతవారో

(క) అనులోమపుగ్గలో

౧౭౫. (క) యస్స రూపక్ఖన్ధో ఉప్పజ్జిస్సతి తస్స వేదనాక్ఖన్ధో నిరుజ్ఝిస్సతీతి? ఆమన్తా.

(ఖ) యస్స వా పన వేదనాక్ఖన్ధో నిరుజ్ఝిస్సతి తస్స రూపక్ఖన్ధో ఉప్పజ్జిస్సతీతి?

పచ్ఛిమభవికానం ఉపపజ్జన్తానం యే చ అరూపం ఉపపజ్జిత్వా పరినిబ్బాయిస్సన్తి తేసం వేదనాక్ఖన్ధో నిరుజ్ఝిస్సతి, నో చ తేసం రూపక్ఖన్ధో ఉప్పజ్జిస్సతి. ఇతరేసం తేసం వేదనాక్ఖన్ధో చ నిరుజ్ఝిస్సతి రూపక్ఖన్ధో చ ఉప్పజ్జిస్సతి.

౧౭౬. (క) యస్స వేదనాక్ఖన్ధో ఉప్పజ్జిస్సతి తస్స సఞ్ఞాక్ఖన్ధో నిరుజ్ఝిస్సతీతి? ఆమన్తా.

(ఖ) యస్స వా పన సఞ్ఞాక్ఖన్ధో నిరుజ్ఝిస్సతి తస్స వేదనాక్ఖన్ధో ఉప్పజ్జిస్సతీతి?

పచ్ఛిమభవికానం ఉపపజ్జన్తానం తేసం సఞ్ఞాక్ఖన్ధో నిరుజ్ఝిస్సతి, నో చ తేసం వేదనాక్ఖన్ధో ఉప్పజ్జిస్సతి. ఇతరేసం తేసం సఞ్ఞాక్ఖన్ధో చ నిరుజ్ఝిస్సతి వేదనాక్ఖన్ధో చ ఉప్పజ్జిస్సతి.

(ఖ) అనులోమఓకాసో

౧౭౭. యత్థ రూపక్ఖన్ధో ఉప్పజ్జిస్సతి…పే….

(గ) అనులోమపుగ్గలోకాసా

౧౭౮. (క) యస్స యత్థ రూపక్ఖన్ధో ఉప్పజ్జిస్సతి తస్స తత్థ వేదనాక్ఖన్ధో నిరుజ్ఝిస్సతీతి?

అసఞ్ఞసత్తానం తేసం తత్థ రూపక్ఖన్ధో ఉప్పజ్జిస్సతి, నో చ తేసం తత్థ వేదనాక్ఖన్ధో నిరుజ్ఝిస్సతి. పఞ్చవోకారానం తేసం తత్థ రూపక్ఖన్ధో చ ఉప్పజ్జిస్సతి వేదనాక్ఖన్ధో చ నిరుజ్ఝిస్సతి.

(ఖ) యస్స వా పన యత్థ వేదనాక్ఖన్ధో నిరుజ్ఝిస్సతి తస్స తత్థ రూపక్ఖన్ధో ఉప్పజ్జిస్సతీతి?

పచ్ఛిమభవికానం పఞ్చవోకారం ఉపపజ్జన్తానం అరూపానం తేసం తత్థ వేదనాక్ఖన్ధో నిరుజ్ఝిస్సతి, నో చ తేసం తత్థ రూపక్ఖన్ధో ఉప్పజ్జిస్సతి. ఇతరేసం పఞ్చవోకారానం తేసం తత్థ వేదనాక్ఖన్ధో చ నిరుజ్ఝిస్సతి రూపక్ఖన్ధో చ ఉప్పజ్జిస్సతి.

౧౭౯. (క) యస్స యత్థ వేదనాక్ఖన్ధో ఉప్పజ్జిస్సతి తస్స తత్థ సఞ్ఞాక్ఖన్ధో నిరుజ్ఝిస్సతీతి? ఆమన్తా.

(ఖ) యస్స వా పన యత్థ సఞ్ఞాక్ఖన్ధో నిరుజ్ఝిస్సతి తస్స తత్థ వేదనాక్ఖన్ధో ఉప్పజ్జిస్సతీతి?

పచ్ఛిమభవికానం ఉపపజ్జన్తానం తేసం తత్థ సఞ్ఞాక్ఖన్ధో నిరుజ్ఝిస్సతి, నో చ తేసం తత్థ వేదనాక్ఖన్ధో ఉప్పజ్జిస్సతి. ఇతరేసం చతువోకారానం పఞ్చవోకారానం తేసం తత్థ సఞ్ఞాక్ఖన్ధో చ నిరుజ్ఝిస్సతి వేదనాక్ఖన్ధో చ ఉప్పజ్జిస్సతి.

(ఘ) పచ్చనీకపుగ్గలో

౧౮౦. (క) యస్స రూపక్ఖన్ధో నుప్పజ్జిస్సతి తస్స వేదనాక్ఖన్ధో న నిరుజ్ఝిస్సతీతి?

పచ్ఛిమభవికానం ఉపపజ్జన్తానం యే చ అరూపం ఉపపజ్జిత్వా పరినిబ్బాయిస్సన్తి తేసం రూపక్ఖన్ధో నుప్పజ్జిస్సతి, నో చ తేసం వేదనాక్ఖన్ధో న నిరుజ్ఝిస్సతి. పరినిబ్బన్తానం తేసం రూపక్ఖన్ధో చ నుప్పజ్జిస్సతి వేదనాక్ఖన్ధో చ న నిరుజ్ఝిస్సతి.

(ఖ) యస్స వా పన వేదనాక్ఖన్ధో న నిరుజ్ఝిస్సతి తస్స రూపక్ఖన్ధో నుప్పజ్జిస్సతీతి? ఆమన్తా.

౧౮౧. (క) యస్స వేదనాక్ఖన్ధో నుప్పజ్జిస్సతి తస్స సఞ్ఞాక్ఖన్ధో న నిరుజ్ఝిస్సతీతి?

పచ్ఛిమభవికానం ఉపపజ్జన్తానం తేసం వేదనాక్ఖన్ధో నుప్పజ్జిస్సతి, నో చ తేసం సఞ్ఞాక్ఖన్ధో న నిరుజ్ఝిస్సతి. పరినిబ్బన్తానం తేసం వేదనాక్ఖన్ధో చ నుప్పజ్జిస్సతి సఞ్ఞాక్ఖన్ధో చ న నిరుజ్ఝిస్సతి.

(ఖ) యస్స వా పన సఞ్ఞాక్ఖన్ధో న నిరుజ్ఝిస్సతి తస్స వేదనాక్ఖన్ధో నుప్పజ్జిస్సతీతి? ఆమన్తా.

(ఙ) పచ్చనీకఓకాసో

౧౮౨. యత్థ రూపక్ఖన్ధో నుప్పజ్జిస్సతి…పే….

(చ) పచ్చనీకపుగ్గలోకాసా

౧౮౩. (క) యస్స యత్థ రూపక్ఖన్ధో నుప్పజ్జిస్సతి తస్స తత్థ వేదనాక్ఖన్ధో న నిరుజ్ఝిస్సతీతి?

పచ్ఛిమభవికానం పఞ్చవోకారం ఉపపజ్జన్తానం అరూపానం తేసం తత్థ రూపక్ఖన్ధో నుప్పజ్జిస్సతి, నో చ తేసం తత్థ వేదనాక్ఖన్ధో న నిరుజ్ఝిస్సతి. పరినిబ్బన్తానం తేసం తత్థ రూపక్ఖన్ధో చ నుప్పజ్జిస్సతి వేదనాక్ఖన్ధో చ న నిరుజ్ఝిస్సతి.

(ఖ) యస్స వా పన యత్థ వేదనాక్ఖన్ధో న నిరుజ్ఝిస్సతి తస్స తత్థ రూపక్ఖన్ధో నుప్పజ్జిస్సతీతి?

అసఞ్ఞసత్తానం తేసం తత్థ వేదనాక్ఖన్ధో న నిరుజ్ఝిస్సతి, నో చ తేసం తత్థ రూపక్ఖన్ధో నుప్పజ్జిస్సతి. పరినిబ్బన్తానం తేసం తత్థ వేదనాక్ఖన్ధో చ న నిరుజ్ఝిస్సతి రూపక్ఖన్ధో చ నుప్పజ్జిస్సతి.

౧౮౪. (క) యస్స యత్థ వేదనాక్ఖన్ధో నుప్పజ్జిస్సతి తస్స తత్థ సఞ్ఞాక్ఖన్ధో న నిరుజ్ఝిస్సతీతి?

పచ్ఛిమభవికానం ఉపపజ్జన్తానం తేసం తత్థ వేదనాక్ఖన్ధో నుప్పజ్జిస్సతి, నో చ తేసం తత్థ సఞ్ఞాక్ఖన్ధో న నిరుజ్ఝిస్సతి. పరినిబ్బన్తానం అసఞ్ఞసత్తానం తేసం తత్థ వేదనాక్ఖన్ధో చ నుప్పజ్జిస్సతి సఞ్ఞాక్ఖన్ధో చ న నిరుజ్ఝిస్సతి.

(ఖ) యస్స వా పన యత్థ సఞ్ఞాక్ఖన్ధో న నిరుజ్ఝిస్సతి తస్స తత్థ వేదనాక్ఖన్ధో నుప్పజ్జిస్సతీతి? ఆమన్తా.